अब सुर्खेतबाटै सवारी लाइसेन्स

ज्योति कटुवाल

(वीरेन्द्रनगर, सुर्खेत) — कर्णाली प्रदेशको राजधानी वीरेन्द्रनगरबाट सवारी चालक अनुमतिपत्र (लाइसेन्स) वितरण गर्न थालिएको छ । सोमबारदेखि यातायात व्यवस्था कार्यालयले चालक अनुमतिपत्र वितरण थालेको हो । 

ZenTravel

यसअघि चालक अनुमतिपत्रका लागि बाँकेको नेपालगन्ज र काठमाडौं धाउनुपर्ने बाध्यता थियो । कर्णालीका मुख्यमन्त्री महेन्द्रबहादुर शाहीले सवारी लाइसेन्सको फाराम भर्ने मेसिनको बटन थिचेर सेवाको उद्घाटन गरे । उनले योग्य र सक्षम चालकलाई मात्र अनुमतिपत्र दिन निर्देशन दिए । दबाव र पहुँचका आधारमा अनुमतिपत्र वितरण गर्ने व्यवस्थाको अन्त्य हुनुपर्ने उनको भनाइ छ । ‘जुनसुकै सवारी साधनको ट्रायल सिसी क्यामेराको निगरानीमा राखिनुपर्छ,’ उनले भने, ‘लाइसेन्स दिँदा व्यक्तिको दबाव र आर्थिक लालचमा नपरौं ।’ प्रदेश सरकार यातायातसम्बन्धी कानुन निर्माणको तयारीमा लागेको उनले जानकारी दिए । यातायात व्यवस्था विभागले चालक अनुमतिपत्र वितरण गर्ने अनुमति दिएपछि सोमबारदेखि यातायात व्यवस्था कार्यालयमा आवेदन भर्नेको घुँइचो लागेको छ । कार्यालयले सबै सवारी साधनका लागि अनुमतिपत्र दिने गरी आवेदन खुला गरिएको जनाएको छ ।

Meroghar

प्रमुख जिल्ला अधिकारीले चालक अनुमतिपत्रको व्यवस्थासँगै ग्रामीण सडक नियमन गर्न जरुरी रहेको बताए । ‘पुराना सवारी र जीर्ण सडकका कारण कर्णालीमा दुर्घटनाको जोखिम बढिरहेको छ,’ उनले भने, ‘डोजर पुग्ने बित्तिकै गाडी चलाउने प्रचलनलाई रोक्न सके दुर्घटनालाई न्यूनीकरण गर्न सकिन्छ ।’

यातायात व्यवस्था कार्यालयका प्रमुख आनन्द चपाईंका अनुसार भने इलेक्ट्रोनिक विधिबाट ‘स्मार्ट लाइसेन्स’ वितरण गर्न लागिएको हो । उनका अनुसार आवदेन खुलेपछि पहिलो दिनमै कार्यालयमा भीड बढेको छ । उनले प्रचलित विधि र कानुनअनुसार नै अनुमतिपत्र वितरण गरिने जानकारी दिए । उनका अनुसार २ सय रुपैयाँ राजस्व बुझाएपछि कार्यालयबाटै अनलाइन फाराम भर्ने व्यवस्था मिलाइएको छ । ‘इलेक्ट्रोनिक विधिबाट कार्यालयमै फाराम भरिने भएकाले बाहिरबाट ल्याएका फारामबाट लाइसेन्स झिक्न पाइने छैन,’ उनले भने, ‘यो व्यवस्थामार्फत कार्यालयमा विचौलियाको प्रवेश रोकिनेछ ।’

कार्यालयले यसअघि नै अनुमतिपत्र वितरणको तयारी गरे पनि प्राविधिक कर्मचारीको अभावमा ढिलाइ भएको हो । प्रदेश सरकारको भौतिक पूर्वाधार विकास मन्त्रालयका सचिव रामआधार साहले करारमा प्राविधिकतर्फका कर्मचारी छनोट गरेरै भए पनि लाइसेन्स वितरणको कामलाई अन्य जिल्लामा बिस्तार गरिने बताए । ‘कर्मचारी अभावका कारण मन्त्रालयको काममा समेत समस्या भइरहेको छ,’ उनले भने, ‘कर्मचारी अभावकै कारण बजेट कार्यान्वयनमा चुनौती देखिएको छ ।’

प्रकाशित : माघ ७, २०७६ ०९:४४
ADVERTISEMENT
ADVERTISEMENT
प्रतिक्रिया
पठाउनुहोस्

पार्किङ व्यवस्थित गरिँदै

हरि गौतम

(रुकुम पश्चिम) — मुसीकोट नगरपालिका–१, खलंगामा लामो समयदेखि अव्यवस्थित रहेको सवारी पार्किङलाई व्यवस्थित गर्न थालिएको छ । नगरपालिकाले बजारका विभिन्न ठाउँ र सडकमै गरिने पार्किङ हटाउन पहल थालेको छ ।

जथाभाबी पार्किङका कारण खुला ठाउँ नै भेटाउन मुस्किल भएपछि व्यवस्थापन सुरु गरिएको नगरपालिकाले जनाएको छ । अहिले राप्ती लोकमार्गको दायाँबायाँ तथा पुष्पलालचोकमा जथाभाबी सवारी पार्किङ भइरहेको छ ।

अव्यवस्थित पार्किङको कारण बटुवासमेत समस्यामा पर्दै आएका छन् । नगरपालिकाका वडा नं. १ का वडाध्यक्ष बिरबल केसीले सरोकारवालासँगको पटकपटकको छलफलपछि बजारमा हुने जथाभाबी पार्किङ हटाउन थालिएको बताए । जथाभाबी पार्किङ हुने सवारी साधनलाई अन्यत्रै लिएर व्यवस्थित गर्ने निर्णय भएको उनको जानकारी दिए । उनका अनुसार १ नम्बर वडाकै सल्लेमा जग्गा भाडामा लिएर सवारी पार्किङ गराउने प्रयास भइरहेको छ ।

वडा कार्यालयले तीन स्थानीयको जग्गा महिनाको १२ हजार रुपैयाँ तिरेर भाडामा लिएको छ । उक्त क्षेत्रमा पार्किङ गरेबापत एउटा सवारीबाट ५० रुपैयाँ लिने गरी निर्णय भएको छ । निजी सवारीको पार्किङ भने १ नम्बर वडाकै सहिदमैदानमा गराइने तयारी छ । यातायात व्यवसायीसमेतको छलफल र सहमतिमा उक्त निर्णय गरी कार्यान्वनमा लिन लागिएको वडाध्यक्ष केसीले जानकारी दिए । सदरमुकामस्थित मुख्य बजारमा बसपार्क छैन । सल्लेमा निर्माण गरिएको बसपार्क साँघुरो भएका कारण सार्वजनिक सवारीसाधन जथाभाबी पार्किङ गर्ने गरिएको हो । केही दिनभित्रै सवारी पार्किङरहित सडक बनाउने गरी काम भइरहेको वडा कार्यालयले जनाएको छ । अहिले सवारी पार्किङ भइरहेको ठाउँमा ‘नो पार्किङ’का बोर्ड राख्ने वडा कार्यालयको तयारी छ ।

सल्लेस्थित बसपार्कमा एक दर्वन गाडी अटाउन मुस्किल छ । टिकट काउण्टर बजार केन्द्रित भएपछि पनि सडकमा सवारी पार्किङ बाक्लिएको स्थानीयको गुनासो छ । सवारीसाधनको टिकट काउण्टर र टिकट काट्ने ठाउँ पनि व्यवस्थित गर्ने योजना अघि सारिएको वडा कार्यालयले जनाएको छ । जिल्लामा पाँच यातायात समिति छन् । जिल्ला बाहिरका अन्य समितिका गाडी पनि आउजाउ गर्छन् । स्थानीय गोपाल केसीले वडाले दीर्घकालीन रुपमा सममस्या समाधान गर्ने गरी पार्किङ व्यवस्थापन गर्न जरुरी रहेको औंल्याए ।

पार्किङ समस्याको दिगो व्यवस्थापनका लागि डीपीआर बनाइएको छ । सहरी विकास तथा भवन विभागले व्यवस्थित मलसहितको बसपार्क निर्माणको ५२ करोड १२ लाख रुपैयाँ लागतको बसपार्क निर्माण हुने गरी डीपीआर निर्माण गरेको हो । डीपीआर निर्माणपछि बसपार्क निर्माणको पहल थालिएको नगरपालिकाले जनाएको छ । मुसीकोट नगरपालिका–१ मा बनाइने बसपार्कको लागि आवश्यक सहयोग जुटाउने काम सुरु गरिएको नगर प्रमुख देविलाल गौतमले बताए ।

प्रकाशित : माघ ७, २०७६ ०९:४३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×