जहाँ लकडाउनमै पनि विद्यालयको पढाइ जारी छ

हुम्लामा फागुनदेखि नयाँ शैक्षिक सत्र सुरु हुन्छ । फागुन पहिलो साता विद्यालय खुल्नुपर्ने भए पनि बाक्लो हिमपातका कारण लिमीमा चैतमा मात्र विद्यालय खुलेको स्थानीय शिक्षक छिरिङमेन्डाक लामाले बताए । उनका अनुसार गाउँमा कोरोना भाइरसको जोखिम र लकडाउनको प्रभाव छैन । ‘विद्यालय बन्द गरे कोर्स पूरा नहुने देखियो,’ उनले भने, ‘त्यसैले लकडाउनमा पनि पठनपाठन सञ्चालन गरेका हौं ।’ उनका अनुसार अहिले लिमीका विद्यालयमा नेपालीसँगै तिब्बती भाषामा पठनपाठन भइरहेको छ ।

लिमीको सुनखानी प्राथमिक विद्यालयमा यस वर्ष ४५ विद्यार्थी भर्ना भएका छन् । हिमपातका कारण लिमी जाने बाटो अहिले पनि बन्द छ । बाहिरका शिक्षक आउने बाटो बन्द भएकाले स्थानीय शिक्षकबाट पठनपाठन गराइरहेको विद्यालयका प्रधानाध्यापक कर्णजीत बुढाले बताए । ‘लिमी आउने नारा र न्यालु नाका हिमपातका कारण अझै बन्द छन्,’ उनले भने, ‘सरकारी दरबन्दीका शिक्षक जिल्लाबाहिरका भएकाले स्थानीय शिक्षकबाटै पठनपाठन गराइरहेका हौं ।’ लकडाउन अवधिभरि विद्यालय व्यवस्थापन समिति र अभिभावकले विद्यार्थीका लागि दिवा खाजाको व्यवस्था मिलाएको उनले जानकारी दिए ।

हिमपातकै कारण बाहिरका मानिस आउन नसक्ने भएकाले लिमीमा कोरोना भाइरस संक्रमणको जोखिम नरहेको ६ नम्बर वडाध्यक्ष पालजोर तामाङले दाबी गरे । शिक्षा विकास तथा समन्वय इकाइ प्रमुख विष्णु शाहीका अनुसार लिमीमा अहिले निजी स्रोतका शिक्षकबाट पठनपाठन भइरहेको छ । सदरमुकाम सिमकोटबाट लिमी पुग्न चार दिनको पैदल दूरी छ ।