किशोरी बलात्कार आरोपमा वडाध्यक्ष पक्राउ

कान्तिपुर संवाददाता

कालीकोट — किशोरी बलात्कारको आरोपमा खाँडाचक्र–६ का वडाध्यक्ष जगदीश शाही मंगलबार राति पक्राउ परेका छन् । १७ वर्षीया किशोरी बलात्कार गरेको आरोपमा पीडितले प्रहरीमा जाहेरी दिएपछि सदरमुकाम मान्मबाट ४९ वर्षीय वडाध्यक्ष शाही पक्राउ परेका हुन् ।

शाहीले किशोरीलाई २०७४ सालदेखि नै यौन दुर्व्यवहार गर्दै आएको र गत वर्षको भदौ १७ गते घरमै आएर बलात्कार गरेको जाहेरीमा उल्लेख छ । हाल कक्षा १० मा पढ्ने किशोरीलाई वडाध्यक्ष शाहीले घटना अरुलाई भने ज्यान मार्ने धम्की दिएकाले पहिले भन्न नसकेको बालिकाले बताइन् । उनले बारम्बार दुर्व्यवहार गर्न थालेपछि सहन नसकेर न्यायका लागि मुद्दा दिएको सुनाइन् ।

‘ममाथि अन्याय भयो,’ पीडित किशोरीले कान्तिपुरसँग भनिन्, ‘सहन नसकेर न्याय माग्न सदरमुकाम आएकी हुँ ।’ पहिलेदेखि दुर्व्यवहार गर्दै आए पनि डर त्रासले घटना लुकाएर कसैलाई नभने पनि कुकर्म गरिरहेको अर्की बालिकाले देखेपछि बाहिर आएको आफन्तले बताए ।

आरोपितलाई प्रहरीले पक्राउ गरेर अनुसन्धान सुरु गरेको जिल्ला प्रहरी प्रमुख श्यामबाबु ओलियाले बताए । ‘मुद्दा दर्ता भएर पीडक भनिएकालाई पक्राउ पनि गरिसकेका छौं,’ ओलियाले भने, ‘अनुसन्धानपछि सबै कुरा खुल्छ ।’

पीडित किशोरी आफैले प्रहरीमा जाहेरी दिएकी हुन् ।

प्रकाशित : असार ३१, २०७७ १२:५६
प्रतिक्रिया
पठाउनुहोस्

भैरहवा-परासी औद्योगिक करिडोरका उद्योग डुबानमा

माधव ढुंगाना

भैरहवा — भारी वर्षासँगै आएको बाढीले भैरहवा–परासी औद्योगिक करिडोरका दुई ठूला उद्योग डुबानमा परेका छन् । वर्षाले आसपासका नदीमा बाढी बढेमा अन्य उद्योग पनि डुबानमा पर्ने खतरा बढेको छ । त्यस क्षेत्र जमिनको सतह कम उचाइमा भएकाले डुबानमा पर्ने गर्छ ।

डुबानबाट सबैभन्दा धेरै क्षति पश्चिम नवलपरासी, रामग्राम नगरपालिकाको हकुइस्थित एसियन कंक्रिटो प्रालिमा पुगेको छ । त्यस क्षेत्रमै रहेका राज ब्रुअरी, वरुण बेभरेज उद्योग पनि डुबानबाट प्रभावित भएका छन् ।

एसियन क्रंक्रिटो प्रालिको उद्योगको सम्पूर्ण परिसर डुबानले जलाम्य छ । उद्योगको मेसिन तथा उपकरण र उत्पादित सामान पानीले भिजेका छन् । उद्योगको मुख्य गेट र कम्पाउण्ड वाल बाढीले भत्काइदिएको छ । करिब २ अर्ब रुपैयाँको लगानीमा सञ्चालित उक्त उद्योगले अत्याधुनिक प्रविधिबाट ब्लक, टायल्स र इँटा, कर्भस्टोनको उत्पादन गर्दै आएको छ ।

उद्योगका अध्यक्ष मनीष रुंगटाले बाढीबाट आएको डुबानका कारण हप्ता/दश दिनसम्म उद्योग सञ्चालन गर्न नसकिने र डुबानको पानी सुकेपछि मात्रै क्षतिको विवरण थाहा हुने बताए ।

‘कोरोना संक्रमणका कारण लकडाउनले धेरै समस्यामा परेको उद्योग फेरि बाढी र डुबानले समस्यामा पारेको छ,’ रुगंटाले भने, ‘उद्योगमा रहेका सेन्सर प्रविधिबाट सञ्चालन हुने स्वचालित उपकरणमा बाढीको पानी पसेर क्षति पुगेको छ ।’ उद्योग परिसरमा वर्षा यामभरिका लागि पुग्ने गरी संकलन गरेर राखिएको औद्योगिक कच्चा पदार्थहरु बाढीले बगाएको छ ।

राज ब्रुअरीका व्यवस्थापक श्याम मल्लले पनि उद्योग परिसरमा बाढीबाट भएको डुबानका कारण उद्योग सञ्चालन गर्ने अवस्था नभएकाले बन्द गरिएको र बाढीको पानी नसुकेसम्म उद्योग सञ्चालन गर्न नसकिने बताए । बाढी र डुबानका कारण उद्योगमा परेको क्षतिका बारेमा तत्कालै अनुमान गर्न नसकिएको उनले जनाए ।

करिब ४ अर्ब रुपैयाँ लगानीमा सञ्चालित यस उद्योगले ०७४ सालदेखि नै बर्सेनि डुबानको समस्या झेल्दै आएको छ ।

प्रकाशित : असार ३१, २०७७ १२:४१
पूरा पढ्नुहोस्
प्रतिक्रिया
पठाउनुहोस्
×