अवैध सम्बन्ध राखेको भन्दै वडाध्यक्षलाई कारबाही माग

विप्लव महर्जन

सल्यान — वडाध्यक्षले कार्यालयको क्वार्टरमा अवैध यौनसम्बन्ध राखेको भन्दै त्रिवेणी गाउँपालिका–४ फलाबाङका स्थानीय कारबाहीको माग राखी प्रदर्शमा उत्रिएका छन् । उनीहरूले आइतबार गाउँपालिका कार्यालय र लुहाम बजारमा विरोध प्रदर्शन गरे ।

वडाध्यक्षलाई कारबाहीको माग राख्दै लुहामबजारमा प्रदर्शनमा उत्रिएका त्रिवेणी गाउँपालिका–४ फलाबाङका स्थानीय । तस्बिर : विप्लव महर्जन 

४ नम्बर वडाध्यक्ष छविराज शर्माले गत बुधबार राति क्वार्टरमा अनैतिक सम्बन्ध राखेको उनीहरूको दाबी छ । उनीहरूले राति नै वडा कार्यालय घेरा हाली शर्मालाई प्रहरीको जिम्मा लगाउनुका साथै कार्यालयको गेटमा तालाबन्दी गरिदिएका थिए । तर, प्रहरीले कारबाहीको साटो उल्टै छाडिदिएको स्थानीयको आरोप छ ।

वडा सदस्य सीता बिष्टले वडाध्यक्षले गलत कार्य गरे/नगरेको छानबिन गर्न आग्रह गर्दा बेवास्ता गरिएकाले दबाबका लागि प्रदर्शन गर्नुपरेको बताइन् । प्रहरी र पालिका मिलेर घटना गुपचुप बनाउने प्रयास भएको भन्दै उनले आपत्ति जनाइन् ।

उनले बुधबार राति युवाहरूले अनैतिक कार्य गरेको भन्दै वडाध्यक्षलाई एउटा कोठामा थुनेर राखेको फोनमार्फत जानकारी पाएको बताइन् । त्यही बेला कार्यालयको क्वार्टरमा गएर हेर्दा एक महिला तन्नाले छोपिएर खाटमा बसिरहेको अवस्थामा फेला परेको उनले सुनाइन् ।

वडाध्यक्ष शर्माले भने ती महिला कार्यालयको कामको सिलसिलामा आएको र आफूले कुनै अनैतिक कार्य नगरे पनि फसाउन खोजिएको बताएका छन् । युवाहरूले कार्यालय तोडफोड गरेपछि प्रहरीलाई फोन गरेर बोलाएको उनको भनाइ छ ।

इलाका प्रहरी कार्यालय लुहामका प्रहरी निरीक्षक जगतबहादुर नेपालीले स्थानीयले दिएको जाहेरीमा अनुसन्धान भइरहेको बताएका छन । उनका अनुसार वडाध्यक्षले रातिको समयमा कार्यालयमा स्थानीय युवाले तोडफोड गरेको भन्दै फोन गरेपछि प्रहरी त्यहाँ पुगेको थियो । ‘कार्यालयको गेटमा ताला लगाइएको थियो । क्वार्टरको कोठामा अध्यक्षलगायत थप पाँच जना पुरुष थिए । एक महिला थिइन्,’ उनले भने, ‘अनैतिक कार्य गरेको पुष्टि भइसकेको छैन ।’

प्रकाशित : असार २१, २०७७ १३:१८
प्रतिक्रिया
पठाउनुहोस्

जापानमा ठूलो बाढी : कम्तीमा १६ जनाको मृत्यु

एजेन्सी

टोकियो — केही दिनको भारी वर्षापछि आएको बाढीले जापानमा कम्तीमा १६ जनाको मृत्यु भएको छ । जापानको दक्षिण पश्चिमी  क्षेत्रमा आएको बाढीले एउटा नर्सिङ होम नै बगाएको जापानी सञ्चारमाध्यम एनएचकेले जनाएको छ । 

कुमा नदीमा आएको बाढीपछि जलमग्‍न जापानको कुमामोतो प्रिफेक्चरको हितोयोसी आवासीय क्षेत्र तस्बिर : रोयटर्स

एनएचकेका अनुसार जापानको कुमामोतो र कागोशिमा प्रिफेक्चरमा केही ठाउँमा बाढीले ठूलो संख्यामा घरहरु बगाएको छ । जापानी सञ्चारमाध्यमहरुका अनुसार नर्सिङ होमका १४ जनाको मृत्यु भएको छ । त्यस्तै अन्य १७ जनाको पनि मृत्यु भएको आशंका गरिएको एनएचकेले उल्लेख गरेको छ । बाढीपहिरोमा परि दर्जनौं बेपत्ता भएका छन् ।

दुई वटा प्रिफेक्चरका ७५ हजारभन्दा बढी व्यक्तिलाई उद्धार गर्नुपर्ने अवस्था रहेको जापानी अधिकारीहरुले चेतावनी दिएका छन् ।

प्रधानमन्त्री सिन्जो आबेले उद्धार र राहत कार्यमा जापान डिफेन्स फोर्सका करिब १० हजार सुरक्षाकर्मी खटिइसकेको बताएका छन् । कुमामोतोको कुमा नदीमा रहेको पुल बाढीले बगाएकाले उद्धारमा कठिनाइ भइरहेको छ ।

बाढी कारण करिब ८ हजार घरमा बत्ती नभएको पनि सञ्चारमाध्यमहरुले जनाएका छन् ।

प्रकाशित : असार २१, २०७७ १२:५३
पूरा पढ्नुहोस्
प्रतिक्रिया
पठाउनुहोस्
×