दमाहा बजाएर कोरोनाविरुद्ध अभियान

भारतबाट लुकीछिपी गाउँ पस्ने क्रम नरोकिएपछि पलाता गाउँपालिकाले घाटपारि चौरपुलमा फलामे बार लगाएको छ
तुलाराम पाण्डे

कालीकोट — लकडाउन कार्यान्वयन गर्न रास्कोट नगरपालिकाले प्रत्येक दिन दुईपटक दमाहा बजाएर स्थानीयलाई घरभित्रै बस्न सूचना गर्न थालेको छ। नगरपालिकाले कोरोना संक्रमण रोकथामका लागि बाहिरबाट आउनेलाई प्रवेश निषेध गरेको छ भने गाउँगाउँमा स्वास्थ्यकर्मी परिचालित छन्।

नगरका सबै वडामा दमाहा बजाएर घरभित्र बस्न गरिएको आग्रह प्रभावकारी बनेको नगरप्रमुख काशीचन्द्र बरालले बताए। उनले रास्कोट छिर्ने सान्नीगाड, तितेछहरा, मुम्रा, फुगाड, चुत्तीकोटसहित ९ नाकामा रास्कोट श्रम रोजगार बैंकका सदस्य खटाएर आवातजावतमा रोक लगाएको जनाए।


भारतबाट लुकीछिपी गाउँ पस्ने क्रम नरोकिएपछि पलाता गाउँपालिकाले घाटपारि चौरपुलमा फलामे बार लगाएको छ। एक साताअघि भारतबाट आएका १२ जनालाई चौर क्वारेन्टाइनमा राखिए पनि भागेपछि आवागमन रोकिएको हो।


यस्तै गाउँपालिका अध्यक्ष लक्ष्मणबहादुर बमले आपतकालीन कोषका लागि ६० लाख रुपैयाँ विनियोजन गरिएको बताए। हाल तिलागुफामा २१ जनालाई क्वारेन्टाइनमा राखिएको छ।


जिल्ला विपद् व्यवस्थापन समितिका अनुसार दहीखोला हेल्थ डेस्कमा स्वास्थ्य परीक्षण गरी ४ हजार ९ सय ९१ जना कालीकोट आएका छन्। जिल्ला अस्पतालमा ४, नरहरिनाथको कुमागाउँमा ५, रास्कोटमा ४ र ओदामा २ गरी १५ वटा आइसोलेसन बेड निर्माण गरिएको समितिले जनाएको छ।


७५ वटा स्थानमा ६ सय ९१ वटा क्वारेन्टाइन निर्माण गरिएको प्रजिअ पौडेलले बताए। उनका अनुसार सोमबारसम्म १ सय ७६ जनालाई क्वारेन्टाइनमा राखिएको थियो। जसमध्ये १ सय ४७ जना डिस्चार्ज भइसकेका छन् भने २९ जना अझै क्वारेन्टाइनमा छन्।


सोमबार स्वास्थ्य सेवा कार्यालयले कतारबाट आएका ३, दुबई र कैलालीबाट आएका १/१ गरी ५ जनाको स्वाब परीक्षणका लागि प्रदेश अस्पताल सुर्खेत पठाएको छ। सान्नी त्रिवेणका ४ र शुभकालिकाका १ जनाको स्वाब परीक्षणका लागि पठाइएको हो।


लकडाउन उल्लंघनको आरोप


कर्णाली प्रदेशका आन्तरिक मामिला तथा कानुनमन्त्री नरेश भण्डारीको उपस्थितिमा सबै स्थानीय तहले कोरानाविरुद्ध कार्यान्वयन गरिएका कामबारे छलफल गरेका छन्। जिल्ला समन्वय समितिले आयोजना गरेको सर्वदलीय बैठकमा कांग्रेस नेता दमनबहादुर शाहीले जनप्रतिनिधिबाटै लकडाउनको उल्लंघन भएको आरोप लगाए।


नेकपा सचिव नगिन्द्र शाहीले राहत वितरणमा अनियमितता हुन थालेको बताए। भारतलगायत देशबाट आउनेबाट कोरोनाको जोखिम भएको भन्दै सरोकारवालाले कर्णाली आउनेलाई सुर्खेतमै कडाइ गर्नुपर्ने सुझाव दिए।


जिल्ला विपद् व्यवस्थापन समितिको पहलमा चैत्र १० गतेबाट दहीखोलामा स्थापना गरिएको हेल्थ डेस्क पालिकास्तरमा सञ्चालन गर्ने र कर्णाली प्रदेश सरकारबाट प्राप्त ५० लाख रुपैयाँ जिल्ला विपद् व्यवस्थापन कोषमा जम्मा गर्ने निर्णय भएको छ। जिल्लाभर निर्माण भएका क्वारेन्टाइन स्तरीय नभएकाले गुणस्तर सुधार गर्ने र लकडाउनलाई थप प्रभावकारी बनाउने निर्णय गरिएको प्रमुख जिल्ला अधिकारी कृष्णचन्द्र पौडेलले बताए।

प्रकाशित : चैत्र २५, २०७६ १९:३२

ADVERTISEMENT
प्रतिक्रिया
पठाउनुहोस्

‘लकडाउन’ उल्लंघन गरेपछि न्युजिल्यान्डका स्वास्थ्यमन्त्री कारबाहीमा परे

नारायण खड्का

अस्ट्रेलिया — सरकारले घोषणा गरेको लकडाउन उल्लंघन गरेपछि न्युजिल्यान्डका स्वास्थ्यमन्त्री डेभिड क्लार्कको वरियतामा घटुवा गरिएको छ । 

क्लार्कले लकडाउनको समयमा परिवारका सदस्यसहितगाडी कुदाएर२० किलोमिटर पर रहेको सामुद्रिक किनारमा गएको स्वीकार्दै प्रधानमन्त्री जसिन्था आर्डनसमक्ष राजीनामा बुझाएका थिए । गल्ती महसुस गर्दै नैतिकताका आधारमा राजीनामा दिए पनि आर्डनले क्लार्कको राजीनामा स्वीकृत नगरी वरियता क्रम घटुवा गरेकी हुन् ।

सामान्य अवस्थामा भए उनको पद बर्खास्त हुने बताउँदै आर्डनले कोभिड–१९ का कारण सिर्जित कठिन अवस्थामा पदमुक्त गर्दा स्वास्थ्य क्षेत्रमा ठूलो अवरोध आउन सक्ने भएकाले राजीनामा अस्वीकृत गरिएको बताएकी छन् । क्लार्कलाई दिइएको सहायक अर्थमन्त्रीको जिम्मेवारी पनि खोसिएको छ ।
रेडियो न्युजिल्यान्डका अनुसार क्लार्कले प्रधानमन्त्रीसमक्षआफूले गरेको गल्तीप्रति क्षमायाचना सहित राजीनामा प्रस्तुत गरेका थिए ।लकडाउन अवधिभर जनताले घरमै बसेर त्याग गरिरहेकै समयमा मन्त्रीका रूपमा आफूले उदाहरणीय बनेर देखाउनु पर्नेमा त्यस्तो गर्न नसकेको उनले बताएका थिए ।

आफैंलाई ‘मूर्ख’ भन्दै सबैसँग माफी मागेका उनले आफ्नो व्यवहारले न्युजिल्यान्डका जनता दुःखी भएको र जनआक्रोश जायज भएको प्रधानमन्त्री आर्डनसमक्ष बताएका थिए । ‘स्वास्थ्यमन्त्रीको रूपमा सरकारको नियम पालना गर्ने मात्र नभई सबैको लागि उदाहरण बन्नुपर्नेमा मैले मूर्खतापूर्ण काम गरें,’ उनको भनाई उद्धृत गर्दै स्थानीय समाचारमाध्यमलेजनाएका छन् ।

सरकारले घोषणा गरेको चौथो तहको निर्देशनको उल्लंघन गर्दै स्वास्थ्यमन्त्री क्लार्क परिवारसहित स्थानीय डक्टर्स पोइन्ट सामुद्रिक तट गएका थिए । न्युजिल्यान्डमा चौथो तहको निर्देशनअन्तर्गत अत्यावश्यक कामबाहेक घरबााहिर ननिस्कन तथा आइलोलेसन बस्न भनिएको छ ।

न्युजिल्यान्डस्थित नेपाल सोसाइटीका अध्यक्ष दिनेश खड्काले नियम र प्रक्रियामा चलेको देश भएकाले समेत स्वास्थ्यमन्त्रीले आफूले गरेको सानो गल्तीको ठूलो सजाय पाएको बताए । ‘देश नियम र कानुनमा चल्छ र ठूला नेताले नैतिकतालाई आत्मसात गर्नसक्नुपर्छ भन्ने यो दरिलो उदाहरण हो,’ उनले भने ।

प्रकाशित : चैत्र २५, २०७६ १९:१९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×