दैलेखमा क्वारेन्टाइन भद्रगोल, एउटै कोठामा २५ जनासम्म

तीन दिनमा ४ हजार ५ सय नागरिक जिल्ला भित्रिए 
ज्योति कटुवाल

दैलेख — ठूलो सास्ती खेपेर भारतबाट आफ्नो जिल्ला आइपुगेका दैलेखका नागरिकले क्वारेन्टाइनमा पनि उस्तै दुःख पाएका छन् । क्वारेन्टाइनको व्यवस्थापन भद्रोगल हुँदा एउटै कोठामा २५ जनासम्म कोच्चिएर बसेका छन् । जसकारण उनीहरुलाई नै संक्रमणको जोखिम बढेको छ । 

यहाँका स्थानीय तहले एउटै कोठामा २५ जनासम्मलाई कोचाकोच गरी राखेका छन् । नारायण नगरपालिका–६ का श्याम रानाले क्यारेन्टाइनको बसाइ भद्रगोल हुँदा संक्रमणको जोखिम बढ्दै गएको गुनासो गरे । उनी बसिरहेको नारायण क्याम्पसमा १ सयजनाका लागि बेड निर्माण गरिए पनि २ सय ५० जनाभन्दा बढीलाई कोचाकोच गरी राखिएको छ । ‘क्वारेन्टाइनभित्र पनि विभेद गरिएको छ,’ उनले भने, ‘कोहीलाई आरादायी बेडमा राखिएको छ, हामी भने डेक्स र बेन्च जोडेर सुत्दै आएका छौं ।’ कति क्याम्पसको कोलिया र छतमा सुत्नसमेत बाध्य भएको उनले बताए ।

स्थानीयका अनुसार उक्त क्याम्पसमा न सुत्ने व्यवस्था राम्रो छ न खाना र शौचालयकै सुविधा गतिलो । एउटै कोठामा २० देखि २५ जनालाई सुताइँदा अन्य स्वास्थ्य समस्या संक्रमणको जोखिमसमेत बढेको स्थानीय विपिन रावलले बताए । ‘खाने र सुत्ने व्यवस्था कस्तो छ भनेर जनप्रतिनिधि सोध्नसमेत आएनन्,’ उनले भने, ‘दाल र भात पनि राम्रोसँग पाकेको हुँदैन ।’ उनले भुइँमा सुत्नुपर्ने बाध्यता रहेको सुनाए ।

नारायण नगरपालिकाका विभिन्न ठाउँमा ३ सय ४४ बेड निर्माण गरिएको छ । जिल्ला प्रशासन कार्यालयका अनुसार ११ स्थानीय तहमा ९ सय ६५ क्वारेन्टाइ निर्माण गरिएकोमा १ हजार ९ सय ९२ जनालाई राखिएको छ । त्यसमध्ये ४ सय ८६ जनाको मात्र स्वाब संकलन गरिएको छ । यसअघि १ हजार २ सय ५१ जनाको आरडीटी परीक्षण गरिएको थियो ।


दैलेख र सुर्खेतको सिमानामा स्थापना गरिएको हेल्थ डेस्कमा भारतबाट फर्किएकाको चेकजाँच गरिँदै ।

अधिकांश ठाउँमा क्याम्पस र विद्यालयलाई क्वारेन्टाइन बनाइएपछि व्यवस्थापन भद्रगोल बनेको हो । ‘हामीलाई भेडाबाख्रा जसरी कोचिएर राखिएको छ,’ सदरमुकामको क्वारेन्टाइनमा बसेका एक स्थानीयले भने, ‘बरु घरमा सुरक्षित होला, हामी सुरक्षित छैनौं ।’ भारतबाट आउनेको सख्या बढ्दै गएपछि व्यवस्थापन गर्न समस्या भएको जनप्रतिनिधिको भनाइ छ । नारायण नगरपालिका–१, का वडाध्यक्ष तीर्थनारायण श्रेष्ठले बाहिरबाट आउनेको संख्या बढ्दै गएपछि क्वारेन्टाइनमा राख्न समस्या भएको बताए ।

पहिलो चरणमा भारतबाट आएकाको व्यवस्थापन राम्रै भए पनि अहिले क्वारेन्टाइनमा राख्न समस्या भएको दुल्लु नगरपालिका प्रमुख घनश्याम भन्डारी बताउँछन् । उनका अनुसार नगरपालिकाबाट झण्डै १० हजार व्यक्ति मजदुरीका लागि भारत गएका छन् । ‘भारत गएका आधा मात्र फर्किए पनि व्यवस्थापन गर्न समस्या हुन्छ,’ उनले भने, ‘सतर्कता अपनाउँदै क्वारेन्टाइनको बसाइ व्यवस्थापन गर्न प्रयास गरिरहेका छौं ।’ उनले २ हजार थान किट खरिद गरी क्वारेन्टाइनमा बसेकाको स्वाब संकलन सुरु गरिएको जनाए ।

किट अभावले स्वाब संकलनमा समस्या

भारतमा रेलसेवा सुचारु भएपछि जिल्ला फर्कनेको संख्या बढे पनि किट र भीटीएमको अभाव हुँदा स्वाब संकलनमा समस्या भएको छ । दैनिक झण्डै १ हजार बासिन्दा दैलेख भित्रिएपछि स्वास्थ्य उपकरणको अभाव देखिएको हो ।

स्वास्थ्य सेवा कार्यालयमा तत्काल ५० आरडीटी र भीटीएम मात्र मौज्दात छ । कम्तिमा १०/१० हजार किट र भीटीएम आवश्यक परेको कार्यालयका खोप अधिकृत थीरप्रसाद रेग्मीले बताए । उनका अनुसार भारतबाट करिब २५ हजार नागरिक जिल्लामा आउने सरकारी अनुमान छ ।

प्रकाशित : जेष्ठ १२, २०७७ १५:०७
प्रतिक्रिया
पठाउनुहोस्

भद्रपुरमा कोभिड अस्पताल निर्माणमा स्थानीयको विरोध

अर्जुन राजवंशी

बिर्तामोड — झापाको भद्रपुर नगरपालिकामा कोभिड अस्पताल बनाउने विषयमा स्थानीयले विरोध जनाएका छन् । मेची अस्पतालको निर्माणाधीन भवनमा कोभिड अस्पताल बनाउन लागेको भन्दै आसपासका बासिन्दाले विरोध जनाएका हुन् ।

भद्रपुर ८ स्थित निर्माणाधीन भवन मेची अस्पताल नजिकै पर्छ । भद्रपुर ५ र ८ का जनप्रतिनिधिसहित स्थानीयले उक्त स्थानमा कोभिड अस्पताल नबनाउन आग्रह गरेका छन् । कोभिड अस्पताल बनाउँदा आसपासका स्थानीयलाई संक्रमणको जोखिम हुने उनीहरुको भनाइ छ । उक्त स्थानमा कोभिड अस्पताल बनाउन नदिने भन्दै सोमबार दुवै वडाका जनप्रतिनिधिसहितको एउटा समिति समेत गठन गरिएको छ ।

‘बस्तीको बीचमा हुने भएकाले निर्माणाधीन भवनमा कोभिड अस्पताल बनाउन उपयुक्त छैन भनेर हामीले भनिरहेका छौं,’भद्रपुर ५ का वडाध्यक्ष बन्धु कार्कीले भने । उक्त भवनमा कोभिड अस्पताल निर्माण गरिए जिल्लाको एक मात्र सरकारी अस्पताल मेची अस्पतालबाट सेवा लिने सेवाग्राही प्रभावित हुने कार्कीको भनाइ छ ।

‘कोभिड अस्पताल बनाउने भनिएको भवनबाट ५० मिटर आसपासमा मेची अस्पताल, प्रसूति गृह, क्षयरोग निवारण केन्द्र छ,’ कार्कीले भने,‘यति नजिकमा अन्य बिरामीले कसरी सेवा लिन सक्छन् ?’झापामा कोभिड अस्पताल निर्माण गर्ने निर्णय स्वागतयोग्य भएपनि स्थान छनोट उचित नभएको उनको जिकिर छ ।

भद्रपुर ८ का वडाध्यक्ष मनोज सुब्बाले स्थानीय जनप्रतिनिधिसंग समन्वय नै नगरि निर्णय गरेकाले विवाद सिर्जना भएको तर्क गरे । उनले स्थानीयको विरोधकाबीच मेची अस्पतालमा कोभिड अस्पताल बनाउन नहुने सुझाए । असन्तुष्ट स्थानीयको सोमबार बिहान भएको छलफलबाट जिल्ला सम्वन्य समिति, जिल्ला प्रशासनलगायतसंग संवाद गर्न स्थानीय भक्त खवासको संयोजकत्वमा एक समिति गठन गरेको सुब्बाले बताए ।

जिल्ला कोरोना भाइरस संक्रमण रोकथाम, अनुगमन तथा समन्वय समितिका संयोजक सोमनाथ पोर्तेलले कोभिड अस्पतालका लागि मेची अस्पतालको निर्माणाधीन भवन उपयुक्त स्थान भएको दाबी गरे । उनले कोरोना संक्रमण भएकाको उपचार गर्ने अस्पताल बनाउन लागेकाले अस्पतालबाटै अन्यलाई संक्रमण फैलिन्छ भन्ने तर्क उचित नभएको बताए ।

‘अस्पतालबाट अन्यलाई संक्रमण फैलिन्छ भन्ने तर्क आधारहीन छ । अस्पतालका लागि चाहिने पूर्वाधार निर्माणाधीन भवनमा पर्याप्त छ,’पोर्तेलले भने,‘यत्तिको पूर्वाधार अर्को ठाउँमा छैन । सम्भावित सबै ठाउँको स्थलगत अवलोकनपछि नै उक्त स्थान छनोट गरेका हौं ।’ उनले असन्तुष्ट पक्षसंग छलफलमार्फत समस्या समाधान गर्ने बताए ।

समन्वय समितिको नेतृत्वमा मेची अस्पतालको निर्माणाधीन भवनमा कोभिड अस्पताल बनाउने निर्णय भएको हो । प्रदेश सरकारको लगानीमा उक्त भवनमा १० वटा भेन्टिलेटरसहित एक सय शय्याको कोभिड अस्पताल बनाउने प्रक्रिया अघि बढाएको संयोजक पोर्तेलले जानकारी दिए । मेची अस्पताल नजिकैको जिल्ला स्वास्थ्य कार्यालयको तालिम केन्द्रमा पीसीआर परीक्षण गर्ने प्रयोगशाला पनि बनाउने निर्णय भएको पोर्तेलले बताए । पीसीआर प्रयोगशालासहितको कोभिड अस्पताल जेठ मसान्तभित्र निर्माण सम्पन्न गर्नेगरि प्रक्रिया अघि बढाएको उनले बताए ।

जिल्लाको चार वटा पालिकामा कोभिड–१९ संक्रमण पुष्टि भएको छ । सोमबार अपरान्हसम्म जिल्लामा ३७ जनामा संक्रमण पुष्टि भएको हो । यो संख्या प्रदेश १ मै सबैभन्दा बढी हो ।

कचनकवल गाउँपालिकामा ३३, बाह्रदशी गाउँपालिकामा २ तथा दमक नगरपालिका र झापा गाउँपालिकामा एक/एक जनामा संक्रमण पुष्टि भएको हो । दमक र बाह्रदशीका गरि दुई जना उपचारपछि घर फर्किसकेका छन् भने अन्यका बिराटनगर र धरानस्थित कोभिड अस्पतालमा उपचार भइरहेको छ ।

प्रकाशित : जेष्ठ १२, २०७७ १४:५७
पूरा पढ्नुहोस्
प्रतिक्रिया
पठाउनुहोस्
×