कान्तिपुर वेबसाईट
AdvertisementAdvertisement

मध्यपश्चिमाञ्चल विश्वविद्यालयको रजिस्ट्रारमा १९ जनाको आवेदन

आवेदकमध्येबाट उपकुलपतिले सिफारिस गर्ने एक जनालाई कुलपति (प्रधानमन्त्री) ले नियुक्त गरेपछि डेढ वर्षदेखि निमित्त रजिस्ट्रारको भरमा चलिरहेको एमयूले ‘कन्फर्म’ रजिस्ट्रार पाउनेछ ।
कलेन्द्र सेजुवाल

सुर्खेत — मध्यपश्चिमाञ्चल विश्वविद्यालय (एमयू) को रजिस्ट्रार बन्न १९ जनाले आवेदन दिएका छन् । उपकुलपतिले आवेदकमध्येबाट एक जनाको नाम विश्वविद्यालयका कुलपति (प्रधानमन्त्री) लाई नियुक्तिका लागि सिफारिस गर्नेछन् ।


उपकुलपतिको स्वकीय सचिवालयका अनुसार आवेदकमा एमयूका प्राध्यापकहरू केशरसिंह राना, दीपबहादुर रावल, नारायण पौडेल, इन्जिनियरिङ संकायका डिन अनन्तराज घिमिरे, त्रिभुवन विश्वविद्यालयका बुद्धिप्रसाद सापकोटा, राष्ट्रिय परीक्षा बोर्डका कर्णाली प्रदेश कार्यालय प्रमुख जितबहादुर शाहलगायतले आवेदन दिएका छन् । कर्णाली प्रदेशका र अन्य विश्वविद्यालयका प्राध्यापकहरूले पनि आवेदन दिएको सचिवालयले जनाएको छ ।

मध्यपश्चिमाञ्चल विश्वविद्यालय ऐन–२०६७ को दफा २५ मा रजिस्ट्रारको नियुक्ति उपकुलपतिको सिफारिसमा कुलपतिबाट हुने प्रावधान छ । सिधै नाम सिफारिस गर्न मिल्ने भए पनि उपकुलपति नन्दबहादुर सिंहले असार २२ गते सातदिने सूचनामार्फत आवेदन मागेका थिए । अन्तर्राष्ट्रिय मापदण्डको छनोट समिति गठन गरी सोही समितिले दिएका नाममध्येबाट एक जनालाई नियुक्तिका लागि कुलपतिसमक्ष सिफारिस गर्ने उनको भनाइ छ । उनका अनुसार समितिले आवेदकको भिजन पेपर, विषयगत विज्ञता र कार्यानुभवका आधारमा ३ जनाको नाम सिफारिस गर्नेछ । ‘हामीले अबको एक हप्ताभित्र नयाँ रजिस्ट्रार नियुक्तिका लागि सिफारिस गर्नेछौं,’ उनले भने, ‘यसमा राजनीतिक वा अन्य कुनै पनि किसिमको दबाबले प्रभाव पार्नेछैन ।’ अर्थशास्त्र बुझेको र प्रशासन राम्ररी चलाउन सक्ने मान्छेलाई सिफारिस गर्ने उनले बताए ।

मध्यपश्चिमाञ्चल विश्वविद्यालयका रजिस्ट्रार महेन्द्रकुमार मल्लको चारवर्षे कार्यकाल आइतबार सकिएको छ । यद्यपि आन्तरिक विवादका कारण उनलाई कामकाजमा रोक लगाइएपछि २०७५ मंसिर १९ देखि यामबहादुर कार्की निमित्त रजिस्ट्रारका रूपमा कार्यरत छन् । यो प्रक्रिया पूरा भएपछि एमयूले डेढ वर्षपछि ‘कन्फर्म’ रजिस्ट्रार पाउनेछ ।


प्रकाशित : असार ३०, २०७७ १२:०१
प्रतिक्रिया
पठाउनुहोस्

स्याङ्जामा पहिरोमा पुरिएर ३ जना बेपत्ता, ३ को उद्धार

प्रतीक्षा काफ्ले

स्याङ्जा — कालीगण्डकी गाउँपालिका–४ खहरेमा मंगलबार बिहान पहिरो जाँदा ३ जना बेपत्ता भएका छन् । कालीगण्डकी–४ का प्रेमचन्द्र पाण्डे, जिमानसिंह थापा र टीकाबहादुर थापा पहिरोमा पुरिएका हुन् ।

बेपत्ताहरुको खोजी भइरहेको जिल्ला प्रहरी प्रवक्ता डीएसपी राजेन्द्र अधिकारीले जानकारी दिए । उनका अनुसार बाँकी ३ जनाको उद्धार गरिएको छ ।

सोही ठाउँका हुमनाथ पाण्डे, इमानसिंह राना र वीरबहादुर रानाको उद्धार गरी उपचारका लागि गल्याङ लगिएको उनले बताए । उनीहरु पहिरोबाट बच्न भाग्दै गरेको अवस्थामा घाइते भएको डीएसपी अधिकारीले जानकारी दिए ।

प्रकाशित : असार ३०, २०७७ ११:५३
पूरा पढ्नुहोस्
प्रतिक्रिया
पठाउनुहोस्
×