क्वारेन्टाइनबाट घर फर्किएका सुर्खेतका एक युवाको मृत्यु

कलेन्द्र सेजुवाल

वीरेन्द्रनगर — दुई सातासम्म क्वारेन्टाइन बसेर घर फर्केका एक युवाको बिहीबार बिहान मृत्यु भएको छ । पञ्चपुरी नगरपालिका–१, सानीडाँडाका २० वर्षीय युवाको बिहान करिब २ बजेतिर मृत्यु भएको हो ।

भारतको मुम्बईमा मजदुरी गर्ने उनी जेठ पहिलो साता घर फर्किएका थिए । स्थानीय सरकारले १५ दिनसम्म जनता मावि विद्यापुरको क्वारेन्टाइनमा राखेको थियो । बुधबार दिउँसो आरडीटी परीक्षण गर्दा रिपोर्ट नेगेटिभ आएपछि उनी साथीहरुसँग घरतिर लागेका थिए ।

क्वारेन्टाइनबाट ८ घण्टा पैदल हिँडेर गाउँमा पुगेका उनी घरमा नबसी नजिकैको एक सामुदायिक भवनमा बसेका थिए । पञ्चपुर–१ का वडाध्यक्ष धनबहादुर बुढाका अनुसार क्वारेन्टाइनबाट उनीसँगै गएको ६ जनाको टोलीलाई माहुरी पालन स्रोत केन्द्रको भवनमा राखिएको थियो ।

‘आरडीटी रिपोर्ट नेगेटिभ आए पनि हामीले एक हप्तासम्म होम क्वारेन्टाइनमा बस्न सल्लाह दिएका थियौं, त्यहीअनुसार घर नजिकैको भवनमा बसेका थिए,’ उनले भने, ‘राति एक्कासि उनीसँग रहेका साथीहरुले मृत्यु भएको जानकारी दिए ।’ बिहान पौने २ बजेतिर समस्या भएको भन्दै युवाहरुले खबर गरेका र आधा घण्टामा त्यहाँ पुग्दा मृत्यु भइसकेको उनले बताए ।

मृतक युवाको पीसीआर परीक्षणका लागि स्वाब संकलन गरिएको छ । स्वाब परीक्षण रिपोर्ट आएपछि दाहसंस्कार कसरी गर्ने भन्नेबारे निर्णय गरिने वडाध्यक्ष बुढाले बताए ।

प्रकाशित : जेष्ठ २२, २०७७ १२:०४
प्रतिक्रिया
पठाउनुहोस्

दुई महिनापछि हेटौंडाका तरकारी बजार खुले

सुवास विडारी

हेटौंडा — दुई महिनादेखि बन्द हेटौंडाको थोक तथा खुद्रा तरकारी बजार बिहीबारबाट सञ्चालनमा आएको छ । मकवानपुर प्रशासनले कोरोना भाइरस (कोभिड–१९) संक्रमणको डरले लकडाउनसँगै बन्द गराएको तरकारी बजार संघीय सरकारको निर्देशनमा खुलेको हो ।

विशेष गरी मकवानपुर उद्योग वाणिज्य संघले तराईबाट तरकारी ढुवानी गर्दा कोरोना संक्रमण फैलिनेभन्दै बजार बन्द गराउन प्रशासनलाई आग्रह गरेको थियो । संघीय सरकारले कृषिजन्य सामग्री ढुवानी नरोक्न परिपत्र गरेपछि प्रशासनले बाध्य भएर तरकारी बजार खोलेको हो । संघीय सरकारको निर्देशनअनुसार हेटौंडा–१० बसर्पाक र हेटौंडा–४, खोपेगल्लीस्थित तरकारी बजार बिहीबार बिहानदेखि खुलेका हुन् ।

मकवानपुरका प्रमुख जिल्ला अधिकारी दीपकराज नेपालले बिहान ६ बजेदेखि ९ बजेसम्म तरकारी बजार खोल्न अनुमति दिएको बताए । ‘कोरोना संक्रमण फैलन सक्ने अवस्थाका कारण तरकारी बजार बन्द गरिएको थियो,’ उनले भने ।

प्रशासनले हेटौंडा उपमहानगरपालिका कार्यालय र मकवानपुर उद्योग वाणिज्य संघलाई तरकारी बजारको व्यवस्थापनको जिम्मेवारी दिएको छ । नगर प्रहरी र संघका प्रतिनिधिको संयुक्त सहभागितामा तरकारी बजारलाई व्यवस्थापन गरेर सञ्चालन गरिने बताइएको छ ।

वाणिज्य संघका अध्यक्ष कृष्ण कटुवालले खोपेगल्ली र बसपार्कको तरकारी बजार उचित व्यवस्थापन गरेर सञ्चालनमा ल्याइएको बताए । उपभोक्तालाई सामाजिक दूरी कायम गराउन कडाइका साथ निगरानी गर्ने, व्यवसायी र उपभोक्तालाई स्वास्थ्य सुरक्षा सामग्री लगाउन अनिवार्य गराइने अध्यक्ष कटुवालले बताए । बसपार्क र खोपेगल्लीमा करिब एक सय तरकारी पसलहरु रहेका छन् । तरकारी बजार बन्द भएपछि सहकारीमार्फत् एकीकृत प्रणालीबाट तरकारी बिक्री वितरण हुँदै आएको थियो ।

लामो समयदेखि तरकारी बजार बन्द हुँदा मकवानपुरका तरकारी उत्पादक किसानले करोडौं घाटा बेहोर्नु परेको थियो । तरकारी उत्पादनको पकेट क्षेत्र थाहा नगरपालिका, मकवानपुरगढी र मनहरी गाउँपालिकाकाका सयौं किसानले उत्पादन गरेको तरकारी खेतमै कुहिएको छ । तरकारी बजार बन्द भएपछि कतिपय किसानले हेटौंडा बजारको फुटपाथमा राखेर तरकारी बिक्री वितरण गरेका थिए ।

प्रकाशित : जेष्ठ २२, २०७७ ११:४९
पूरा पढ्नुहोस्
प्रतिक्रिया
पठाउनुहोस्
×