मोटरसाइकल पुग्दा खुसियाली
(कालीकोट) — नरहरिनाथ गाउँपालिकामा पहिलोपल्ट मोटरसाइकल पुगेको छ । सडक पहुँचबाट टाढा रहेको कुमालगाउँमा मंगलबार खाँडाचक्रका चार युवाले दुई मोटरसाइकल पुर्याएपछि स्थानीयले खुसियाली मनाउँदै स्वागत गरेका छन् ।
कालीकोटका ९ वटा स्थानीय तहमध्ये नरहरिनाथमा मात्रै सडक सुविधा छैन । गाउँमा पहिलोपटक मोटरसाइकल पुर्याउने युवालाई स्थानीयले अवीर र फूलमालासहित स्वागत गरे । लालीघाटदेखि कुमालगाउँसम्मको निर्माणाधीन १८ किलोमिटर सडकको काम नसकिँदै युवाले गाउँमा मोटरसाइकल पुर्याएका हुन् । कर्णाली करिडोरको लालीघाटको उकालो सडकबाट जोखिम मोलेर खाँडाचक्रका सुमन विष्ट, भीम शाही, लोकेन्द्र मल्ल र जनेश शाहीले मोटरसाइकल कुमालगाउँ पुर्याएका थिए । सडक अप्ठेरो भए पनि गाउँमा गाडी पुग्दैछ भन्ने सकारात्मक सन्देश दिन जोखिम मोटरसाइकल पुर्याइएको चालक शाहीले बताए । उनका अनुसार केही ठाउँमा सामान्य सडक मर्मत गरेको खण्डमा गाउँमा मोटरसाइकल पुर्याउन सकिन्छ ।
राष्ट्रिय झण्डासहित स्थानीय युवाले मोटरसाइकल गाउँ पुर्याएका हुन् । नरहरिनाथ–२, चौथीकोटका ९६ वर्षीय कालु दमाइले गाउँमा मोटरसाइकल पुगेपछि वर्षौंदेखिको सडक सपना पूरा भएको बताए । ‘कुनै जमानामा घरबाट एक महिना हिँडेर बर्दियाको राजापुर पुगेर नुन ल्याएका थियौं, अब त दुःखका दिन गए,’ उनले भने, ‘जुग फेरियो, अब हाम्रै घर अगाडिबाट मोटर गुड्ने भए ।’
गाउँपालिका उपाध्यक्ष मनशोभा बुढाले दुई महिनाभित्रै सडक निर्माण गरिसक्ने लक्ष्यसहित कामलाई तीव्रता दिइएको बताइन् । उनका अनुसार लालीघाटदेखि कुमालगाउँसम्मको १८ किलोमिटर सडक निर्माणको काम अन्तिम चरणमा पुगेको छ । गाउँपालिकाका अनुसार सडकमा ३ किलोमिटर तारजाली र ग्यावीन लगाउने काम भर्खरै सकिएको छ । सडकमा अहिलेसम्म ७ करोड रुपैयाँ खर्च भइसकेको छ । गाउँपालिकाले ६ करोड र प्रदेश सरकारले १ करोड रुपैयाँ खर्चिएका छन् । चालु आर्थिक वर्षमा सडक मर्मत सुधार र बिस्तारका लागि प्रदेश र स्थानीय सरकारमार्फत ७५/७५ लाख रुपैयाँ विनियोजन गरिएको छ । गाउँपालिकाको केन्द्र कुमालगाउँदेखि रुप्सासम्मको सडक निर्माणका लागि यस वर्ष प्रदेश सरकारले २ करोड ६२ लाख रुपैयाँ विनियोजन गरेको गाउँपालिका अध्यक्ष धीरबहादुर विष्टले बताए । उनका अनुसार खुलालुदेखि रहगाड सडकखण्डमा पनि काम जारी छ । रहगाड सडकमा गाउँपालिकाले ७ करोड र प्रदेश सरकारले १ करोड रुपैयाँ खर्च भइसकेको छ ।
नरहरिनाथमै ६ डोजर
सडकको ट्रयाक खोल्न नरहरिनाथमा ६ डोजरले काम गरिरहेका छन् । अहिले लालीघाट खण्ड, कुमालगाउँ र खुलालु–रहगाड सडकमा २/२ डोजरले काम गरिरहेको गाउँपालिकाले जनाएको छ । डोजरले खनेको सडकमा पहिरोको जोखिम भएकाले तारजाली र टेवापर्खाल निर्माणको काम जारी छ । सडक निर्माणका कारण बडेमेला र चौथीकोट गाउँ जोखिममा परेका छन् । उपभोक्ता समितिले व्यवसायीलाई प्रतिघण्टा ६ देखि ८ हजार रुपैयाँ शुल्क तिर्नेगरी सडक निर्माणको सम्झौता गरेका छन् । सडक स्तरोन्नतिका लागि सबै वडाबाट २० जनाका दरले कामदार युवा छनौट गरी रोजगारी दिन लागिएको अध्यक्ष विष्टले जानकारी दिए ।