छायानाथरारा नगरपालिकामा ८ दिनदेखि तालाबन्दी
मुगु — छायानाथरारा नगरपालिकामा ८ दिनदेखि तालाबन्दी हुँदा प्रशासनिक र विकास निर्माणका कामकाज ठप्प भएका छन् ।
मागेअनुसार सूचना नदिएको भन्दै नेकपाका केही कार्यकर्ताले जेठ ३० गते प्रमुख प्रशासकीय अधिकृत रोमाकान्त पाण्डेयलाई दुर्व्यवहार गर्दै कार्यकक्ष तोडफोड गरेका थिए ।
घटनाको विरोधमा स्थानीय तह कर्मचारी संघले गत आइतबारदेखि नगरपालिकामा तालाबन्दी गरेको हो । घटनामा संलग्नमाथि कारबाही नभएसम्म तालाबन्दी जारी हुने संघका जिल्ला संयोजक उपरबहादुर मल्लले बताए ।
कार्यालयमा तालाबन्दी गरिएपछि प्रशासनिकसहित विकास निर्माण, योजना भुक्तानी, अनुगमन र नगर परिषद् तयारीलगायत काम प्रभावित भएका छन् । राजनीतिक पूर्वाग्रहका कारण नेकपाका कार्यकर्ताले प्रमुख प्रशासकीय अधिकृतको कार्यकक्ष तोडफोड गरेको नगरप्रमुख हरिजंग शाहीले आरोप लगाए । सहायक प्रमुख जिल्ला अधिकारी केशव ज्ञवालीका अनुसार घटनामा संलग्नको खोजी भइरहेको छ ।
प्रकाशित : असार ७, २०७७ १४:३६