सल्यानका क्वारेन्टाइनमा बसेका ७८ जना भागे

भारतको गढुवाल र गुरजातबाट आएका नागरिकलाई ती क्वारेन्टाइनमा राखिएको थियो । क्वारेन्टाइनमा बसेका ३ जनाको आरडीटी रिपोर्ट पोजेटिभ आएपछि असार १२ गते ७४ जनाको स्वाब संकलन गरी पीसीआर परीक्षणका लागि सुर्खेत पठाइएको नगरपालिकाले जनाएको छ ।

रिपोर्ट नआउँदै क्वारेन्टाइनमा बसेकाहरु भागेपछि गाउँमा संक्रमणको जोखिम बढेको नगरपालिकाका स्वास्थ्य शाखा प्रमुख वासुदेव पोखरेलले बताए । ‘सुर्खेतमा मेसिन बिग्रिएपछि स्वाब परीक्षणका लागि नेपालगन्ज पठाइएको जानकारी आएको छ,’ उनले भने, ‘धेरै चाप भएकाले परीक्षण गर्न समय लागेको देखियो ।’

उनका अनुसार यसअघि क्वारेन्टाइनबाट भागेका १ जनालाई प्रहरीको सहयोगमा फिर्ता ल्याएर आइसोलेसनमा भर्ना गरिएको थियो ।