फोहोरले सिमकोट दुर्गन्धित

बजार क्षेत्र र डम्पिङ साइडमा फालिएको फोहोरका कारण अधिकांश क्षेत्र दुर्गन्धित बन्न थालेको स्थानीयको गुनासो छ । दुर्गन्ध बढ्दै गएपछि तल्लो गाउँ र आसपासका बासिन्दा नाक थुनेर सिमकोट आउजाउ गर्न बाध्य भएको स्थानीय छक्कबहादुर रोकायाले बताए ।

उनका अनुसार कुहिने र नकुहिने फोहोर जथाभाबी फालिएपछि स्थानीयलाई नाक थुनेर यात्रा गर्नुपर्ने बाध्यता भएको हो । सिसा, प्लाष्टिक, खानेकुरालगायत कुहिने र नकुहिने फोहोर एकै ठाउँमा फालिएपछि स्थानीयले सास्ती भोग्नुपरिरहेको उनको गुनासो छ ।

‘गाउँपालिकाले अझैसम्म व्यवस्थित डम्पिङ साइड बनाउन सकेन । अधिकांश स्थानको फोहोर नियमित उठ्न सकेको छैन,’ उनले भने, ‘फोहोर कुहिएर आसपासका क्षेत्रमा बस्नै समस्या छ ।’