राराको कोसेली सिमी र स्याउ

राजबहादुर शाही

(मुगु) — रारा घुम्न आउने पर्यटकको रोजाइमा यहाँको अर्गानिक सिमी र स्याउ पर्ने गरेको छ । यसको बिक्री बढेपछि स्थानीयले उत्पादनमा समेत जोड दिन थालेका छन् ।

ZenTravel

Meroghar

असोजदेखि मंसिरसम्म स्याउ र कात्तिकदेखि फागुनसम्म सिमी कोसेलीका रूपमा प्रयोग हुने गरेको छ । पर्यटकले मुर्मा, झ्यारी, पिना, माथितुम रताल्चालगायत बस्तीमै पुगेर लैजाने गरेका मुर्मागाउँका गोरखबहादुर रोकायाले बताए । स्थानीयले रारा विमानस्थल र ताल नजिकैसम्म पनि बेच्न पुर्‍याउने गरेका छन् । ‘सिमी र स्याउको बिक्री बढेपछि गाउँलेले धेरै कसरी फलाउने भन्नेमा चासो दिएका छन्,’ उनले भने, ‘यसले कृषि पेसामा आकर्षण पनि बढाएको छ ।’ मुगुमा सिमी प्रतिकेजी १ सय २० रुपैयाँ र स्याउ प्रतिकेजी ४५ रुपैयाँमा किनबेच हुने गरेको छ ।

विगतमा बिक्री नभएर स्याउ खेर जाने गरेको थियो । गाउँबाटै खरिदबिक्री हुन थालेपछि स्थानीय किसान दंग छन् । छायानाथ–रारा नगरपालिका–७ का वडाध्यक्ष हरिचन्द शाहीले रारामा पर्यटकको पहुँच बढेसँगै व्यापार व्यवसाय पनि बढेको बताए । आगामी दिनमा यहाँका उत्पादनलाई अझ सजिलोसँग बजारीकरण गर्नुपर्ने आवश्यकता उनले औंल्याए । ‘गाउँघरमै आफूले उब्जाएको चिजबिजले मूल्य पाएपछि खुसी हुने नै भयो,’ उनले भने, ‘आगामी दिनमा यसलाई अझ प्रभावकारी रूपमा बजारीकरण गर्नु आवश्यक छ ।’

यहाँ फल्ने गोल्डेन डेलिसियस प्रजातिको स्याउ रसिलो र गुलियो हुन्छ । अर्गानिक सिमीको दाल पनि स्वादिलो र पोसिलो हुने स्थानीयको भनाइ छ । रारा घुम्न आउने पर्यटकले किसानको बारीमै पुगेर स्याउ टिपेर आफ्ना परिवारलाई कोसेली लैजाने गरेका छन् । भण्डार गरेको भन्दा बोटबाटै टिपेर लिन पाउँदा पर्यटक खुसी हुने गरेका छन् । मुर्मागाउँको सिमी अधिक रुचाइएपछि यसपटक सरकारले मुर्मागाउँलाई सिमी जोन घोषणा गरेको छ । जिल्ला कृषि विकास अधिकृत केबी रोकायाका अनुसार मुगुमा बर्सेनी करिब ३ सय २० टन सिमी उत्पादन हुने गरेको छ । यहाँको उत्पादनलाई अझ बढी मूल्य दिलाउनका लागि प्याकिङमा पनि ध्यान दिनुपर्ने उनको भनाइ छ ।

७० घरधुरी भएको मुर्मागाउँमा गत वर्ष करिब ४ सय ९० क्विन्टल सिमी उत्पादन भएको थियो । त्यसमा आधा बिक्री गरेको स्थानीय धनसिंह रोकायाले बताए । बिक्री भएको सिमी पर्यटकले कोसेलीका रूपमा लगेका हुन् ।
सडकमार्ग हुँदै रारा घुम्न आउने पर्यटकले जुम्ला, सिँजाको मार्सी चामल पनि कोसेलीका रूपमा किनेर लैजाने गरेका छन् । देशका विभिन्न ठाउँबाट रारा घुम्न आउने पर्यटकले सिँजा उपत्यका भ्रमण गर्नुका साथै मार्सी चामल कोसेलीका रूपमा लैजाने गरेका हुन् । सिँजा, गोठीज्युलाका सार्की बुढाले गाउँमै पनि मार्सीर् चामल प्रतिकेजी १५० रुपैयाँमा बिक्री गर्ने गरेको बताए ।

प्रकाशित : कार्तिक ३, २०७६ १०:२०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

खुल्न थाले प्रदेशका जिल्ला कार्यालय

कान्तिपुर संवाददाता

दैलेख — कर्णाली प्रदेश सरकारले मातहतका विभिन्न कार्यालयहरू जिल्लामा स्थापना गर्न थालेको छ । पहिले प्रदेश राजधानीबाट सञ्चालन हुने काम अब सदरमुकामबाटै हुने भएका छन् ।

सामाजिक विकास मन्त्रालय मातहतका ८ वटा कार्यालय दसैंअघि जिल्लाबाट सञ्चालन हुन थालेका छन् । मन्त्री दल रावलका अनुसार मन्त्रालयले १० वटै जिल्लामा मातहतका कार्यालय स्थापना गर्न थालेको छ । मन्त्रालयअन्तर्गतका शैक्षिक प्रशासन, महिला तथा बालबालिका केन्द्र, युवा तथा खेलकुद कार्यालय र स्वरोजगार कार्यालयको कार्यसम्पादन साविकको जिल्ला शिक्षा कार्यालयबाटै हुनेछ । स्वास्थ्य सेवा अन्तर्गतका घरेलु, खानेपानी तथा सिँचाइ पूर्वाधार, पशु अस्पताल तथा पशु विकास कार्यालय, आयुर्वेदालय, जिल्ला अस्पताल र जिल्ला स्वास्थ्य कार्यालय मर्ज गरेर स्वास्थ्य सेवा कार्यालय भएको छ । कृषि ज्ञान केन्द्रको काम कृषि विकास कार्यालयमार्फत सुरु भएको छ । प्रदेश कोष लेखा नियन्त्रक कार्यालयको शाखा पनि जिल्लामा स्थापनाको तयारी भएको छ ।

गत आर्थिक वर्षमा प्रदेश सरकारको बजेट पूर्ण रुपमा कार्यान्वयन नहुनुमा संरचना र जनशक्ति अभाव भनिएको थियो । त्यसैले पनि प्रदेश सरकारले जिल्ला–जिल्लामा कार्यालय स्थापना गर्न थालेको हो । शिक्षा विकास निर्देशनालयका उप सचिव दीपा हमालले जिल्लामा बजेट भए पनि कार्यालय नहुँदा कार्यान्वयन हुन नसकेको बताइन् । ‘कर्णालीका बिकट जिल्लाका सेवाग्राहीले सेवा लिनको लागि राजधानी सुर्खेत आउनुपर्ने बाध्यता थियो, त्यसको असर सेवा प्रवाहमा पनि परेको थियो,’ उनले भनिन्, ‘अब जिल्लामै कार्यसम्पादन गर्ने कार्यालय गएपछि त्यो समस्या समाधान हुनेछ ।’

नारायण नगरपालिकाका रत्नबहादुर खड्काले काम गर्ने ढंग नमिल्दा संघीयतामा जनताले झन् सास्ती पाएका बताए । उनले ढिलै भए पनि प्रदेश सरकारले जिल्ला–जिल्लामा कार्यालय स्थापना गरेपछि केही राहत मिलेको बताए । ‘राजनीतिक परिवर्तन गरियो, हामी परिर्वतन भयौं, तर जनताको समस्या के हो भन्नेबारे कहिल्यै बुझ्ने काम भएन,’ उनले भने, ‘अब सबै तहका सरकारले जनताका समस्यालाई केन्द्रमा राखेर काम गर्नुपर्छ ।’

प्रकाशित : कार्तिक ३, २०७६ १०:१९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×