चौरजहारीमा कोरोना अस्थायी अस्पताल

हरि गौतम

रुकुम पश्चिम — कोरोना भाइरस रोग (कोभिड–१९) संक्रमितको उपचारका लागि चौरजहारीमा अस्थायी अस्पताल निर्माण गरिएको छ । चौरजहारी अस्पतालको प्रत्यक्ष निगरानीमा सञ्चालन हुने गरी चौरजहारी नगरपालिका–२, स्थित शीतल माध्यमिक विद्यालयमा अस्थायी अस्पताल बनाइएको हो । 

विद्यालयमा एकपटकमा २० जनाको उपचार गर्ने गरी आइसोलेसन बेड बनाइएको छ । चौरजहारी अस्पतालले पनि छुट्टै चार बेडको आइसोलेसन वार्ड तयार गरेको छ । अस्पताललाई कर्णाली प्रदेश सरकारले ५० लाख रुपैयाँ दिने निर्णय गरेको छ ।


चौरजहारी अस्पतालका प्रशासक डिलबहादुर गिरीले कोरोना संक्रमितको उपचारका लागि आवश्यक तयारी पूरा भएको बताए । ‘अरू विरामीलाई असर नपरोस् भनेर छुट्टै आइसोलेसन वार्ड तयार गरेका छौं,’ उनले भने, ‘आवश्यक जनशक्ति व्यवस्थापनको काम पनि भइरहेको छ ।’ आइसोलेसनमा चिकित्सकसहित चारवटा टोली परिचालन गर्ने अस्पतालको तयारी छ ।


आइसोलेसनका लागि आवश्यक अरू उपकरण जुटाइएको छ भने अक्सिजनका लागि ३ मेसिन आउँदै छन् । शीतल माविको अर्को भवनमा चौरजहारी नगरपालिकाले २० बेडको क्वारेन्टाइन बनाएको छ । क्वारेन्टाइनमा १४ जना बसिरहेका छन् । सुरुमा १९ जनालाई राखिएकोमा १४ दिन पुगेपछि केहीलाई घर पठाइएको छ । तर, क्वारेन्टाइनमा बसेका कसैको पनि पनि स्वाब परीक्षण गरिएको छैन ।



चौरजहारी अस्पतालमा दुई विशेषज्ञसहित ६ चिकित्सक र ९८ स्वास्थ्यकर्मी छन् ।आइसोलेसनका लागि प्रदेश सरकारसँग थप चिकित्सक माग गरिएको चौरजहारी नगरपालिकाका निमित्त प्रमुख प्रशासकीय अधिकृत रामबहादुर केसीले बताए । उनका अनुसार दुई चिकित्सक प्रदेश सरकारले पठाउने तयारी गरेको छ । जिल्ला अस्पतालमा पनि पाँच शय्याको आइसोलेसन तयार गरिएको छ ।


जिल्लाभरि ४० जना क्वारेन्टाइनमा छन् । त्रिवेणी गाउँपालिकाको क्वारेन्टाइनमा १९ र मुसीकोट नगरपालिकाको क्वारेन्टाइनमा ७ जनालाई राखिएको जिल्ला जनस्वास्थ्य कार्यालयले जनाएको छ ।

प्रकाशित : चैत्र २०, २०७६ ११:४३
ADVERTISEMENT
प्रतिक्रिया
पठाउनुहोस्
ADVERTISEMENT

बलात्कारको आरोपमा पक्राउ परेका व्यक्तिद्वारा हिरासतमा आत्महत्या

मनोज पौडेल

कपिलवस्तु — छोरी बलात्कार गरेको आरोपमा पक्राउ परेका एक व्यक्तिले प्रहरी हिरासतमा आत्महत्या गरेका छन् । वाणगंगा नगरपालिकाका ३८ वर्षीय थुनुवाले इलाका प्रहरी कार्यालय, पिपराको हिरासतमा आत्यमहत्या गरेका छन् ।

ती व्यक्तिले बिहीबार बिहान करिब सवा ७ बजे हिरासतको बाथरुमको शौचालयको भेन्टिलेसनमा तन्‍ना प्रयोग गरेर आत्महत्या गरेको प्रहरीले जनाएको छ ।

अर्का थुनुवा शौचालय जान खोज्दा ढोका नखुलेपछि उनले ढोकामाथि रहेको प्वालबाट हेर्दा मान्छे झुण्डिएको देखेका थिए । त्यसपछि प्रहरीलाई खबर गरेका थिए । त्यसपछि बिहीबार बिहान घटना बाहिर आएको हो ।

घटनाबारे बुझ्न र अनुसन्धान गर्न जिल्लाबाट नायव उपरीक्षक सुनिल मल्ल नेतृत्वमा टोली पुगेको छ ।

‘उनको शव अझै झिकिएको छैन,’ मल्लले भने, ‘उनकी श्रीमतीलाई बोलाएका थियौं, बाबुआमालाई पर्खेका छौं ।’ घटनास्थलको मुचुल्का उठाएपछि शव झिकेर पोस्टमार्टम गरिने मल्लले बताए ।

ती व्यक्तिले बारम्बार छोरीलाई बलात्कार गरेको उजुरी परेपछि पक्राउ गरिएको थियो । उक्त आरोपको अनुसन्धान भइरहेको थियो । प्रहरीले अनुसन्धान सकेर अभियोगपत्रसहित मुद्दा जिल्ला सरकारी वकिलको कार्यालयमा बुझाइसकेको जनाएको छ ।

प्रकाशित : चैत्र २०, २०७६ ११:३१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×