कान्तिपुर वेबसाईट
AdvertisementAdvertisement

कोरोना कहरमा घरमै शिक्षा 

तुलाराम पाण्डे

कालीकोट — कोरोना कहरका कारण सामुदायिक विद्यालय बन्द भएपछि टोलटोलमा शिक्षक खटाइ बालबालिकालाई पढाउन थालिएको छ । शिक्षकहरु शैक्षिक सामग्रीसहित टोलमै पुग्न थालेपछि विद्यार्थी पनि खुसी भएका छन् ।

कालीकोटको खाँडाचक्र–४, ताडीस्थित नवज्योति आधारभूत विद्यालयमा अध्ययनरत बालबालिकाहरु सिकाइ सामग्रीसहित । तस्बिर : तुलाराम/कान्तिपुर

चैत पहिलो सातादेखि विद्यालय नआएकी खाँडाचक्र–४, ताडीकी ८ वर्षीया कोपिला विश्वकर्माले शिक्षण सिकाइ सामग्री पाएपछि घरमै पढ्न थालेकी छिन् । नवज्योति आधारभूत विद्यालयमा कक्षा ३ मा अध्ययनरत उनले अरु साथीहरुसँगै सामूहिकरुपमा पठनपाठन गर्न थालेकी हुन् । विद्यालयले अक्षर लेखन किताबसहित चित्र बनाउने र खेल सामग्री उपलव्ध गराएपछि बाल विकास केन्द्रदेखि कक्षा ३ सम्मका १ सय ४३ जना बालबालिकालाई घरमै पठनपाठन सुविधा पुगेको छ । शैक्षिक सामग्रीसहित विभिन्न शैक्षिक क्रियाकलाप सहज बनाउन टोलटोलमा शिक्षक खटाइएको प्रधानाध्यापक रामबहादुर बोगटीले बताए ।

खाँडाचक्रले साल्डाँडास्थित पञ्चदेव मावि, पिलिस्थित चुलिमालिका मावि, कालिका मावि, मेघमति प्रावि, जनप्रभात मावि, लिगासैनी माविलगायतमा बालबालिकालाई सिकाइ सामग्री उपलव्ध गराएको नगर शिक्षा शाखा प्रमुख जसीप्रसाद चौलागाईले बताए । ‘घरमा पठनपाठनको वातावरण नभएका र पाठ्यसामग्रीको अभाव भएका बालबालिकाले घरमै सिक्न पाएका छन्,’ उनले भने, ‘विद्यालयमा जान नपाए पनि अहिले उनीहरुलाई धेरै राहत मिलेको छ ।’

कोरोना महामारीका कारण क्वारेन्टाइन बनाइएका रास्कोट नगरपालिकाका सुन्दर आधारभूत, मोतिराम मावि, मालिका आधारभूत, दानपाल्त आधारभूतलगायत ९ विद्यालयका विद्यार्थीले पनि सिकाइ सामग्री पाएका छन् । ‘केही विद्यालयका बालबालिकाले स्थानीय शैक्षिक सामग्रीमार्फत घरमै पाठ्यक्रमअनुसार सिकिरहेका छन्,’ नगर शिक्षा प्रमुख प्रभुलाल न्यौपानेले भने,‘शैक्षिक सामग्री सहयोग गरेपछि विद्यार्थीको सिकाइस्तर बढिरहेको छ ।’ कालीकोटका ९ वटै पालिकाकामा ५६ विद्यालय क्वारेन्टाइनमा प्रयोग भएका शिक्षा विकास तथा समन्वय इकाइ प्रमुख महेश देवकोटाले बताए । उनले विद्यालयलाई क्वारेन्टाइन नबनाउन स्थानीय तहलाई पत्राचार गर्ने तयारी भइरहेको जनाए ।

खाँडाचक्रमा भर्ना सुरु

खाँडाचक्र नगरपालिकाले नगर भित्रका सबै विद्यालयलाई परिपत्र गरेर नयाँ भर्ना गर्न शिक्षक खटाएको छ । सामाजिक दूरी कायम गर्दै माक्स र सेनिटाइजरसहित शिक्षकलाई टोलटोलमा खटाएर विद्यार्थी भर्ना गर्न थालिएको हो ।

कोरोना संकटमा घरमै बसेका बालबालिकालाई पढ्नुपर्छ भन्ने मानसिकता बनाउन टोल–टोलमा शिक्षक पठाउन लागेको नगरपालिकाले जनाएको छ । ताडीस्थित जनजीवन माविले ७ जना शिक्षकलाई विभिन्न टोलमा खटाएर बालबालिकाको अवस्थाबारे जानकारी लिन थालेको प्रधानाध्यापक तेजबहादुर शाहीले बताए ।

प्रकाशित : असार २९, २०७७ १४:०९
प्रतिक्रिया
पठाउनुहोस्

अस्पताल नै नगई कोरोनामुक्त भइन् बेलायतकी १०४ वर्षीया महिला

एजेन्सी

लन्डन — बेलायतकी एक जना १०४ वर्षीया महिला कोरोनामुक्त भएकी छिन् । बेलायतकी कोरोना संक्रमित १०४ वर्षीया महिला ३ हप्ता आवासीय हेरचाह केन्द्रमै आराम गरेपछि निको भएको बीबीसीले जनाएको छ ।

१०४ वर्षीया ग्रेस नातिनी क्रिस्टलसँग तस्बिर : बीबीसी

केन्ट निवासी ग्रेस ग्रीनवुडलाई कोरोना संक्रमण पुष्टि भएपछि श्वासप्रश्वासमा समस्या देखिएको थियो । तर अन्य जटिल समस्या नदेखिएका कारण उनलाई अस्पताल लैजानु नपरेको चिकित्सकहरुले बताएका छन् ।

ग्रेसका परिवारका सदस्यहरुका अनुसार उनी पहिले पनि विभिन्न रोगबाट ग्रसित भएको र त्यसलाई झेलेका कारण अहिलेको चुनौतीलाई सामना गर्न सकेकी हुन् । ग्रेसको जन्म बर्मा(म्यानमार) मा भएको थियो । उनले भारतमा केही समय नर्सका रुपमा काम गरेकी थिइन् । त्यसपछि उनी लामो समुद्री यात्रा तय गर्दै सन् १९४६ मा बेलायत फर्केकी थिइन् ।

लन्डनमा मेकअफ आर्टिस्टका रुपमा कार्यरत उनकी नातिनी क्रिस्टल अपोलोनिया भन्छिन्, ‘केही हप्ता पहिले उहाँ बिरामी हुनुभयो । जब चिकित्सकले उहाँको स्वास्थ्य अवस्थाका बारेमा जानकारी दिए हामी निकै डराएका थियौं । हामीलाई थाहा थियो हामी बसेको ठाउँमा कोरोनाबाट धेरैको मृत्यु भएको थियो ।’ आफूलाई कोरोना भाइरसको संक्रमण भएको थाहा पाएपछि पनि ग्रेस कत्ति पनि नआत्तिएको क्रिस्टल बताउँछिन् । क्रिस्टलका अनुसार उनकी हजुरआमा दृढ इच्छाशक्ति भएकी महिला हुन् । उनी अहिले पनि दैनिक रुपमा शारीरिक अभ्यासको प्रयास गरिरहेकी हुन्छिन् ।

बेलायतमा सोमबार बिहानसम्म २ लाख ९१ हजारभन्दा बढीमा कोरोना पुष्टि भएको छ । बेलायतमा कोरोनाबाट मृत्यु हुनेको संख्या ४४ हजार ९ सय ४ रहेको छ ।

सम्बन्धित समाचार

प्रकाशित : असार २९, २०७७ १३:५७
पूरा पढ्नुहोस्
प्रतिक्रिया
पठाउनुहोस्
×