खानेपानी विवादमा हुम्लामा महिलामाथि खुकुरी प्रहार 

छपाल लामा

हुम्ला — सर्केगाड गाउँपालिका–४ सायामा खानेपानीको विषयमा छिमेकीबीच विवाद हुँदा एक महिलामाथि खुकुरी प्रहार भएको छ । खुकुरी प्रहारका कारण ४५ वर्षीया हजारी साउद गम्भीर घाइते भएकी छिन् । 

उनीमाथि स्थानीय नेत्र थापाले खुकुरी प्रहार गरेको प्रहरीको प्रारम्भिक अनुसन्धानबाट खुलेको छ । घाइते महिलाको साया स्वास्थ्यचौकीमा उपचार हुन नसकेपछि बाहिरका अस्पतालमा रिफर गरिएको छ । खुकुरी प्रहारका कारण टाउकोमा गम्भीर चोट लागेको उनका छोरा दन्त साउदले बताए । उनका अनुसार घटनामा सामान्य घाइते भएकी झला थापाको स्थानीय स्वास्थ्यचौकीमा उपचार भइरहेको छ ।

खुकुरी प्रहार गर्ने थापालाई नियन्त्रणमा लिइएको जिल्ला प्रहरी प्रमुख डीएसपी सूर्यप्रसाद सुवेदीले बताए । ‘घाइतेलाई हेलिकप्टरमार्फत उद्धार गरी काठमाडौं लिने तयारी भइरहेको छ,’ उनले भने, ‘घटनामा संलग्नलाई पक्राउ गरी आवश्यक अनुसन्धान सुरु गरेका छौं ।’ घटनास्थल सदरमुकाम सिमकोटबाट झण्डै डेढ दिनको पैदल दूरीमा पर्छ ।


प्रकाशित : असार १९, २०७७ १७:११
प्रतिक्रिया
पठाउनुहोस्

१ सय ४० दिनदेखि कार्यालयमा उपस्थित नभएपछि स्पष्टीकरण माग

सन्जु पौडेल

तिलोत्तमा — प्रदेश ५ को सामाजिक विकास मन्त्रालयले शुक्रबार जिल्ला अस्पताल पाल्पामा कार्यरत हेल्थ असिस्टेन्ट छविराज गिरीको नाममा ७ दिने सूचना जारी गरेको छ । १ सय ४० दिनदेखि कार्यालयको सम्पर्क बाहिर रहेका उनलाई स्पष्टिकरण पेस गर्न भनिएको छ ।


समायोजनका क्रममा जिल्ला अस्पताल पाल्पामा दरबन्दी भएका सिनियर हेल्थ असिस्टेन्ट गिरी १ सय ४० दिनदेखि कार्यालयमा उपस्थित नभएपछि उनको नाममा ७ दिने सूचना जारी भएको हो । जिल्ला अस्पताल पाल्पामा दरबन्दी रहेका गिरी गत फागुन २ गतेदेखि कार्यालयमा उपस्थित भएका छैनन् ।

आफ्नो कर्मचारी बिना सूचना लामो समयदेखि कार्यालयमा उपस्थित नभएपछि जिल्ला अस्पताल पाल्पाले प्रदेश ५ को सामाजिक विकास मन्त्रालयमा सूचना लेखेर पठाएको थियो । कर्मचारी सम्पर्कविहीन भएपछि प्रदेश ५ को सामाजिक विकास मन्त्रालयले शुक्रबार ७ दिने सूचना जारी गर्दै सेवाबाटै बर्खास्त किन नगर्ने हो सो को स्पष्टीकरण पेस गर्नु भनेको छ ।

मन्त्रालयको ७ दिने सूचनामा भनिएको छ, ‘तपाईं छविराज गिरी पाल्पा अस्पताल तानसेनको पत्र तथा दैनिक रुपमा सोही अस्पतालबाट प्राप्त हाजिरी विवरणअनुसार सम्बन्धित कार्यालयबाट बिदा स्वीकृत नगराइ मिति २०७६/ ११/०२ देखि हालसम्म पनि अस्पतालमा उपस्थित नभएको र स्वास्थ्यकर्मीहरुलाई लकडाउनको समयमासमेत अनिवार्य उपस्थितिका लागि स्वास्थ्य मन्त्रालयबाट पटकपटक भएको निर्देशन समेतलाई बेवास्ता गरेको भन्ने व्यहोरा बुझिन आएकाले नेपाल स्वास्थ्य सेवा ऐन, २०५३ को दफा ७४ बमोजिमको काम गरेकोमा तपाईंलाई नेपाल स्वास्थ्य सेवा ऐन, २०५३ को दफा ७४ बमोजिम भविष्यमा सरकारी सेवामा अयोग्य नठहरिने गरी सेवाबाट हटाउनु नपर्ने वा बर्खास्त गर्नु नपर्ने कुनै कारण भए यो सूचना प्रकाशित भएको मितिले ७ दिनभित्र यस मन्त्रालयमा स्पष्टीकरणसहित उपस्थित हुनुहोला ।’

यसअघि जिल्ला जनस्वास्थ्य कार्यालय नवलपरासीमा दरबन्दी रहेका गिरी २०७६ मंसिर २७ गते प्रादेशिक मन्त्रालयको सचिवस्तरीय निर्णयबाट जिल्ला अस्पतालमा पदस्थापन भएका थिए ।

प्रकाशित : असार १९, २०७७ १६:५८
पूरा पढ्नुहोस्
प्रतिक्रिया
पठाउनुहोस्
×