कान्तिपुर वेबसाईट
AdvertisementAdvertisement

पहिरोले ट्यांकी र पाइप बगाएपछि खानेपानी अभाव

कान्तिपुर संवाददाता

सल्यान — पहिरोले जुगेपानी–तलझरे–काफलनेटा–उल्लेरी खानेपानी आयोजनाको ट्यांकी र पाइप बगाएपछि दार्मा गाउँपालिका–५ मा खानेपानी अभाव भएको छ । खानेपानी अभाव भएपछि स्थानीयवासीले आकासेपानीको भरमा गुजारा चलाउन बाध्य छन् ।

ट्यांकी र पाइप बगाएपछि दार्माका १ सय ७५ घरमा खानेपानी अभाव भएको हो । खानेपानी अभाव भएपछि दूषित पानी प्रयोग गर्नुपर्ने बाध्यता भएको स्थानीय कर्णबहादुर खड्काले बताए । ‘पानी नपरेको दिन डेढ घण्टा हिँडेर खोलाबाट पानी ल्याउनुपर्ने बाध्यता छ,’ उनले भने, ‘सरसफाइका काम पनि प्रभावित भएका छन् ।’ उनका अनुसार पहिरोले गाउँका २ घर र सिँचाइ कुलोमा समेत क्षति पुर्‍याएको छ ।

अविरल वर्षापछि आएको पहिरोले २ करोड २२ लाख रुपैयाँको लगानीमा निर्माणाधीन योजनामा क्षति पुर्‍याएको गाउँपालिकाका अध्यक्ष नीमबहादुर केसीले बताए । पहिरोले क्षति पुर्‍याएको स्थानमा मर्मतका लागि प्राविधिक खटाइएको उनले बताए ।

प्रकाशित : असार २४, २०७७ १८:०४
प्रतिक्रिया
पठाउनुहोस्

आरोप–प्रत्यारोपले गाउँपालिकाको कामकाज ठप्प

राजबहादुर शाही

मुगु — सोरु गाउँपालिकामा अध्यक्ष र कर्मचारीबीच आरोप–प्रत्यारोप चलेपछि कामकाज ठप्प भएको छ । गाउँसभा छोडेर जनप्रतिनिधि र कर्मचारी आरोप–प्रत्यारोपमा लागेका छन् ।

गत आइतबार गाउँपालिका अध्यक्ष लोकबहादुर शाहीले निमित्त प्रमुख प्रशासकीय अधिकृत धान्‍ने बुढा र लेखापाल जेठबहादुर बुढाले अनियमितता गरेको भन्दै जिल्ला प्रशासनमा उजुरी दिएका थिए । बुधबार कर्मचारीहरुका तर्फबाट पनि जिल्ला प्रशासन कार्यालयमा उजुरी परेको छ भने गाउँपालिकामा कार्यरत ६२ जनाले कार्यकारी अधिकृतको बचाउ गर्दै विज्ञप्ति निकालेका छन् । जनप्रतिनिधि– कर्मचारी आरोप प्रत्यारोपकै कारण असार २४ गते तोकिएको गाउँसभा अनिश्चित बनेको छ ।

कर्मचारीले जारी गरेको विज्ञप्तिमा गाउँपालिका अध्यक्षले उपभोक्ता समितिसँग घूस मागेको आरोप लगाइएको छ । अध्यक्ष शाहीले प्रशासनमा पेश गरेको उजुरीमा भने निमित्त प्रमुख कार्यकारी अधिकृत र लेखापाल बुढाले कोरोना राहत कोषको १९ लाख र गिलाह–तारापानी सडकको ९ लाख २१ हजार रुपैयाँ अनियमितता गरेको उल्लेख छ । कर्मचारीकातर्फबाट परेको उजूरीमा अध्यक्ष शाहीले उपभोक्ता समितिसँग १५ लाख र कोरोना राहत कोषको ३ लाख रुपैयाँ घूस मागेको आरोप लगाइएको छ ।

निमित्त कार्यकारी अधिकृत बुढाले अध्यक्षले गलत आरोप लगाएर फसाउन खोजेको बताए । सबै कर्मचारी प्रमुख कार्यकारी अधिकृत बुढाको बचाउमा सदरमुकाम गमगढी गएपछि कामकाज ठप्प भएको अध्यक्ष शाहीले बताए । ‘कर्मचारीको अनियमितताविरुद्ध उजुरी दिएको हुँ,’ उनले भने, ‘माथिल्ला तहका कर्मचारीको बचाउमा सबै कर्मचारी लागेपछि जनताले सास्ती पाएका छन् ।’

प्रकाशित : असार २४, २०७७ १७:२८
पूरा पढ्नुहोस्
प्रतिक्रिया
पठाउनुहोस्
×