बालुवाको ढिस्कोमा पुरिएर १ को मृत्यु, ३ घाइते
जाजरकोट — नलगाड नगरपालिका–९, ताँत्रगारमा बालुवाको ढिस्कोमा पुरिएर मंगलबार १ जनाको मृत्यु भएको छ । ३ जना घाइते भएका छन् । प्रहरीका अनुसार ढिस्कोले पुरिएर ताँत्रगारकी ३२ वर्षीया कुमारी सिंहको मृत्यु भएको हो । घटनामा गाउँकै एकबहादुर सिंह, कमला सिंह र तारा सिंह घाइते छन् ।
कमला र ताराको स्थानीय स्वास्थ्यचौकीमा उपचार भइरहेको छ भने सख्त घाइते एकबहादुरलाई थप उपचारका लागि जिल्ला अस्पताल ल्याइएको छ । स्वास्थ्यचौकी निर्माणका लागि बालुवा निकाल्ने क्रममा घटना भएको प्रमुख जिल्ला अधिकारी जनकराज पन्तले बताए ।
घटनाको थप अनुसन्धानका लागि प्रहरी टोली पठाइएको उनले जानकारी दिए ।
प्रतिक्रिया