तातोपानीमा घुइँचो

‘व्यवस्थापन भद्रगोल छ, तर पनि नुहाउन आउने बढिरहेका छन्, यसलाई व्यवस्थित गर्नसके गाउँपालिकामा आर्थिक गतिविधि बढ्ने देखिन्छ’ 
एलपी देवकोटा

जुम्ला — जिल्लामा चिसो बढेसँगै तातोपानी धारामा नुहाउनेको घुइँचो पनि बढेको छ । तर तातोपानी क्षेत्र अव्यवस्थित हुँदा स्थानीय बासिन्दा, आन्तरिक तथा बाह्य पर्यटकले सहज रुपमा नुहाउन पाएका छैनन् । स्वास्थ्य तथा पर्यटकीय दृष्टिले तातोपानी गाउँपालिकामा रहेको धारामा जाडो बढेसँगै नुहाउन आउनेको घुँइचो लाग्ने गर्छ ।

ZenTravel

तातोपानी धारालाई व्यवस्थित गर्न स्थानीय सरकारले बेवास्ता गरेको स्थानीयको गुनासो छ । स्थानीय महेश नेपालीले दुई दिनअघि टिकट काटे पनि राम्रोसँग नुहाउन पाएनन् । धारामा नुहाउनेको भीड धेरै भएकाले आफूले राम्ररी नुहाउन नपाएको उनको गुनासो छ । ‘धारामा पसेको ५ मिनेटमै निस्कनुपर्‍यो,’ उनले भने, ‘टिकट काटेर धारामा गइसकेपछि कति मिनेट नुहाउने, एकपटकमा कति जनालाई धारामा पठाउनेलगायत कुनै नियम नहुँदा दैनिकजसो सबैले सास्ती भोग्नुपरेको छ ।’

Meroghar

उनका अनुसार पछिल्लो समय बाहिरका मानिसको भीडसमेत बढ्दै गएको छ । तर व्यवस्थापन फितलो हुँदा सबैले गुनासो मात्र गर्ने उनी बताउँछन् । तातोपानी पर्यटकीय विकास केन्द्रले नुहाउन आउने जिल्लाबासीलाई २० र बाहिरका मानिसबाट ४० रुपैयाँ असुलिरहेको छ । चिसोमा तातोपानीमा दैनिक सय बढी मानिस नुहाउन आउने गरेको केन्द्रले जनाएको छ । केन्द्रका अनुसार मंसिर लागेसँगै नुहाउन आउनेको भीड लागेको हो ।

तातोपानीमा नुहाउन आएका कनकासुन्दरी गाउँपालिका अध्यक्ष नरवीर रावलले पनि राम्रोसँग नुहाउन नपाएको गुनासो गरे । ‘भीड धेरै भएकाले पनि चाँडै धाराबाट बाहिर निस्कनुपर्‍यो,’ उनले भने, ‘स्वास्थ्य र पर्यटकीय दृष्टिकोणले तातोपानीको महत्त्व धेरै छ, व्यवस्थित बनाउन सबैको सक्रियता जरुरी देखियो ।’ शरिरका विभिन्न स्वास्थ्य समस्या निको हुने भएकाले स्थानीय र पर्यटकको तातोपानीमा आकर्षण बढिरहेको उनी बताउँछन् ।

स्थानीयका अनुसार तातोपानीमा बर्सेनि ठूलो संख्यामा आन्तरिक तथा वाह्य पर्यटक लामो समयसम्म बसेर नियमित स्नान गरी विभिन्न रोग निको पारी फर्कन्छन् । तातोपानीको पोखरीमा ३/४ घण्टा डुवुल्की मारेर नुहाउँदा चर्मरोग, घाउ खटिरा आउने, रगतको समस्या, पेटका रोग, जोर्नी दुख्नेलगायत समस्या समाधान हुने आयुर्वेद चिकित्सकको भनाइ छ ।

तातोपानीनजिकै होटल चलाइरहेका नरेन्द्र बुढाले मंसिरदेखि चैतसम्म तातोपानीमा नुहाउनेको भीड लाग्ने गरेको बताए । ‘यहाँ सौख, मनोरञ्जन र विभिन्न स्वास्थ्य समस्या समाधानका लागि नुहाउन आउनेकोसंख्या बढिरहेको छ,’ उनले भने, ‘कोहीकोही एक महिनासम्म नियमित स्नान गरीस्वास्थ्य समस्या निको पारेर फर्कनेगरेका छन् ।’

तातोपानीमा पुरुष तथा महिलालाई स्नान गर्न छुट्टाछुट्टै धारा बनाइएका छन् । तर नुहाउने पोखरी एउटै भएकाले पुरुष र महिला सँगै बसेर नुहाउँदा अप्ठ्यारो हुने गरेको स्थानीय पार्वती गिरीले बताइन् ।‘व्यवस्थापन भद्रगोल छ, तर पनि नुहाउन आउनेहरू बढिरहेका छन्,’ उनले भनिन्, ‘तातोपानीलाई व्यवस्थित गर्नसके गाउँपालिकामा आर्थिक गतिविधि बढ्ने देखिन्छ ।’ नुहाउन एकैपटक धेरै मानिस पस्दा पनि समस्या भएको उनले सुनाइन् ।

समुद्र सतहदेखि २ हजार ६ सय ७ मिटर उचाइमा रहेको तातोपानी सदरमुकाम खलंगाबाट ८ कोष पश्चिममा पर्छ । धार्मिक एवं पर्यटकीय दृष्टिले महत्वपूर्ण मानिने तातोपानी क्षेत्रको व्यवस्थापनमा ढिला भएको पर्यटकहरू बताउँछन् । तातोपानीमा एक सातादेखि नियमित नुहाउँदै आएका हिमा गाउँपालिकाका उमाकान्त न्यौपाने आफ्नो ढाड दुख्ने समस्या बिस्तारै कम भइरहेको बताए ।

‘दुई/तीन महिनामा एकपटक नियमित एक सातासम्म नुहाउन आउने गरेको छु,’ उनले भने, ‘ढाड दुख्ने समस्या क्रमशः कम भइरहेको छ ।’ उनले धेरै मानिस आफ्नो रोग निको पारेरै तातोपानीबाट फर्कने गरेको सुनाए । धारामा नुहाउन आउनेहरूका लागि यस वर्ष लुगा र सामान राख्ने लकरको व्यवस्था गरिएको तातोपानी गाउँपालिकाका प्राविधिक जगत डाँगीले बताए । ‘धारा व्यवस्थित वनाउने प्रयास भइरहेको छ,’ उनले भने, ‘नुहाउन आउँदा सामान हराउनसक्ने भएकाले लकरको व्यवस्था गरिएको हो ।’

प्रकाशित : मंसिर २३, २०७६ १३:५२
प्रतिक्रिया
पठाउनुहोस्
ADVERTISEMENT

नेकपाकाे जारी सचिवालय बैठकमा तीनवटा प्रस्ताव पेश हुँदै

बबिता शर्मा

काठमाडौँ — उपचुनावको समीक्षा र संगठनात्मक कार्ययोजनासम्बन्धी विषयमा छलफल गर्न नेकपाको सचिवालय बैठक सुरु भएको छ । पार्टी मुख्यालय धुम्बाराहीमा बसिरहेको बैठकमा अध्यक्ष पुष्पकमल दाहालले ६ महिने जनपरिचालन अभियान सम्बन्धी कार्ययोजना, संगठन विभाग प्रमुख वामदेव गौतमले संगठनात्मक कार्ययोजना र स्कूल विभाग प्रमुख ईश्वर पोखरेलले पार्टी नेता–कार्यकर्ताका लागि चार तहको प्रशिक्षण सञ्चालन गर्ने तात्कालीक कार्ययोजना पेश गर्ने सचिवालय स्रोतले बतायो ।

दाहालले प्रधानमन्त्री एवं अर्का अध्यक्ष केपी शर्मा ओलीसहितका शीर्ष नेताहरुसँग परामर्श गरेर कार्ययोजनासम्बन्धी प्रस्ताव बनाएको स्रोतको भनाई छ। दाहालले ल्याउन थालेको जनपरिचालनसहितका कार्ययोजनामा पार्टी एकताको बाँकी काम सम्पन्न गर्ने विषय पनि समेटिएको छ।

लामोसमयदेखि पार्टी कमिटिले काम नपाएको र कार्यकर्ता बेरोजगार भएको गुनासो उठिरहेका बेला दाहालले ६ महिने कार्ययोजना ल्याएर पार्टी संगठनलाई क्रियाशील बनाउन खोजेका छन्। स्रोतका अनुसार बैठकमा संगठन विभाग प्रमुख गौतमले साबिक एमालेका ५ लाख तथा माओवादी केन्द्रका ३ लाखसहित करिब ८ लाख सदस्यहरूको एकीकरण प्रस्ताव लैजाने सम्भावना छ।

दुवै पार्टीका संगठित सदस्यहरूको अभिलेखका आधारमा नेकपाको नयाँ सदस्यतामा रूपान्तरण गरी वितरण गर्ने कार्ययोजनामा उल्लेख छ। गौतमको प्रस्तावमा पार्टी कमिटिमा बस्ने सदस्यले स्कूल विभागले लिएको परीक्षा दिनुपर्ने प्रस्ताव पनि छ। बैठकमा स्कूल विभागको प्रस्ताव पेश हुँदैछ।

विभागका उपप्रमुख बेदुराम भुसालले आइतवार बसेको नेकपाको स्कूल विभागले प्राथमिक, माध्यमिक, उच्च र विशिष्ट तहको स्कुल चलाउने कार्ययोजना र विभागलाई पूर्णता दिने प्रस्ताव पारित गरेको जानकारी दिए। सो प्रस्ताव जारी सचिवालय बैठकमा पेश गर्ने तयारी छ। विभागले चारवटै तहको पाठ्यक्रम तयारीसमेत गरेको छ। यद्दपी, विभागले यसअघि केही जिल्लामा प्रशिक्षण चलाईसकेको छ।

बैठकमा उपचुनाव भएका क्षेत्रका पार्टी कमिटिले पठाएको प्रतिवेदनका आधारमा समीक्षा हुनेछ। १८ मंसिरमा बसेको सचिवालय बैठकले तीन दिनभित्र प्रतिवेदन पठाउन निर्देशन दिएको थियो।

बैठकमा स्थायी कमिटि र केन्द्रिय कमिटि बैठक बोलाउने विषयमा पनि छलफल हुनेछ। नेकपाको एक बर्ष देखि स्थायी कमिटि बैठक बस्न सकेको छैन भने १८ महिनादेखि केन्द्रिय कमिटि बैठक बसेको छैन्।
४ मंसिरमा बसेको नेकपाको सचिवालय बैठकले पाँच बर्ष ओलीले सरकार र दाहालले कार्यकारी अध्यक्षको भूमिका निभाउने सहमति भएको थियो। यो निर्णयसँगै दाहालले मंसिर १८ गते पहिलोपटक सचिवालयको बैठक बोलाएका थिए। अहिले बसिरहेको दोस्रो बैठक हो।

आइतबार दाहालले प्रधानमन्त्री एवं पार्टीका अर्का अध्यक्ष ओलीसँग करिव २ घण्टालामो कुराकानी गरेका थिए। त्यसबाहेक सचिवालयका अन्य नेताहरुसँग पनि छलफल गरेका थिए।

जारी बैठकमा प्रधानमन्त्री एवं अर्का अध्यक्ष ओली सहभागि छैनन्। एपेन्डिसाइटिसको शल्यक्रिया गरेर दश दिन अस्पताल बसेर फर्केका ओलीले बालुवाटार सरकारी निवासमा आराम गरिरेका छन्। उनले सोबारलाई बालुवाटारमै मन्त्रिपरिषद् बैठक बोलाएका छन्।

प्रकाशित : मंसिर २३, २०७६ १३:४२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×