आगलागीपछि खलंगा बजार बन्द

हरि गौतम

(रुकुम पश्चिम) — सदरमुकाम खलंगा बजार बिहीबार बन्द गरिएको छ । मुख्य बजारका तीन पसलमा आगो लागेपछि व्यापारीले पसल खोलेका छैनन् । रुकुम उद्योग वाणिज्य संघले एक दिनका लागि बजार बन्द गर्न भनेअनुसार बजार बन्द गरिएको हो । 

ZenTravel

Meroghar

बुधबार राति जिल्ला सदरमुकाम खलंगाको मुख्य बजारका पसलमा आगलागी भएको थियो । मुसीकोट नगरपालिका–१, खलंगाको जिल्ला प्रहरी लाइनका तीन पसलमा आगलागीबाट पूर्ण रुपमा क्षति पुगेको छ । बुधबार पौने ११ बजे सुरु भएको आगलागी बिहीबार बिहान २ बजेमात्रै नियन्त्रणमा आएको थियो । लक्ष्मी पुनको घरमा रहेका शाइकुमारी स्टेशनरी र आमा कपडा पसलमा आगलागी भएको छ भने बीरबहादुर रावलको घरमा रहेको हिमालय फेन्सी पसलमा आगलागी भएको छ । आमा कपडा पसलबाट आगो सुरु भएको बताइएको छ ।

जिल्ला प्रहरी प्रमुख प्रहरी नायव उपरीक्षक ठगबहादुर केसीले डेढ करोड बराबरको क्षति भएको बताए । कपडा पसलको विद्युत् सर्ट भएर आगो लागेको उनले बताए ।

प्रकाशित : फाल्गुन १, २०७६ १२:५९
ADVERTISEMENT
प्रतिक्रिया
पठाउनुहोस्
ADVERTISEMENT

गुम्बागाउँका बिरामीको नमुना संकलन गर्दै चिकित्सक

अनिश तिवारी

सिन्धुपाल्चोक — जुगल गाउँपालिकाको वडा ३, गुम्बागाउँमा फैलिएको ज्वरो र रुघाखोकी प्रकोपको नमुना संकलनका लागि दुई ल्याब विशेषज्ञसहित ३ जना डाक्टर गाउँ पुगेका छन् । कोरोना भाइरससँग मिल्ने लक्षण देखिएको रुघाखोकी र ज्वरोका दुई सयभन्दा बढी बिरामीलाई अपुग औषधि, स्लाइन, मास्कलगायतका सामग्री बाँड्दै उनीहरु नमुना संकलनमा जुट्दैछन् । 

जुगल गाउँपालिकाका स्वास्थ्य संयोजक अनिल साउदका अनुसार विशेषज्ञले गुम्बाथानको पांगर्पूस्थित सामुदायिक इकाईमा उपचाररत बिरामीको अवस्थाको अध्ययन सुरु गरेका छन् ।

काठमाडौं र जिल्ला अस्पतालबाट दुई ल्याब विशेषज्ञसहित जिल्ला स्वास्थ्यबाटै ३ जना डाक्टर बिरामीको स्वास्थ्य परीक्षणमा लागेको जानकारी दिए । ‘आवश्यक औषधि लगभग आइपुगेको छ, केही वृद्धवृद्धाबाहेक अरुको अवस्था एकदमै सामान्य छ, बिरामीको क्रमिक सुधार हुँदैछ,’ उनले भने ।सबै बिरामीलाई औषधि खुवाएपछि सामान्य अवस्थामा आए पनि दुई दिनसम्म उपचार जारी राख्नुपर्ने उनको भनाइ छ ।

‘कोरोना हो वा होइन परीक्षणपछि मात्रै खुल्छ’
गाउँमा ज्वरो र रुघाखोकीको प्रकोप देखिएपछि त्यस क्षेत्रका विद्यालय तीन दिनका लागि बन्द गरिएको गाउँपालिका प्रमुख होमनारायण श्रेष्ठले बताए ।


विशेषज्ञको टोलीले बिहीबार नै नमुना संकलन गरेर काठमाडौंको टेकुस्थित राष्ट्रिय विधि विज्ञान प्रयोगशालामा पठाइने प्रमुख श्रेष्ठले जानकारी दिए । बिहीबार बेलुका वा शुक्रबारसम्म गाउँमा फैलिएको प्रकोप के हो भन्ने थाहा हुने उनले बताए ।

चीनको वुहानबाट फैलिएको कोराना भाइरसको जस्तै लक्षण गुम्बाथानका बिरामीमा देखिएको भन्दै परीक्षण र उपचारका लागि चिकित्सक खटाइदिन गाउँपालिकाले जिल्ला स्वास्थ्य कार्यालय,वाग्मती प्रदेश सरकार र संघीय सरकारको स्वास्थ्य मन्त्रालयलाई स्थानीयको स्वास्थ्य अवस्थाबारे जानकारी गराएको थियो ।

प्रकाशित : फाल्गुन १, २०७६ १२:४७
पूरा पढ्नुहोस्
प्रतिक्रिया
पठाउनुहोस्
×