सिमकोट विमानस्थलमा अग्निवाहन

कान्तिपुर संवाददाता

हुम्ला — सिमकोट विमानस्थलमा आगलागी नियन्त्रण गर्न अग्निवाहन ल्याइएको छ । नेपाल नागरिक उड्डयन प्रधिकरणले हुम्ला विमानस्थललाई प्रदान गरेको अग्निवाहन सेनाको हेलिकप्टरबाट सिमकोट पुगेको हो । 

अग्निवाहन अष्ट्रेलियाबाट भारतको कलकत्ता हुँदै सिमकोट पुर्‍याइएको हो । यसअघि विमानस्थल र आसपासका क्षेत्रमा आगलागी हुँदा नियन्त्रण गर्ने साधन नहुँदा समस्या हुने गरेको थियो । हुम्ला विमानस्थल आगलागीका लागि जोखिमपूर्ण मानिन्छ । जहाज दुर्घटना हुँदा हुने आगलागी नियन्त्रणका लागि वाहन महत्त्वपूर्ण हुने हुम्ला नागरिक उड्डयन कार्यालयका प्रमुख गौरीशंकर शाहले बताए ।

उनका अनुसार अग्निवाहन खरिद र ढुवानीमा झन्डै १२ करोड रुपैयाँ खर्च भएको छ । ‘यसअघि विमानस्थल र आसपासका क्षेत्रमा आगलागी हुँदा परम्परागत प्रविधिबाट आगो निभाइने गरिएको थियो, जसबाट ठूलो क्षति हुँदै आएको थियो,’ उनले भने, ‘अब कुनै आकस्मिक घटना भए नियन्त्रणमा सहज हुनेछ ।’

प्रकाशित : कार्तिक २, २०७६ ११:२२
ADVERTISEMENT
प्रतिक्रिया
पठाउनुहोस्
ADVERTISEMENT

उपाधि साइक्वारी युवालाई 

कान्तिपुर संवाददाता

डोल्पा — सदरमुकाम दुनैमा आयोजना गरिएको खुला भलिबल प्रतियोगितामा माझपालस्थित साइक्वारी युवा क्लब विजयी भएको छ । बिहीबार भएको फाइनल स्पर्धामा पुल्चिङ युवा क्लबलाई हराउँदै साइक्वारीले पहिलो स्थान हात पारेको हो ।

दुर्गाउ युवा समितिले आयोजना गरेको जिल्लास्तरीय भलिबल प्रतियोगितामा जिल्लाभरका एक दर्जन समूहले सहभागिता जनाएका थिए । प्रथम स्थान हासिल गर्दै साइक्वारीले ५१ हजार रुपैयाँ प्राप्त गर्‍यो ।

पुल्चिङ युवा क्लब ३० हजार रुपैयाँ पाउँदै दोस्रो भयो । तेस्रो भएको यार्चा स्पोर्ट क्लबले २० हजार रुपैयाँ पायो ।

समितिका अनुसार फुल्चिङका भीम चलाउने उत्कृष्ट र रुद्रमान बोहोरा अनुशासित खेलाडी घोषित भए । विजयी खेलाडीलाई ठूलीभेरी नगरपालिका ६ का वडाध्यक्ष धर्मलाल बुढा, समितिका अध्यक्ष जनक कार्कीलगायतले पुरस्कार, मेडल र प्रमाणपत्र प्रदान गरे ।

प्रकाशित : कार्तिक २, २०७६ ११:२१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT