एकै व्यक्तिद्वारा सबै वडावासीलाई निःशुल्क मास्क, गाउँपालिकालाई स्वास्थ्य सामग्री 

हरि गौतम

रुकुम पश्चिम — बाँफिकोट गाउँपालिका–१० का सबै बासिन्दालाई सोही ठाउँका हरि चन्दले निःशुल्क सर्जिकल मास्क वितरण गरेका छन्। कोरोना भाइरसको संक्रमणको रोकथाम र स्वास्थ्य सुरक्षाका लागि भन्दै वडाभरका एक हजार ७ सय जनालाई चन्दले मास्क वितरण गरेका हुन्।

पहिलो चरणमा एक हजार ३ सय र दोस्रो चरणमा ५ सय मास्क वडा कार्यालयमार्फत वितरण गरिएको चन्दले बताए। काठमाडौंबाट मास्क किनेर पठाइदिएपछि वडा कार्यालयमार्फत वितरण गरिएको वडाध्यक्ष अर्जुन चन्दले बताए।


मास्क वितरण गर्ने चन्दले नै बाँफिकोट गाउँपालिकालाई स्वास्थ्य सामग्री पनि सहयोग गरेका छन्। उनले ७२ हजार मूल्य बराबरका स्वास्थ्य सामग्री प्रदान गरेको गाउँपालिकाले जनाएको छ।


स्वास्थ्य शाखाका अहेब सुनिल केसीका अनुसार चन्दले ४ वटा इन्फ्रारेड थर्मोमिटर र ३० थान एन९५ मास्क सहयोग गरेका हुन्। मंगलबार गाउँपालिकामा सांसद जनार्दन शर्मामार्फत तीन वटा इन्फ्रारेड थर्मोमिटर प्राप्त भएको थियो। गाउँपालिकाका १० वटै वडा स्वास्थ्य संस्था तथा गाउँपालिका प्रवेश गर्ने नाकामा हेल्थ डेस्क राखिएको छ।

प्रकाशित : चैत्र २६, २०७६ १८:४०
प्रतिक्रिया
पठाउनुहोस्

कोरोना संक्रमितको सम्पर्कमा रहेका ४२ जनाको पहिचान

अर्जुन शाह

धनगढी — सुदूरपश्चिममा देखिएका चार जना कोरोना भाइरस संक्रमितको प्रत्यक्ष सम्पर्कमा रहेकाको ‘कन्ट्याक्ट ट्रेसिङ’ कार्य सम्पन्न भएको छ । ४२ जनाको पहिचान गरी उनीहरुमध्ये धेरैको स्वाब परीक्षण गरिएको र कतिपयलाई निगरानीमै राखिएको संलग्न स्वास्थ्यकर्मीले बताएका छन् ।

संक्रमितमध्ये कैलालीका तीन र कञ्चनपुरका एक जना हुन् । ती मध्ये एकै परिवारका दुई जना रहेका छन् । प्रदेश स्तरमा स्वास्थ्यकर्मीहरुको दुई वटा समिति परिचालित छन् ।

पहिलो केस इन्भेस्टिगेसन समिति र दोस्रो कन्ट्याक्ट ट्रेसिङ । कुनै पनि व्यक्ति पोजेटिभ देखिने वित्तिकै केस इन्भेस्टिगेसनका प्रतिनिधिहरुले संक्रमितको विस्तृत विवरण संकलन गर्छन् । ‘विश्व स्वास्थ्य संगठनले बनाएको मापदण्ड अनुसार संक्रमितको सबै विवरण लिन्छौं,’ त्यस कार्यमा खटिएका जनस्वास्थ्य निरीक्षक भुपेन्द्र महराले भने, ‘उसको ट्राभेल हिस्ट्रि, सम्पर्क भएको स्थान र व्यक्तिहरु सबै रेकर्ड संकलन हुन्छ ।’

केस इन्भेस्टिगेसन फर्मकै आधारमा कन्ट्याक्ट ट्रेसिङ सुरु हुन्छ । ६ जना स्वास्थ्यकर्मीको समूह यस कार्यमा खटिएको छ । ‘केस इन्भेस्टिगेशनमा आएको सूचनाका आधारमा सम्बन्धित सबै व्यक्ति र स्थानसम्म पुग्छौं र उनीहरुको परीक्षण लगायतका कामहरु अघि बढाउछौं’ यस कार्यको नेतृत्व गरिरहेका भेक्टर कन्ट्रोल निरीक्षक हेमराज जोशीले भने, ‘शनिबार पहिचान भएका कैलालीका संक्रमित व्यक्ति गौरिफन्टा नाकामा ९९९ जनाको भीडमा थिए । त्यसमा अप्ठेरो छ । तर उनी घर गएको र क्वारेन्टाइनमा बसेको सबै विवरण र उनीहरुको नमुना परीक्षण प्रकृया सुरु भएको छ ।’ उनले संक्रमितको प्रत्यक्ष सम्पर्कमा आएका ४२ जनाको कन्ट्याक्ट ट्र्रेसिङ कार्य पुरा भएको बताए ।

सुदूरपश्चिम कोरोना संक्रमणको उच्च जोखिममा भएसँगै यहाँ देखिएका संक्रमितहरुको सम्पर्कमा गएकाहरुको चाँडोभन्दा चाँडो ल्याब परीक्षण गर्नुपर्ने आवश्यकता रहेको स्वास्थ्यकर्मीहरु औल्याउँछन् । त्यसैमा स्थानीय स्तरमै एकबाट अर्कोमा सरको पहिलो केस फेला परिसकेकाले जोखिम बढेको हो । आशंका निरुपण गर्न धेरैेभन्दा धेरैको नमुना परीक्षण गर्नुपर्ने आवश्यकता रहेको उनीहरुको भनाई छ ।

प्रकाशित : चैत्र २६, २०७६ १८:२७
पूरा पढ्नुहोस्
प्रतिक्रिया
पठाउनुहोस्
×