हत्या आरोपमा ४ जना पक्राउ- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

हत्या आरोपमा ४ जना पक्राउ

कान्तिपुर संवाददाता

जुम्ला — हिमा गाउँपालिकाको जार्जीमा एक व्यक्तिको हत्या आरोपमा प्रहरीले चार जनालाई पक्राउ गरेको छ । ३५ वर्षीय लगम भनिने लोकबहादुर शाहीको शव बुधबार जार्जी र सिम्तली गाउँको बीचमा बाटोदेखि करिब ५० मिटर तल भेटिएको थियो ।

मंगलबार राति उनको हत्या भएको प्रहरीले जनाएको छ । जिल्ला प्रहरी प्रमुख डीएसपी लालबहादुर धामीले घटनामा संलग्न भएको शंकामा स्थानीय चार जनालाई पक्राउ गरी अनुसन्धान भइरहेको बताए । ‘चारै जनाको नाममा किटानी जाहेरी पनि परेको छ,’ उनले भने ।

मृतकका आफन्त चेतन शाहीले लगमको छाती, अनुहार र टाउकोमा ठूलो चोट लागेको बताए । उनका अनुसार चोट हेर्दा ढुंगाले हानेको जस्तो देखिन्छ । पदम भन्ने पदमबहादुर शाही, अम्मर शाही, जयबहादुर बुढा र बलबहादुर बुढाको नाममा किटानी जाहेरी दर्ता गरिएको उनले बताए ।

‘चार दिनसम्म प्रहरीले जाहेरी लिन आनाकानी गरिरहेको थियो, आज बल्ल जाहेरी लिएर अनुसन्धान थालेको भनेको छ,’ उनले भने । घटनाको दिन मृतक र ती व्यक्तिहरूले स्थानीय एक होटलमा सँगै बसेर खाजा खाएको र पछि झगडा परेको शाहीले बताए ।

प्रकाशित : श्रावण १०, २०७७ १९:३२
प्रतिक्रिया
पठाउनुहोस्

लकडाउन खुलेपछि प्रदेश १ मा भारतबाट ६८५ आए, ४९९ बाहिरिए

देवनारायण साह

मोरङ — लकडाउन खुलेपछि प्रदेश १ का विभिन्न नाका हुँदै भारतबाट ६ सय ८५ जना नेपाल भित्रिएका छन् । भारतमा कोरोना महामारीले भयावह रुप लिइरहेका बेला नेपाल भित्रिने क्रम बढेको भन्दै स्थानीयहरु भने संक्रमणको जोखिम बढेको बताउँछन् । 

प्रदेश १ प्रहरी कार्यालयका प्रवक्ता दिपक पोखरेलका अनुसार यसबीचमा ४ सय ९९ जना भारततर्फ गएका छन् । भारतबाट नेपाल प्रवेशका लागि प्रदेश १ मा इलामको पशुपतिनगर, झापाको काँकडभिट्टा, भद्रपुर, मोरङको रानी र रंगेली तथा सुनसरीको भण्टाबारी नाका खुला गरिएको छ । यसरी भित्रिनेहरुलाई इलाम, झापा, मोरङ र सुनसरीस्थित होल्डिङ एरियामा राखेर सम्बन्धित स्थानीय तहलाई क्वारेन्टाइनमा राख्नका लागि जिम्मा लगाउने व्यवस्था गरेको प्रदेश १ का सामाजिक विकास मन्त्री जीवन घिमिरेले बताए ।

होल्डिङ एरियाबाट जिम्मा लिएर गएपछि स्थानीय तहले उनीहरुलाई १४ दिन क्वारेन्टाइनमा राखेर पीसीआर परीक्षण गरेपछि मात्रै घर जान दिने व्यवस्था मिलाइएको उनको भनाइ छ । सीमामा प्रहरीले कडाइ गरेको भनिए पनि सुरक्षाकर्मीको आँखा छलेर आउने जाने क्रम चलिरहेको जहदा–७ का वडाध्यक्ष भगवान बेसराले बताए । यसकारण पनि सीमा क्षेत्रका बासिन्दा कोरोना भाइरस संक्रमणको उच्च जोखिममा रहेको उनले दाबी गरे । ‘आफ्नो वडामा भारतबाट कोही लुकिछिपी आएको सूचना पाउनासाथ क्वारेन्टाइनमा लगेर राख्ने गरेका छौं,’ उनले भने ।

लकडाउन अवधिमा प्रदेश १ का नाकाहरुबाट १९ हजार ४ सय ५८ जना भारतबाट नेपाल भित्रिएका थिए भने २८ हजार २ सय २२ जना भारततर्फ गएको प्रहरीको तथ्यांक छ ।

प्रकाशित : श्रावण १०, २०७७ १९:१२
पूरा पढ्नुहोस्
प्रतिक्रिया
पठाउनुहोस्
×