हेलिकप्टरबाट गर्भवतीको उद्धार
मुगु — सुत्केरी हुन नसकेकी मुगुमकार्मारोङ गाउँपालिका ८, माग्रीकी एक महिलालाई हेलिकप्टरमार्फत उद्धार गरिएको छ । सुत्केरी व्यथाले च्यापेर सिकिस्त बनेकी ३४ वर्षीया कार्मायाङ्जुम लामालाई हेलिकप्टरबाट उद्धार गरी सुर्खेत लगिएको हो ।
गाउँमा सुत्केरी हुन नसकेपछि उनलाई उद्धार गरिएको स्थानीय प्रशासनले जनाएको छ । उनलाई आइतबार बेलुकीबाट व्यथा लागेको थियो । लामाले यसअघि ४ सन्तान जन्माइसकेकी छन् । उनलाई सुत्केरी गराउन गाउँकै स्वास्थ्यचौकीमा ल्याइए पनि लामो व्यथा लागेर सुत्केरी हुन नसकेपछि जिल्ला प्रशासन कार्यालयको पहलमा उद्धार गरिएको हो ।
राष्ट्रपति महिला उत्थान कार्यक्रमअर्न्तगत उनको उद्धार गरिएको प्रमुख जिल्ला अधिकारी जयकुमार घिमिरेले बताए । उनका अनुसार गत वैशाखदेखि अहिलेसम्म जिल्लाका विभिन्न ठाउँबाट ५ गर्भवतीको हेलिकप्टरबाट उद्धार गरिएको छ । पाठेघरको वरिपरि पानीको मात्रा कम भएकाले उनलाई लामो व्यथा लागेको पुलु स्वास्थ्यचौकीका इञ्चार्ज गुरुछोर्देन लामाले बताए । उनका अनुसार जिल्ला अस्पतालका चिकित्सकको सल्लाहमा उनलाई प्रदेश अस्पताल, सुर्खेत पठाइएको हो । ‘ प्रसूतिको समयमा दुई दिनसम्मको व्यथा लामो मानिन्छ, सुत्केरी गराउन हामीले धेरै प्रयास गर्यौं, तर सफल भएनौं,’ उनले भने, ‘लामो व्यथाकै कारण उनको ज्यान खतरामा परेपछि हेलिकप्टरमार्फत सुर्खेत पठाइएको हो ।’