शारदा बालविवाहमुक्त नगर बन्दै

शारदा नगरपालिकालाई बालविवाहमुक्त उन्मुख घोषणा कार्यक्रमका सहभागी ।तस्बिर : विप्लव महर्जन/कान्तिपुर 
कान्तिपुर संवाददाता

सल्यान — निर्धारित सूचक पार गरेपछि आइतबार शारदालाई बालविवाहमुक्त उन्मुख नगरपालिका घोषणा गरिएको छ । बालविवाहमुक्त नगरपालिका बनाउने गरी नगरपालिकाले गत वर्षदेखि विशेष अभियान सुरु गरेको थियो ।आइतबार आयोजित कार्यक्रममा १५ वटै वडाका जनप्रतिनिधि, राजनीतिक दल, सरोकारवाला र स्थानीयले हस्ताक्षर गरी प्रतिबद्धता जनाएका छन् ।

बालविवाहले सम्बन्धविच्छेद, बहुविवाह, महिला हिंसालगायत सामाजिक अपराध बढाएको ठहर गर्दै अभियान सञ्चालन गरिएको नगरप्रमुख सुरेश अधिकारीले बताए । उनका अनुसार बालविवाहविरुद्धको अभियान नगरका १५ वटै वडामा जारी छ । नगरभित्रका ११ हजार घरधुरीलाई लक्षित गरी अभियान थालिएको उनले जानकारी दिए । ‘बालविवाहका घटना घटेपछि र केही सूचक पार गरिएपछि बालविवाहमुक्त उन्मुख घोषणा गरिएको हो,’ उनले भने, ‘अभियानले सार्थकता पाएपछि छिट्टै पूर्ण रूपमा बालविवाहमुक्त नगर घोषणा गरिनेछ ।’ अभियानअन्तर्गत नगरपालिकाले ‘घरघरमा स्टिकर’ अभियान सञ्चालन गरेको थियो । अभियानमा धर्मगुरु, पुरोहित, बालक्लव, महिला समूहलगायतलाई गाउँगाउँमा परिचालन गरिएको नगरप्रमुख अधिकारीले बताए । पछिल्लो समय नगरपालिकामा बालविवाहका घटना घटिरहेको जिल्ला प्रहरीको तथ्यांकले समेत देखाएको छ ।


यस वर्ष बालविवाहका दुईवटा मात्र घटना भएका छन् । गत वर्ष तीनवटा मुद्दा चलाइएको थियो । जिल्ला प्रहरी प्रमुख डीएसपी ढकेन्द्र खतिवडाले अभियानको प्रभावकारिता बढिरहेको बताए । ‘बालविवाह उन्मुख घोषणा गरिएसँगै जिल्लालाई बालविवाहमुक्त बनाउने अभियान सुरु गरिएको छ,’ उनले भने, ‘मातहतका प्रहरी इकाईलाई परिचालन गरी टोल प्रशिक्षण, विद्यालय शिक्षा, घरदैलोलगायतमा जोड दिइरहेका छौं ।’ बालविवाह गर्ने र गराउने १९ जनालाई कारवाहीको दायरामा ल्याइएपछि घटना कम हुँदै गएका उनले बताए ।


प्रमुख जिल्ला अधिकारी शिवराम पोखरेलले बालविवाह मात्रै रोक्न सके अधिकांश सामाजिक विकृति कम हुने बताए । पूर्वराज्यमन्त्री राजेन्द्रबहादुर शाहले बालविवाहकै कारण महिलामा पाठेघर खस्ने समस्या बढिरहेको जनाए । ‘कानुनी आधारमा दण्डित र सामाजिक रुपमा बहिस्कृत भए पनि गाउँगाउँमा बालविवाह बढिरहेको छ,’ उनले भने, ‘जिल्लालाई बालविवाहमुक्त गर्न सके सल्यानले ठूलो उपलब्धि हासिल गर्नेछ ।’ प्रकाशित : फाल्गुन ५, २०७६ १२:३५

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अब सहर कुरुप हुँदैन : प्रधानमन्त्री

विद्युतीय तार भूमिगत बनाउने महत्वाकांक्षी परियोजना सुरु
रासस

काठमाडौँ — काठमाडौं उपत्यकामा विद्युतीय तार भूमिगत बनाउने महत्वाकांक्षी परियोजना सुरु भएको छ । प्रधानमन्त्री केपी शर्मा ओलीले आज महाराजगञ्जबाट उक्त परियोजनाको कार्य आरम्भ गरेका हुन् ।

पहिलो चरणमा काठमाडौंको महाराजगञ्ज र रत्‍नपार्क क्षेत्रमा तार भूमिगत गरिनेछ । त्यसलाई क्रमशः अन्यत्र विस्तार गरिँदै लैजाने सरकारको योजना छ। ऊर्जा, जलस्रोत तथा सिँचाइ मन्त्रालयको निर्देशनमा नेपाल विद्युत् प्राधिकरणले अगाडि बढाएको भूमिगत बनाउने कार्यक्रमको शिलान्याशपछि आयोजित सभालाई सम्बोधन गर्दै प्रधानमन्त्री ओलीले विकासको नयाँ अध्याय सुरु भएको बताए। उनले विद्युत्, टेलिफोन र इन्टरनेटका तार भूमिगत भएपछि सहरको सौन्दर्य बढ्ने उल्लेख गर्दै कुरुपताको अन्त्य हुने विश्वास व्यक्त गरे। उनले यसबाट आम जनतालाई पनि सहज हुने र सेवा पनि सरल रुपमा प्राप्त गर्न सकिने स्पष्ट पारे।

प्रधानमन्त्रीले भने, 'यो योजना सम्पन्न भएपछि गुजुल्टिएको तार हट्छ । अब सहर कुरुप हुँदैन, चिटिक्कको सहर बन्छ। पोलभरि गुजुल्टिएको तार देख्ने दिन अन्त्यका लागि यो काम भइरहेको छ।' विद्युत्, टेलिफोनलगायत तार भूमिगत गर्ने काम काठमाडौंको महाराजगञ्जबाट सुरु भए पनि यसलाई देशका प्रमुख सहरमा विस्तार गरिने प्रधानमन्त्रीको भनाइ थियो। सरकारले विकास निर्माणको कामलाई प्रभावकारी रुपमा अगाडि बढाएको जानकारी दिँदै उहाँले केही मान्छेलाई भने पीर परेको बताए।

प्रकाशित : फाल्गुन ५, २०७६ १२:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×