सोती घटनामा थप दुई पक्राउ- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

सोती घटनामा थप दुई पक्राउ

भीमबहादुर सिंह

जाजरकोट — प्रहरीले रुकुम पश्चिमको सोती घटनामा संलग्न भएको भन्दै बुधबार भेरी नगरपालिका–४ का इन्द्रबहादुर मल्लसहित २ जनालाई पक्राउ गरेको छ । कल डिटेलका आधारमा पक्राउ गरिएका इन्द्रबहादुर सोती गाउँका मल्ल परिवारका आफन्त हुन् ।


उनको परिवार लामो समयमा भेरी नगरपालिका ४, गैरीखालीमा बसोबास गर्दै आएको छ । गत १० गते घटना हुनुअघि नवराजहरूको समूह केटी भगाउन आएको भनी इन्द्रबहादुरले फोनमार्फत सोती गाउँका मल्ल परिवारलाई सुराकी गरेको पीडित परिवारले आरोप लगाएको छ । उनले घटनाको केही दिनअघि पनि ‘तिमीलाई मल्ल ठकुरीको सम्धी बन्ने विचार छ र ?’ भनी धम्क्याएको मृतक नवराजका बाबु मुनिलालले बताए ।

इन्द्रबहादुरलाई पक्राउ गरी जिल्ला प्रहरी कार्यालय पश्चिम रुकुम पठाइएको जाजरकोट प्रहरीप्रमुख किशोरकुमार श्रेष्ठले बताए । त्यस्तै प्रहरीले उक्त घटनामा पक्राउ परेका प्रतिवादीको बयानका आधार सोतीकै अर्का व्यक्तिलाई पनि पक्राउ गरेको छ । उनको नाम खुलाइएको छैन । दुवै जनालाई अदालतबाट म्याद थप गरेर आवश्यक अनुसन्धान अघि बढाइने रुकुम प्रहरीले बताएको छ ।

प्रकाशित : जेष्ठ २८, २०७७ १३:३३
प्रतिक्रिया
पठाउनुहोस्

रुकुमको सोती घटनामा बेपत्ता भएकाको १० दिनपछि शव भेटियो, मृतकको संख्या ६ पुग्यो 

भीमबहादुर सिंह

जाजरकोट — रुकुम पश्चिमको चौरजहारी नगरपालिका ८ सोतीगाउँमा गत शनिबार भएको घटनामा बेपत्ता भएका भेरी नगरपालिका–११ मटेलाका १९ वर्षीय गोविन्द शाहीको शव फेला परेको छ । प्रहरीका अनुसार उनको शव मंगलबार भेरी नगरपालिका–१२, खोताखोलास्थित भेरी नदीमा फेला परेको हो । 

बेपत्ताको शव घटनास्थलभन्दा करिब २० किलोमिटर टाढा फेला परेको जिल्ला प्रहरी प्रमुख डीएसपी किशोरकुमार श्रेष्ठले बताए । उनका अनुसार शव पोस्टमार्टमका लागि जाजरकोट अस्पताल लगिएको छ । पोस्टमार्टम रिपोर्टपछि उनको मृत्युको कारण खुल्ने उनको भनाइ छ । स्थानीयले भने उनको हत्या गरेर नदीमा फालिएको दाबी गरेका छन् । स्थानीय छवि पन्तले मुख र टाउकोमा कपडाले बाँधेको, आँखा फुटेको तथा हात र नाक भाँचिएको अवस्थामा शव फेला परेको बताए ।

जाजरकोटबाट साथी नवराज विककी प्रेमिका भगाउन रुकुम पश्चिमको चौरजहारी पुगेका उनीसहित १९ जना सोतीगाउँका स्थानीयको आक्रमणमा परेका थिए । घटनामा यसअघि ५ जनाको मृत्यु भइसकेको छ । घटनामा संलग्न भएको भन्दै प्रहरीले ८ नम्बर वडाध्यक्ष डम्मरबहादुर मल्लसहित १८ जनालाई पक्राउ गरी अनुसन्धान थालेको छ ।

को हुन् शाही ?

१९ वर्षीय शाही भेरी नगरपालिका–११, मटेलाका इन्द्रबहादुर र भीमा कुमारीका कान्छा छोरा हुन् । उनी शीतल मावि, चौरजहारीबाट यस वर्षको एसईई परीक्षामा सहभागी हुँदै थिए । उनका बुवा इन्द्रबहादुर जाजरकोट कारागारमा कैद भुक्तान गर्दै आएका छन् । गोविन्दले एसईई उत्तीर्ण गरेर वैदेशिक रोजगारमा जाने लक्ष्य राखेका थिए । गत शनिबार साथीलाई भेट्न र काफल खान जान्छु भनी उनी घरबाट हिँडेका थिए ।


प्रकाशित : जेष्ठ २०, २०७७ १९:४९
पूरा पढ्नुहोस्
प्रतिक्रिया
पठाउनुहोस्
×