घर फर्काइएका पुरुषमा पुन: कोरोना संक्रमण

विप्लव महर्जन

सल्यान — विदेशबाट घर फर्कने क्रममा पीसीआर रिपोर्ट नेगेटिभ आएको भन्दै होम क्‍वारेन्टाइनमा बस्नका लागि घर फर्काइएका शारदा नगरपालिका १२ डाग्रीका एक पुरुषमा कोरोना संक्रमण देखिएको छ । पशुपंक्षी रोग तथा अन्वेषण प्रयोगशाला सुर्खेतमा गरिएको पीसीआर परीक्षणमा उनको रिपोर्ट पोजिटिभ देखिएको हो । 

घरमा पठाएपछि होम क्‍वारेन्टाइनमा बस्दै आएका उनलाई थप उपचारका लागि सल्यान बहुमखी क्याम्पसमा निर्माण गरिएको आइसोलेसनमा ल्याउने तयारी भइरहेको शारदा नगरपालिका सल्यानले जनाएको छ । कोरोना पोजिटिभ देखिएका पुरुषको घरमा कसैलाई नजान नगरपालिकाले स्थानीयलाई आग्रह गरेको छ । नगरपालिकाका कोरोना फोकल पर्सन रबिन विष्टले घर सिल गर्ने वा के गर्ने भन्ने विषयमा छलफल भइरहेको बताएका छन् । उनका अनुसार ओमनबाट नेपाल फर्कने क्रममा असार दुई गते सल्यान आइपुगेका ती पुरुषलाई तीन दिन लुहापिङ्गस्थित त्रिजमाविको क्‍वारेन्टाइनमा राखेर ओमनको एयरपोर्टमा गरेको रिपोर्टअनुसार घर पठाइएको बताए ।

प्रकाशित : असार १२, २०७७ १५:३८
प्रतिक्रिया
पठाउनुहोस्

क्वारेन्टाइनबाट भागेका संक्रमित खोज्न दैलेखमा प्रहरी परिचालन

ज्योति कटुवाल

दैलेख — नौमुले गाउँपालिकास्थित भैरव माध्यमिक विद्यालयको क्वारेन्टाइनमा बसेका कोरोना संक्रमितहरु भागेपछि उनीहरुलाई फर्काउन प्रहरी परिचान गरिएको छ । संक्रमितहरु बिहीबार राति भागेर गाउँतिर गएपछि शुक्रबार प्रहरी परिचालन गरिएको  हो  । उक्त क्वारेन्टाइनबाट २१ जना संक्रमति भागेका छन् ।

१२ दिन नाघिसक्दा पनि थप परीक्षण नभएको भन्दै संक्रमतिहरु क्वारेन्टाइनबाट भागेको स्थानीय नैना राना मगरले बताइन् । भैरव माध्यमिक विद्यालय नौमुले बजारमा रहेको क्वारेन्टाइनमा २ जना महिलासहित ९२ जना कोरोना संक्रमित बस्दै आएका थिए ।

‘भागेकाहरुमध्ये केहीलाई बिहीबार राति नै ल्याएको प्रहरीको भनाइ छ भने गाउँ पुगेका बाँकीलाई लिन नौमुलेबाट थप प्रहरी टोली परिचालन गरेको नौमुले प्रहरी चौकीको बतायो । संक्रमित भागेको खबर सुन्ने बित्तिकै जिल्लाबाट थप प्रहरी परिचालन गरिएको प्रहरी प्रमुख हरिबहादुर ओलील बताए । गाउँपालिकाका अध्यक्ष भदे बुढामगरले सबै संक्रमितको खोजी कार्य जारी रहेको बताए ।

प्रकाशित : असार १२, २०७७ १५:१२
पूरा पढ्नुहोस्
प्रतिक्रिया
पठाउनुहोस्
×