गुणस्तरहीन कालोपत्रेमा यात्रा जोखिम

कान्तिपुर संवाददाता

(रुकुम पश्चिम) — जिल्ला जोड्ने एकमात्र मुख्य सडक हो–राप्ती लोकमार्ग । दाङ–सल्यान हुँदै रुकुम जोड्ने जीर्ण सडकका कारण स्थानीयले वर्षौंदेखि सास्ती भोग्दै आएका छन् ।

ZenTravel

बर्सेनि यात्रुको संख्या बढ्दै गए पनि सडकको अवस्था बिग्रँदा स्थानीय बासिन्दा जोखिमपूर्ण यात्रा गर्न बाध्य भएका हुन् । २०५९ मा रुकुम–राप्ती लोकमार्गमार्फत सडक सञ्जालमा जोडिएको थियो । लामो समय कच्ची सडकमा यात्रा गरेका जिल्लाका बासिन्दाले सडक पक्की हुँदा पनि सजिलै यात्रा गर्न पाइरहेका छैनन् । लोकमार्गको अधिकांश ठाउँमा कालोपत्रे उप्किएको छ । हिलो र धूलोले यात्रा कष्टकर बनेको यात्रुको गुनासो छ ।

लोकमार्ग जिल्ला आउने र जिल्लाबाट बाहिरिने मुख्य सडक हो । सल्यानको बागचौर नगरपालिकास्थित बांगेलाकुरीदेखि सदरमुकाम सल्लेसम्मैको सडक बिग्रिएको छ । सल्यान र रुकुम पश्चिमको सिमाना खौलादेखि यताको सडकको अवस्था खराब छ । ठाउँ–ठाउँमा सडक चिरिएको छ भने ओटासिल उप्किएको छ । हिउँदमा धूलो र बर्खामा हिलो नहुने सडकै छैन ।

हरेक वर्ष विभिन्न खण्डमा उप्केको ओटासिल कालोपत्रे टाल्ने गरे पनि लामो खण्ड मर्मतको काम नहुँदा यात्रा असहज बनेको हो । टालटुल पनि मापदण्डअनुसारको हुने गरेको छैन । ठेकेदार कम्पनीले असारको अन्तिममा मात्रै हतार–हतार काम गर्ने र मापदण्ड नपुर्‍याइ काम गरिएको मुसीकोट नगरपालिका ४ का शिक्षक लोकबहादुर केसीले बताए । ‘असार अन्तिम साता ठेकेदारले टालटुलको काम सुरु गर्छन्,’ उनले भने, ‘सम्बन्धित निकायले अनुगमन नगर्दा सडकको अवस्था झन बिग्रँदै छ ।’

गत वर्ष राप्ती लोकमार्ग मर्मतका बजेट परे पनि अन्तिममा कार्यान्वयन हुन सकेन । सल्यानको श्रीनगरदेखि रुकुम पश्चिमको सल्लेसम्मै कालोपत्रे गर्नेगरी बजेट विनियोजन गरिए पनि काम सुरु हुन सकेन । ओटासिल कालोपत्रे गरिएको लामो समयसम्म थप मर्मत नहुँदा जीर्ण बनेको सडक मर्मतका लागि १५ करोड रुपैयाँ बजेट विनियोजन भएको थियो । सडक विभागअन्तर्गतको वैदेशिक महाशाखाले अन्तिममा प्राविधिक समस्या देखाउँदै सडक मर्मतको काम रोकेको थियो । रुकुम पश्चिमको मुसीकोट सल्लेदेखि सल्यानको श्रीनगरसम्म ८४ किमि छ ।

प्रकाशित : मंसिर १४, २०७६ १२:४६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

लिफ्टबाट डाँडामा खानेपानी

कान्तिपुर संवाददाता

जुम्ला — मुहान तल र डाँडामा बस्ती भएपछि वर्षौंदेखि खानेपानी समस्या भोग्दै आएका तिला गाउँपालिका १, रारा गाउँका बासिन्दाले लिफ्ट प्रविधिमार्फत पानीको सुविधा पाएका छन् । गाउँपालिकाको ५० लाख रुपैयाँ बजेटमार्फत् १२ सय मिटर टाढाको बस्तीमा खानेपानी पुगेको हो ।

डाँडामा खानेपानी पुगेपछि स्थानीयले खुसी मनाएका छन् । २ सय ५० घरधुरी रहेको गाउँमा खानेपानी समस्या हुँदा स्थानीयले विभिन्न असुविधा भोग्दै आएका थिए । खानेपानी समस्याकै कारण बसाइ सर्ने क्रम बढेको थियो । गाउँमा पानी पुगेपछि स्थानीयलाई सिँचाइको सुविधासमेत भएको छ । प्रयोग गरेर बचेको पानीलाई स्थानीयले खेती र करेसाबारीमा प्रयोग गरिरहेका छन् । खानेपानी पुगेपछि वर्षौंदेखि प्रयोगविहीन भएका शौचालय पुन: प्रयोगमा आउन थालेका छन् ।

यसअघि स्थानीय बासिन्दा आधा घण्टा हिँडेर पानी ल्याउन बाध्य थिए । ठूलो गाउँ भए पनि ५ धारा मात्रै हुँदा घण्टौं लाइन लाग्नुपर्ने समस्या थियो । स्थानीय सरिता रावतले लिफ्टबाट पानी पुगेपछि जनजीवन सहज बनेको बताइन् । ‘धारोमा घण्टौ लाइन बस्नुपर्ने वाध्यता हटेको छ,’ उनले भनिन्, ‘पानीका लागि दु:खका दिन गए ।’ उनका अनुसार खानेपानी अभावका कारण महिला र बालबालिका धेरै समस्याबाट पीडित थिए । पानीकै लागि लाइन बस्दा बालबालिकाको पढाइ प्रभावित हुने गरेको थियो । लिफ्टमार्फत पानी पुगेपछि बालबालिकाको पढाइ नियमित बनेको उनले सुनाइन् ।

‘गाउँमा पानी ल्याउने स्रोत कुनै नभएपछि विकल्पको रुपमा लिफ्ट प्रविधि अपनाएका हौं,’ गाउँपालिका अध्यक्ष रतननाथ योगीले भने, ‘अब पानीको समस्या भएका अन्य वडामा पनि लिफ्टबाट पानी पुर्‍याउने काम थालिनेछ ।’ परीक्षणका रूपमा सुरु गरिएको योजना सफल भएपछि अन्य गाउँमा पनि लिफ्टकै प्रयोग गरिने उनको भनाइ छ ।

रारा गाउँमा लिफ्टमार्फत तानिएको पानीले १८ हजार रोपनीमा सिँचाइ हुने गाउँपालिकाले जनाएको छ । खानेपानीलाई सिँचाइमा समेत प्रयोग गरिने उपभोक्ता समिति अध्यक्ष कोलबहादुर रावत बताउँछन् । ‘खेतमा लगाएको अन्नबालीसँगै स्याउका बिरुवामा सिँचाइ गर्न खानेपानी नै प्रयोग गरिनेछ,’ उनले भने, ‘उत्पादन वृद्धिमा समेत लिफ्ट योजनाले सहयोग पुर्‍याउने विश्वास लिएका छौं ।’

प्रकाशित : मंसिर १४, २०७६ १२:४५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
×