लकडाउनमा पनि जुम्लामा दैनिक हजारभन्दा धेरै भित्रिँदै

भारतबाट आएका १ जनालाई क्वारेन्टाइनमा राखियो
एलपी देवकोटा

जुम्ला — जुम्लालाई चैत ९ गते देखि नै लकडाउन गरिएपनि जिल्ला बाहिरबाट जुम्ला भित्रिनेको संख्या अझै पनि घटेको छैन । विभिन्न कामको सिलसिलामा जिल्ला बाहिर र रोजगारीको लागि भारत गएकाहरु दिन प्रतिदिन लकडाउनको बेवास्ता गरी जिल्ला जिल्लामा आइरहेका छन् ।

जुम्ला कालिकोटको सीमा क्षेत्र नाग्ममा रहेको हेल्थ डेक्समा स्वास्थ्य अवस्था जाँच गरेर जिल्लामा आउने गरेका छन्। मंगलबारमात्रै १ हजार सय ७४ जनाको स्वास्थ्य परीक्षण गरिएको नाग्म हेल्थ डेक्समा रहेका कर्णाली स्वास्थ्य विज्ञान प्रतिष्ठानका कर्मचारी नन्दराज उपाध्यायले बताए। ‘जुम्ला भित्रने हरेक व्यक्तिको स्वास्थ्य परीक्षण गर्ने गरिरहेका छौं,’ उनले भने, ‘धेरैजसो भारतबाट आउने व्यक्तिहरु रहेका छन्। स्वास्थ्य परीक्षण गरिएका सबैको स्वास्थ्य अवस्था सामान्य रहेको छ।

भारतबाट फर्किएका एकजनालाई उच्च ज्वारो आएपछि कर्णाली प्राविधिक शिक्षालयमा रहेको क्वारेन्टाइनमा राखिएको कर्णाली स्वास्थ्य विज्ञान प्रतिष्ठानका अस्पताल निर्देशक डा.मंगल रावलले बताए।


सिन्जाका ३२ वर्षीय एकजना व्यक्ति उपचारको लागि शिक्षण अस्पताल जुम्ला पुगेपछि उनमा ज्वारो धेरै आएको र खोकी लागिहेकाले उनलाई करेन्टाइनमा पठाएका छौं।उनले भने, उनलाई दुई हप्ता क्वारेन्टाइनमा निगरानीमा राखिने छ।


कोरोना भाइरससँग मिल्दोजुल्दो लक्षणका बिरामीहरु भेटिएमा कर्णाली प्राविधिक शिक्षालयमा एक सय बेडको क्वारेन्टाइन तयार गरिएको छ भने कर्णाली स्वास्थ्य विज्ञान प्रतिष्ठान शिक्षण अस्पतालमा एक सय २० शय्याको आइसोलेसन वार्ड तयार गरिएको छ। प्रकाशित : चैत्र १२, २०७६ १५:२०

ADVERTISEMENT
प्रतिक्रिया
पठाउनुहोस्
ADVERTISEMENT

सरकारले नगरकोटका होटललाई क्‍वारेन्टाइन बनाउने 

कान्तिपुर संवाददाता

काठमाडौँ — सरकारले भक्तपुरको नगरकोटमा रहेका होटललाई क्वारेन्टाइनस्थल बनाउने भएको छ । कोभिड–१९ विरुद्ध क्वारेन्टाइनस्थल निर्माण एवं व्यवस्थापन कार्यदल संयोजक एवं पर्यटनमन्त्री योगेश भट्टराई, भक्तपुरका प्रमुख जिल्ला अधिकारीसहितको टोलीले बुधबार नगरकोटका होटल व्यवसायीसँग छलफल गरेको थियो । 

छलफलपछि त्यहाँका होटलहरुलाई क्वारेन्टाइन बनाउन व्यवसायीहरु तयारी भएका छन्। कोरोना संक्रमण थप फैलियो भने नगरकोटमा करिब २ हजार जना राख्नेगरी तयारी भएको छ।

क्वारेन्टाइन निर्माण स्थल र व्यवस्थापनका लागि कार्यदलले भक्तपुर, काठमाडौं र ललितपुरका प्रमुख जिल्ला अधिकारीलाई आफ्ना जिल्लामा संयोजनको जिम्मेवारी दिएको थियो।

क्वारेन्टाइन व्यवस्थापन कार्यदलले तीनै जिल्लाका प्रमुख जिल्ला अधिकारी संयोजकत्वमा रहेका समितिलाई क्वारेन्टाइन बनाउन सकिने स्थान, कोठाको लिस्ट र लाग्ने स्रोत साधनबारे जानकारी गराउन पनि भनेको छ।
मन्त्री भट्टाईको संयोजकत्वमा बनेको क्वारेन्टाइन व्यवस्थापन कार्यदलले काठमाडौंमा मात्र ५ हजार मानिसलाई राख्न सक्ने गरी क्वारेन्टाइनस्थल बनाउने तयारी गरेको छ। यसका लागि सुरुमा होटल तथा सरकारी भवन उपयोग गरिनेछ। त्यसबाहेक विद्यालय पनि प्रयोग गरिने भएको छ।

बुधबार नै मन्त्री भट्टराई नेतृत्वको टोलीले दुवाकोटस्थित केएमसी हस्पिटलको पनि अनुगमन गरेको छ। दुवाकोटमा क्वारेन्टाइनको लागि ४५० र आइसोलेसनका लागि ५ वार्ड तयारी अवस्थामा राखिएको क्वारेन्टाइन व्यवस्थापन कार्यदलले बताएको छ।

यस्तै कार्यदलका अनुसार पशुपति क्षेत्रमा रहेको नवनिर्मित धर्मशालामा क्वारेन्टाइनमा ७० जना राख्न मिल्नेगरी व्यवस्थापन भएको छ।

प्रकाशित : चैत्र १२, २०७६ १५:१९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×