काठमाडौंबाहिर सबैभन्दा बढी पीसीआर परीक्षण जुम्लामा

एलपी देवकोटा

जुम्ला — कर्णाली स्वास्थ्य विज्ञान प्रतिष्ठानले पछिल्लो समय कोरोना भाइरसको संक्रमण भए नभएको थाहा पाउनको लागि पीसीआर परीक्षणको दायरा बढाउँदै लगेको छ । स्वास्थ्य मन्त्रालयका अनुसार काठमाडौंपछि सबैभन्दा बढी परीक्षण जुम्लामा भएको छ ।

मन्त्रालयले शनिबार सार्वजनिक गरेको तथ्यांकअनुसार काठमाडौंस्थित राष्ट्रिय जनस्वास्थ्य प्रयोगशाला र शुक्रराज ट्रपिकल तथा सरुवा रोग अस्पतालमा २१ हजार २ सय ९५ जनाको पीसीआर भएको छ । त्यसपछि जुम्लामा २ हजार ७ सय ५५ जनाको पीसीआर भएको छ । तेस्रो स्थानमा भेरी अञ्चल अस्पताल नेपालगन्जमा २ हजार ३ सय ७९ जनाको पीसीआर भएको मन्त्रालयले सार्वजनिक गरेको विवरणमा उल्लेख छ । कर्णाली प्रदेशकै सुर्खेतमा भने २ हजार २ सय २ सय ९४ जनाको पीसीआर भएको छ ।

जुम्लामा वैशाख २२ गतेदेखि पीसीआर परीक्षण सुरु गरिएको थियो । प्रतिष्ठानले माथिल्लो कर्णालीका पाँच जिल्ला जुम्ला, हुम्ला, डोल्पा, मुगु र कालीकोटमा परीक्षण गर्दै आएको छ । प्रतिष्ठानका रजिष्ट्रार विश्वराज काफ्लेले भारतबाट आएका र शंकास्पद व्यक्तिको पीसीआर परीक्षण गरिएको बताए । उनका अनुसार आइतबारसम्म २ हजार ७ सय ६० जनाको परीक्षण सकिएको छ । सबैको नतिजा नेगेटिभ आएको उनले बताए । प्रतिष्ठानले ल्याव इन्जार्ज विवेक पुनको नेतृत्वमा परीक्षण कार्य गरिरहेको छ ।

हुम्ला र मुगुमा आरडीटी परीक्षण पोजेटिभ देखिएका तीन जनाको पीसीआर रिपोर्ट नेगेटिभ आएको छ । प्रतिष्ठानका अनुसार हुम्ला नाम्खाका २ जना र मुगु खत्याडका १ जनाको आरडीटी पोजिटिभ देखिएको थियो ।

पूर्वाधार र जनशक्तिले सहज

कर्णाली स्वास्थ्य विज्ञान प्रतिष्ठान (शिक्षण अस्पताल) मा कोरोना भाइरस परीक्षणका लागि पीसीआर मेसिनमा काम गर्ने दक्ष जनशक्तिका कारण परीक्षणमा सहज भएको छ । प्रतिष्ठानमा कार्यरत औषधि विज्ञानका चिकित्सक डा. विजय अर्यालयले पीसीआर मेसिनको बारेमा पहिल्यै अध्ययन गरेको र प्रतिष्ठानका शिक्षाध्यक्ष डा. निरेश थापाले चीनमा यसअघि नै उक्त मेसिनमा काम गरिरहेको हुनाले पनि परीक्षणमा सहज भएको रजिष्ट्रार काफ्लेले बताए ।

जुम्लामा अहिले कोरोना भाइरसको परीक्षणका लागि अत्याधुनिक ल्याबमा दुईजना चिकित्सकसहित प्रयोगशालाका ४ जना प्राविधिक छन् । प्रयोगशालामा पीसीआर सञ्चालन हुनुअघि प्रयोगशाला इन्चार्ज पुनले सुर्खेत प्रादेशिक अस्पतालमा गएर मेसिन सञ्चालनका लागि तालिमसमेत लिएका थिए ।

रजिष्ट्रार काफ्लेले माथिल्लो कर्णालीमा परीक्षणको दायरा अझै बढाउने बताए । उनका अनुसार प्रतिष्ठान आफैले थप २ हजार भीटीएम किट खरिद गरिसकेको छ । ती भीटीएम मंगलबारसम्म जुम्ला पुग्ने उनले बताए । प्रतिष्ठानले कर्णाली प्रदेश सरकारको सहयोगमा हेलिकोप्टर प्रयोग गरी हुम्ला, डोल्पा र मुगुमा स्वाब संकलन कार्य गर्ने गरेको छ । मेडिकल मार्चअन्तर्गत चिकित्सकसहित स्वास्थ्यकर्मीको टोली पनि ग्रामीण क्षेत्रमा खटिएको रजिष्ट्रार काफ्लेले बताए ।

अहिलेसम्म कहाँ कति पीसीआर परीक्षण ?


प्रकाशित : जेष्ठ ११, २०७७ १२:०५
प्रतिक्रिया
पठाउनुहोस्

दिल्ली सरकारको विज्ञापनमा सिक्किमलाई अलग देशका रुपमा उल्लेख गरिएपछि...

सुरेशराज न्यौपाने

नयाँदिल्ली — भारतको दिल्ली राज्य सरकारले बिहीबार निकालेको एउटा विज्ञापनमा सिक्किमलाई नेपाल र भुटानजस्तै बेग्लै मुलुकका रुपमा उल्लेख गरिएको विषयलाई लिएर बबाल मच्चिएको छ । दिल्ली सरकारअन्तर्गत सिभिल डिफेन्स कर्पले स्वयंसेवकका लागि विज्ञापन गरेको थियो ।

उक्त विज्ञापनमा आवेदनका लागि आवश्यक पर्ने पूर्वयोग्यतामा भारतीय नागरिक वा सिक्किम, भुटान वा नेपालको नागरिक र दिल्लीको बासिन्दा हुनुपर्ने उल्लेख थियो । विज्ञापनमा सिक्किमलाई भुटान र नेपालजस्तै बेग्लै मुलुकका रुपमा उल्लेख गरिएका कारण दिल्ली सरकारको व्यापक आलोचना भएको छ । विज्ञापनलाई लिएर विवाद चर्किँदै गएपछि दिल्ली सरकारले जिम्मेवार अधिकारीलाई निलम्बनसमेत गरेको छ ।

उक्त विज्ञापन प्रकाशित भएपछि सिक्किम सरकारले तत्काल आपत्ति जनाउँदै त्यसबाट अत्यन्त चोट पुगेको भन्दै त्यसलाई तत्काल हटाउन माग गरेको थियो । सिक्किम सरकारका मुख्यसचिव एससी गुप्ताले दिल्ली सरकारलाई पत्र लेख्दै सिक्किमका जनताले भारतीय नागरिक भएकोमा गर्व गर्ने गरेको भन्दै विज्ञापनले उनीहरुलाई अत्यन्त चोट पुगेको जनाएका थिए । ‘१६ मे १९७५ मा भारतको २२ औं राज्यका रहँदै आएका सिक्किमका जनताका जसले महान भारतको नागरिक हुनुमा गर्व गर्छन् । यो विज्ञापनले उनीहरुलाई अत्यन्त चोट पुऱ्याएको छ त्यसैले उक्त विज्ञापन फिर्ता गर्न अनुरोध गर्छौं,’ पत्रमा लेखिएको थियो । साथै सिक्किमका मुख्यमन्त्री प्रेमसिहं तामाङ (गोले)ले पनि विज्ञापनमा भएको गल्ती भत्सर्नायोग्य भएको भन्दै त्यसलाई खारेज गर्न माग गरेका थिए ।

विज्ञापनलाई लिएर विवाद सिर्जना भएपछि दिल्लीका मुख्यमन्त्री अरविन्द केजरीवालले ट्वीटमार्फत् विज्ञापनलाई हटाइएको र जिम्मेवार अधिकारीलाई निलम्बन गरिएको बताएका छन् । ‘सिक्किम भारतको अभिन्न अंग हो । यस्ता त्रुटि सहन सकिँदैन । विज्ञापन हटाइएको छ र जिम्मेवार अधिकारीमाथि कारबाही गरिएको छ,’ केजरीवालले ट्वीटमा भनेका छन् । विज्ञापनलाई लिएर दिल्लीका उपराज्यपाल अनिल बैजलले पनि ट्वीट गर्दै विज्ञापनलाई तत्कालै रोक्नुपर्ने र त्यसले भारतको भौगोलिक अखण्डताको अपमान गरेको भन्दै असन्तुष्टि व्यक्त गरेका थिए ।

साथै भारतीय जनता पार्टीले अरविन्द केजरीवाल नेतृत्वको दिल्ली सरकारले सार्वजनिक रुपमा माफी माग्नुपर्ने माग गरेको थियो । त्यसको जवाफमा केजरीवाल नेतृत्वको आम आद्मी पार्टीले दिल्ली सरकार अहिलेको कठिन परिस्थितिमा अन्य राज्यहरुसँग मिलेर काम गर्न चाहेको तर भाजपा र कांग्रेस राजनीति गर्न व्यस्त रहेको आरोप लगाएको थियो ।

प्रकाशित : जेष्ठ ११, २०७७ ११:४५
पूरा पढ्नुहोस्
प्रतिक्रिया
पठाउनुहोस्
×