कान्तिपुर वेबसाईट
AdvertisementAdvertisement

अल्पसंख्यकलाई सघाउन कार्यविधि

कान्तिपुर संवाददाता

सुर्खेत — वीरेन्द्रनगरमा आयोजित एक कार्यक्रमका सहभागीले अपागंता, यौनिक अल्पसंख्यक, लोपोन्मुख जातजाति र समुदायको अधिकार सुनिश्चित गर्ने प्रतिबद्धता जनाएका छन् ।

इन्सेकले आयोजना गरेको ‘मानव अधिकार कार्यान्वयनका लागि स्थानीय सरकारको आवश्यकता तथा अवस्था अध्ययन’ कार्यशालाका सहभागीले सबै सेवा प्रदायक कार्यालय भवन र सेवाप्रवाह अपांगमैत्री बनाउन सुझाव दिए । वीरेन्द्रनगर नगरपालिका प्रमुख देवकुमार सुवेदीले श्रवणशक्ति गुमाएका तथा दृष्टिविहीन बालबालिकालाई शिक्षा र स्वास्थ्यको मूलप्रवाहमा ल्याउन योजना निर्माण गरिरहेको जनाए ।


उनले यौनिक अल्पसंख्यकलाई समाजमा सहज रुपमा घुलमिल गराउन तथा लोपोन्मुख जातजातिको उत्थानमा सहयोग पुग्ने कार्यविधि निर्माणको काम भइरहेको बताए । नगरपालिकाका प्रमुख प्रशासकीय अधिकृत टीकाराम ढकालले सबैको सहकार्यमा मानव अधिकारमैत्री कानुन निर्माण गर्न लागिएको जानकारी दिए ।


कार्यक्रममा मध्यपश्चिमाञ्चल विश्वविद्यालयका उपप्राध्यापक कमल लम्सालले मानव अधिकारको सवाल, विशेषता, दायित्व र जनप्रतिनिधिको भूमिकाबारे कार्यपत्र प्रस्तुत गरे । इन्सेक कर्णाली प्रदेश संयोजक नारायण सुवेदीले मानवअधिकारमैत्री कानुन निर्माण र कार्यान्वयनका लागि स्थानीय सरकारसँग सहकार्य थालिएको जनाए ।


प्रकाशित : मंसिर २३, २०७६ १३:१७
प्रतिक्रिया
पठाउनुहोस्

मदिराले बढायो अपराध

कान्तिपुर संवाददाता

मुगु — छायानाथ–रारा नगरपालिकामा केही समय निषेध गरिएको मदिरा खुला हुँदा अपराधका घटना बढ्न थालेका छन् । गरपालिकालाई २०७५ मंसिर १ गते मदिरा निषेधित क्षेत्र घोषणा गरिएको थियो । गत भदौमा उच्च अदालत सुर्खेत, जुम्ला इजलासले मदिरा निषेध गर्न नपाइने परमादेश जारी गरेपछि पुनः खुला भएको हो ।

जिल्ला प्रहरीका अनुसार मदिरा बिक्री तथा उत्पादन बन्द हुँदा अपराधका घटनामा कमी आएको थियो । मदिरा खुला भएपछि अपराध र झगडाका घटना बढिरहेको प्रहरीको तथ्यांक छ । मदिरा निषेधविरुद्ध स्थानीय लोकेन्द्र थापा, जंगबहादुर शाही, नेता चौलागाईलगायत व्यवसायीले चेम्बर अफ कमर्समार्फत जुम्ला इजलासमा मुद्दा दायर गरेका थिए ।

अदालतको परमादेशपछि मदिरा खुला हुँदा आपराधिक घटना पनि बढेको प्रहरीको भनाइ छ । चालु आवको ५ महिनामा विभिन्न प्रकृतिका २२ मुद्दा दर्ता भएको जिल्ला प्रहरीले जनाएको छ । कार्यालयको मुद्दा शाखाका अनुसार मदिरा खुला गरिएपछि अभद्र व्यवहारमा २२ मुद्दा दर्ता भएका छन् । त्यस्तै लागूऔषधमा ६, बहुविवाहमा १ र जबजस्ती करणीमा १ मुद्दा दर्ता भएका हुन् ।

ती घटनाबारे आवश्यक अनुसन्धान भइरहेको जिल्ला प्रहरीका सूचना अधिकारी लालबहादुर ऐरले बताए । हिउँसै मदिरा
सेवन गरी होहल्ला र झै–झगडा गर्ने क्रम बढेपछि नियमित गस्ती बढाइएको उनले बताए । मदिरा निषेध गर्दा सदरमुकामका एक दर्जन बढी व्यापारीले आफूले पाएको अनुमतिपत्र (लाइसेन्स) नगरपालिकामा बुझाएका थिए । लाइसेन्स फिर्ता लिएसँगै बन्द भएका मदिरा पसल धमाधम खुल्न थालेका छन् ।

शान्ति सुरक्षा कायम राख्न मदिरा निषेध गरिए पनि अदालतको परमादेशपछि खुला गरिएको नगर प्रमुख हरिजंग शाहीले बताए । ‘मदिरामा खर्च हुने अनावश्यक रकमको बचत र शान्ति सुरक्षा तथा अमन–चयन कायम होस् भनेर मदिरा बन्द गरिएको हो,’ उनले भने, ‘मुद्दामामिला र झगडा न्यून भएका थिए, तर अदालतको आदेशलाई पालन गर्न मदिरा खुला गर्न बाध्य भयौं ।’ यसअघि मदिरा सेवनकै कारण धेरैले ज्यान गुमाएको र कैयौंको घरबार बिग्रिएको उनको भनाइ छ ।

प्रकाशित : मंसिर २३, २०७६ १३:१५
पूरा पढ्नुहोस्
प्रतिक्रिया
पठाउनुहोस्
×