अलपत्र झण्डै ९ सय हुम्लावासीको उद्धार

अहिलेसम्म नाम्खाका ५६, सिमकोटका २२, खार्पुनाथका ४९ र सर्केगाडका ४ जनालाई हुम्ला ल्याइएको सिमकोट गाउँपालिकाले जनाएको छ । गाउँपालिका अध्यक्ष पदमबहादुर लामाका अनुसार अध्ययन, व्यवसाय र मजदुरीका लागि विभिन्न जिल्लामा रहेका जिल्लावासीलाई गाडीबाट सुर्खेत र नेपालगन्ज पुर्‍याइएको थियो । सडक सुविधा नभएकाले सबैलाई निजी जहाज चार्टर गरी उद्धार गर्न थालिएको उनले बताए । आइतबार ३ सय ५२ जनालाई उद्धार गरिएको उनले जानकारी दिए । उनका अनुसार अलपत्र यात्रुलाई सीता, तारा र समिट एयरलाइन्सले हुम्ला ल्याइरहेका छन् । यसअघि विभिन्न ठाउँमा अलपत्र परेका ३ सय जनालाई उद्धार गरिएको थियो ।

लकडाउनका कारण विभिन्न जिल्लामा अलपत्र परेका स्थानीयवासी हुम्ला विमानस्थलमा । तस्बिर : छपाल लामा/कान्तिपुर