मालिका क्षेत्र ओझेलमा

कान्तिपुर संवाददाता

(सल्यान) — पर्यटकीय महत्त्वको ऐतिहासिक धार्मिकस्थल दार्मा गाउँपालिका ४ मा रहेको मालिका लेक ओझेलमा परेको छ । संरक्षण र पूर्वाधार अभावमा समुद्र सतहदेखि १ हजार ७ सय मिटर उचाइको पर्यटकीय क्षेत्र ओझेलमा परेको हो । 

लेकमा वर्षेनि दसैंको पञ्चमी र मंसिर पूर्णिमामा मेला लाग्दै आइरहेको छ । १६८० सालदेखि कालिका र मालिका भगवतीको मन्दिर बनाइ लेकमा पूजा गर्न थालिएको किंवदन्ती छ । पूर्वाधार निर्माण हुन नसक्दा ऐतिहासिक महत्वको मालिका लेक ओझेलमा परेको संरक्षण समितिका अध्यक्ष अध्यक्ष असवीर बुढाथोकीले बताए । उनका अनुसार अहिले कालिका मन्दिर जीर्ण बनेको छ भने मूर्ति चोरी भइसकेका छन् । उनका अनुसार बाईसे र चौविसे राज्यका बेला सल्यान, जाजरकोट, बडागाउँ र जुम्लाका राजाले मालिका लेकमा वर्षको एक पटक अनिवार्य रुपमा पूजा गर्थे ।

मालिका भगवती मन्दिरमा फुटेर टाउको मात्र बाँकी रहेको घण्टा १९९० सालमा तत्कालीन प्रधानमन्त्री जुद्ध शमशेरले चढाएको उनले जानकारी दिए । अध्यक्ष वुढाथोकीका अनुसार २०७४ सालमा मालिका लेकमा नयाँ मन्दिर निर्माण गरिएपछि भक्तजनको भीड बढ्दै गएको छ । लेकलाई पर्यटकीय स्थलको रुपमा विकास गर्न स्थानीय तह गठनपछि मन्दिर र प्रतिक्षालय निर्माण गरिएको उनले जानकारी दिए । एक सय २० हेक्टर क्षेत्रफलमा फैलिएको मालिका क्षेत्रको संरक्षणका लागि सरकारी निकायले लामो समयदेखि बेवास्ता गरिरहेको उनको गुनासो छ ।
ओझेलमा परेको मालिका लेकलाई धार्मिक र पर्यटकीय स्थलको रुपमा विकास गर्न गुरुयोजना निर्माण गरिएको गाउँपालिकाले जनाएको छ । नयाँ मन्दिर निर्माणका लागि चालु आर्थिक वर्षमा कर्णाली प्रदेशको उद्योग, पर्यटन वन तथा वातावरण मन्त्रालयले १० लाख रुपैयाँ रुपैयाँ विनियोजन गरेको छ । गाउँपालिकाले यस वर्ष मालिका क्षेत्रको संरक्षणका लागि पाँच लाख रुपैयाँ विनियोजन गरिएको जनाएको छ । उक्त रकमबाट पर्यटन विकासका लागि डिपिआरको काम हुने गाउँपालिका अध्यक्ष नीमबहादुर केसीले बताए । मालिका लेकबाट जाजरकोट, पश्चिम रुकुम, रोल्पा र दैलेख जिल्लाका अधिकांश भाग देख्न सकिने भएकाले भ्यूटावर निर्माणको योजना अगाडि बढाइएको उनले जानकारी दिए । उनले चालु आर्थिक वर्षमै खानेपानी र बिजुली पुर्‍याउन गाउँपालिकाले रकम विनियोजन गरेको जानकारी दिए । धार्मिक तीर्थस्थलको प्रचारका लागि नेपाल पत्रकार महासंघ, सल्यानले बिहीबार मालिका लेकमा अन्तर्क्रिया कार्यक्रम र कार्यसमितिको बैठक सञ्चालन गर्‍यो ।

प्रकाशित : मंसिर १४, २०७६ १२:४७
ADVERTISEMENT
प्रतिक्रिया
पठाउनुहोस्

गुणस्तरहीन कालोपत्रेमा यात्रा जोखिम

कान्तिपुर संवाददाता

(रुकुम पश्चिम) — जिल्ला जोड्ने एकमात्र मुख्य सडक हो–राप्ती लोकमार्ग । दाङ–सल्यान हुँदै रुकुम जोड्ने जीर्ण सडकका कारण स्थानीयले वर्षौंदेखि सास्ती भोग्दै आएका छन् ।

बर्सेनि यात्रुको संख्या बढ्दै गए पनि सडकको अवस्था बिग्रँदा स्थानीय बासिन्दा जोखिमपूर्ण यात्रा गर्न बाध्य भएका हुन् । २०५९ मा रुकुम–राप्ती लोकमार्गमार्फत सडक सञ्जालमा जोडिएको थियो । लामो समय कच्ची सडकमा यात्रा गरेका जिल्लाका बासिन्दाले सडक पक्की हुँदा पनि सजिलै यात्रा गर्न पाइरहेका छैनन् । लोकमार्गको अधिकांश ठाउँमा कालोपत्रे उप्किएको छ । हिलो र धूलोले यात्रा कष्टकर बनेको यात्रुको गुनासो छ ।

लोकमार्ग जिल्ला आउने र जिल्लाबाट बाहिरिने मुख्य सडक हो । सल्यानको बागचौर नगरपालिकास्थित बांगेलाकुरीदेखि सदरमुकाम सल्लेसम्मैको सडक बिग्रिएको छ । सल्यान र रुकुम पश्चिमको सिमाना खौलादेखि यताको सडकको अवस्था खराब छ । ठाउँ–ठाउँमा सडक चिरिएको छ भने ओटासिल उप्किएको छ । हिउँदमा धूलो र बर्खामा हिलो नहुने सडकै छैन ।

हरेक वर्ष विभिन्न खण्डमा उप्केको ओटासिल कालोपत्रे टाल्ने गरे पनि लामो खण्ड मर्मतको काम नहुँदा यात्रा असहज बनेको हो । टालटुल पनि मापदण्डअनुसारको हुने गरेको छैन । ठेकेदार कम्पनीले असारको अन्तिममा मात्रै हतार–हतार काम गर्ने र मापदण्ड नपुर्‍याइ काम गरिएको मुसीकोट नगरपालिका ४ का शिक्षक लोकबहादुर केसीले बताए । ‘असार अन्तिम साता ठेकेदारले टालटुलको काम सुरु गर्छन्,’ उनले भने, ‘सम्बन्धित निकायले अनुगमन नगर्दा सडकको अवस्था झन बिग्रँदै छ ।’

गत वर्ष राप्ती लोकमार्ग मर्मतका बजेट परे पनि अन्तिममा कार्यान्वयन हुन सकेन । सल्यानको श्रीनगरदेखि रुकुम पश्चिमको सल्लेसम्मै कालोपत्रे गर्नेगरी बजेट विनियोजन गरिए पनि काम सुरु हुन सकेन । ओटासिल कालोपत्रे गरिएको लामो समयसम्म थप मर्मत नहुँदा जीर्ण बनेको सडक मर्मतका लागि १५ करोड रुपैयाँ बजेट विनियोजन भएको थियो । सडक विभागअन्तर्गतको वैदेशिक महाशाखाले अन्तिममा प्राविधिक समस्या देखाउँदै सडक मर्मतको काम रोकेको थियो । रुकुम पश्चिमको मुसीकोट सल्लेदेखि सल्यानको श्रीनगरसम्म ८४ किमि छ ।

प्रकाशित : मंसिर १४, २०७६ १२:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×