भेरीबाट लिफ्टिङ गरी खानेपानी

हरि गौतम

रुकुम पश्चिम — लामो समयदेखि काकाकुल बनेको चौरजहारी नगरपालिकामा खानेपानीको समस्या समाधान हुने भएको छ । चौरजहारी उपत्यकाका उपभोक्तालाई लक्षित गरी विजयश्वरी–चौरजहारी सुक्खा क्षेत्र खानेपानी आयोजना निर्माणको काम अन्तिम चरणमा पुगेको छ ।

ZenTravel

नगरपालिकाका वडाहरू १, २, ३ र ४ का स्थानीयको समस्या समाधान गर्न केन्द्र सरकारले सुक्खा क्षेत्र खानेपानी आयोजनाको काम अघि बढाएको थियो । आयोजनाको काम अब ५ प्रतिशत मात्रै बाँकी रहेको विजयश्वरी–चौरजहारी सुख्खा खानेपानी तथा सरसफाइ उपभोक्ता संस्थाले जनाएको छ । संस्थाका अनुसार आयोजनाका भौतिक संरचनामा रंगरोगन गर्ने र केही फिल्टरमा पम्प जडानको काम मात्र बाँकी छ ।

Meroghar

आयोजना निर्माणको काम सम्पन्न हुने क्रममा रहेकोले उपभोक्ताको तर्फबाट हुनुपर्ने आवश्यक तयारीलाई अघि बढाइएको संस्थाका अध्यक्ष तेजबहादुर बटालाले बताए । आयोजनाको सदस्य बन्न उपभोक्ताबाट ५ हजार रुपैयाँ नगद संकलन र धारा जडानको काम भइरहेको उनले जानकारी दिए । उनका अनुसार उपभोक्ता आफैंले सामग्री खरिद गरी धारा जडानको काम गरिरहेका छन् । उपभोक्ताले गर्नुपर्ने १० प्रतिशत श्रमदानअन्तर्गत हरेकले धारा किनेर आफैं जडान गरिरहेका छन् ।
४ वडा वडाका १ हजार ६ सय ४५ उपभोक्ताको घरमा खानेपानी पुग्ने र यसले लामो समयदेखिको समस्या समाधान गर्ने बटालाको भनाइ छ । ‘अब केही समयमै हामी पर्याप्त पानी पाउछौं,’ उनले भने, ‘त्यसका लागि उपभोक्ताले गर्नुपर्ने काम भइरहेको छ ।’ ठेकेदारको तर्फबाट गर्नुपर्ने काम लगभग सकिएको उनले सुनाए ।

भेरी नदीको पानी लिफ्टिङ गरेर खानेपानी आयोजना बनाइएको हो । सिएबी कन्स्ट्रक्सन कम्पनीले १६ करोड रुपैयाँको लागतमा आयोजना बनाएको हो । २०७५ साउन १ देखि निर्माण सुरु भएको थियो । यसै आर्थिक वर्षभित्रै आयोजनाको काम सक्नुपर्ने भए पनि त्यसको ४ महिनाअघि नै आयोजना हस्तान्तरण हुने निर्माण कम्पनीले जनाएको छ । कम्पनीका प्रतिनिधि प्रवीर डाँगीले भने, ‘संरचना रंगरोगनको काम मात्रै बाँकी छ, आयोजनाको ९५ प्रतिशत काम सकिएको छ । बाँकी काम पनि निरन्तर गरिरहेका छौं । हामी बैसाख १ मा हस्तान्तरण गर्ने तयारीमा छौं ।’

आयोजनाका लागि चौरजहारी–३ को मटेला कैंचाबाट भेरीको पानी लिफ्टिङगरिएको संस्थाले जनाएको छ । प्रतिसेकेन्ड २० लिटर पानी आउने बताइएको छ । आयोजनामा ९ ट्यांकी र एउटा फिल्टर प्लान्ट निर्माण भएको छ । पानी लिफ्टिङका लागि भेरीको छेवैमा २ वटा इनार बनाइएको छ ।

वर्षाको समयमा पनि खानेपानीका लागि लाइन लाग्नुपर्ने बाध्यताको अन्त्य हुन लागेकोमा उपत्यकाबासी खुसी छन् । ‘लामो समयदेखिको समस्या समाधान हुन लागेको छ,’ चौरजहारी नगरपालिका–१, का भद्रुलाल जैसीले भने, ‘घरमै धारा जोडिएपछि दुःखका दिन जाने आशामा छौं ।’

प्रकाशित : पुस २८, २०७६ ११:५६
ADVERTISEMENT
प्रतिक्रिया
पठाउनुहोस्
ADVERTISEMENT

एक सातादेखि सञ्चार सम्पर्क विच्छेद

राजबहादुर शाही

मुगु — हिमपातका कारण एक सातादेखि जिल्लाभर सञ्चार सम्पर्क विच्छेद भएको छ । हिमाली बस्तीमा बाक्लो हिउँ परेका कारण टेलिफोन सेवा अवरुद्ध भएको हो । जसका कारण जनजीवन कष्टकर बनेको छ ।

पुस १८ को भारी हिमपातका कारण टेलिफोन सेवा अवरुद्ध बनेको हो । हिमपातले टावरमा क्षति पुर्‍याएपछि टेलिफोन, जिएसएम मोबाइल र इन्टरनेट सेवा ठप्प छ । नेपाल टेलिकमको सिडिएए प्रविधिको टेलिफोन र मोबाइलले समेत राम्ररी काम नगरेको स्थानीयको गुनासो छ । टेलिफोन अवरुद्ध भएपछि स्थानीयबासी आफन्तसँग सम्पर्कविहीन बनेका हुन् । सञ्चार सेवा अवरुद्ध भएको एक साता बित्दासमेत मर्मत नहुँदा स्थानीयबासी सास्ती भोग्न बाध्य छन् ।

सञ्चार समस्याकै कारण गत बुधबार रोवास्थित जिउकाकी ३५ वर्षीया सुत्केरी धनरुपा विकले ज्यान गुमाइन् । सञ्चार सम्पर्क भइदिएको भए जिल्ला अस्पतालबाट एम्बुलेन्स बोलाएर उनको ज्यान बचाउन सकिने परिवारको भनाइ छ ।

इन्टरनेट सेवा बन्द हुँदा सरकारी र गैरसरकारी कार्यालयका कामकाज प्रभावित बनेका छन् । स्थानीय सञ्चार माध्यममा समेत यसको असर परेको छ । ‘इन्टरनेट चलाउन नपाउँदा समाचार सम्प्रेषणमा समस्या भएको छ,’ स्थानीय सञ्चारकर्मी कविराज कार्कीले भने, ‘आजभोलि भन्दाभन्दै धेरै दिन बितिसक्यो, सञ्चार समस्याकै कारण सानो काममा पनि सास्ती ब्यहोर्नु परिरहेको छ ।’

एक सातादेखि सदरमुकाम गमगढीसँग ग्रामीण क्षेत्रको सम्पर्क विच्छेद भएको छ । रुघा, कार्कीबाडा, रोवा, पिना, बालै, मुन्दु, ताल्चा, भामबाडा, श्रीनगरलगायत क्षेत्रमा सञ्चार सम्पर्क हुनसकेको छैन । इन्टनेट नहुँदा आर्थिक कारोबारमा समस्या भएको बैंक तथा वित्तीय संस्थाका प्रतिनिधिको गुनासो छ । कृषि विकास बैंक, राष्ट्रिय वाणिज्य बैंक र एनआइसी एसिया बैंकले चेक भुक्तानी गर्न र रकम जम्मा गर्न समस्या भएको जनाएका छन् । जिल्लाबाहिर रकम पठाउन समस्या भएको वित्तीय संस्थाको गुनासो छ । सञ्चार सेवा अवरुद्ध हुँदा कामकाज ठप्प जस्तै बनेको ज्योति लाइफ इन्स्योरेन्सका जिल्ला संयोजक अच्युत भण्डारीले दुःखेसो पोखे ।

जिल्लाभरका अधिकांश सरकारी कामकाज समेत प्रभावित बनेको जिल्ला प्रशासन कार्यालयले जनाएको छ । जिल्ला तथा माथिल्लो तहका निकायमा सम्पर्क हुन नसकेको हो । भारी हिमपातका कारण कालीकोटको महाबु लेकमा रहेको टावर बिग्रिएपछि नेटवर्कमा समस्या भएको नेपाल टेलिकम, क्षेत्रीय निर्देशनालयले जनाएको छ ।

समुद्र सतहदेखि ३ हजार ६ सय फिट उचाइमा रहेको महाबु लेकमा करिब ७ फिटसम्म हिउँ जमेको छ । भारी हिमपातका कारण सो स्थानमा प्राविधिक पुग्न नसक्दा समयमै समस्या समाधान गर्न नसकिएको निर्देशनालयका प्राविधिक प्रमुख शिवराज खनालले बताए । ‘टावर क्षेत्रमा बाक्लो हिउँ जमेकाले हेलिकोप्टर ल्यान्ड गर्न पनि समस्या छ, मर्मतका लागि गएका प्राविधिक बीच बाटोमै अलपत्र परेका छन्,’ उनले भने, ‘हिउँ पग्लिन सुरु भएपछि टावर मर्मतको काम सुरु गरिनेछ ।’ उनले टावर मर्मत हुन अझै केही दिन लाग्ने जानकारी दिए ।

टेलिफोन र इन्टरनेट समस्याका कारण कर्णालीको प्रमुख पर्यटकीय गन्तव्य रारा घुम्न आएका पर्यटकलाई समेत समस्या भएको छ ।महाबु लेकमा टावर बिग्रिएपछि छिमेकी जिल्ला हुम्लामा पनि १ सातादेखि सञ्चार सेवा अवरुद्ध छ ।

प्रकाशित : पुस २८, २०७६ ११:५१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×