यात्रु सहायता कक्ष सञ्चालनमा

कान्तिपुर संवाददाता

कालीकोट — दसैं–तिहारलाई लक्षित गरी प्रहरीले कालीकोटमा पहिलोपटक यात्रु सहायताकक्ष सञ्चालनमा ल्याएको छ  । साँघुरो र अप्ठेरो कर्णाली राजमार्गमा पर्याप्त गाडीको अभावमा चाडबाडमा घर फर्किने यात्रुलाई सहयोग गर्न यात्रु सहायताकक्ष सञ्चालनमा ल्याइएको प्रहरीले जनाएको छ  ।

मान्मस्थित जिरोपोइन्टमा रहेको सहायताकक्षले यात्रुको सुरक्षा, आवागमनमा सहजता र चालकलाई पनि जिम्मेवार बनाउन सहयोग गर्ने जिल्ला प्रहरीप्रमुख डीएसपी श्यामबाबु ओलीले बताए । सवारी चालक र यात्रुलाई लक्षित गरेर सञ्चालनमा ल्याइएको सहायताकक्ष २४ सै घण्टा खुला रहने जानकारी दिए ।


‘सडक सभ्यता हाम्रो चाहना, सुरक्षित यात्रा सबैको कामना’ भन्ने नाराका साथ सञ्चालनमा ल्याइएको कक्षको उद्घाटन गर्दै प्रमुख जिल्ला अधिकारी कृष्णचन्द्र पौडेलले कालीकोट, मुगु, जुम्ला र बाजुरातर्फ आवतजावत गर्ने यात्रुलाई सहज हुने विश्वास व्यक्त गरे । ‘अप्ठेरो सडकमा क्षमताभन्दा बढी यात्रु गाडीमा राख्दा जोखिम हुन्छ,’ उनले भने ‘चालक पनि सहजगता अपनाउनुपर्ने हुन्छ, यो कुरालाई सहायताकक्षले सघाउ पुर्‍याउनेछ ।’ उनले ट्राफिक नियम पालना गर्न यात्रु, गाडी चालक, गाडीधनी सबैको जिम्मेवारी हुने बताए ।


सहायताकक्षबारे जानकारी दिन आयोजित सभामा दसैंतिहारमा सवारी र यात्रु चाप तथा लापरबाहीले दुर्घटना हुनसक्ने भएकाले ट्राफिक नियमबारे जानकारी गराइएको छ । प्रहरीले यात्रुहरूले पालना गर्नुर्पर्ने नियमबारे पनि जानकारी दिँदै प्रचार सामग्री पनि वितरण गरेको छ । कार्यक्रममा ९ जना चालकलाई माला र दोसल्ला ओढाएर सम्मान गरिएको छ ।

प्रकाशित : आश्विन १७, २०७६ ११:५०
प्रतिक्रिया
पठाउनुहोस्

खैराबाङमा भक्तजनको भीड

कान्तिपुर संवाददाता

सल्यान — शारदा नगरपालिका ११ मा अवस्थित धार्मिक पर्यटकीयस्थल खैराबाङ भगवती मन्दिरमा दर्शनार्थीको भीड लाग्न थालेको छ  । दसैंको अवसरमा मन्दिरमा घटस्थापनादेखि मेला लाग्ने गर्छ  ।

मन्दिरमा पूजाका लागि सल्यानका विभिन्न ठाउँका साथै दाङ, नेपालगन्ज, सुर्खेत, बर्दिया, रुकुम, रोल्पा, जाजरकोटबाट समेत दर्शनार्थी आउने गर्दछन् । घटस्थापनादेखि सुरु हुने मेला नवमीसम्म चल्ने गर्छ । मन्दिर संरक्षण समितिका अध्यक्ष छविकुमार शर्माले दसैं सुरुवात भएपछि दैनिक ४०/५० गाडीमा भक्तजनहरू आउने गरेका बताए । उनका अनुसार भगवती मन्दिरमा पूजाआजा गरी बर मागेपछि सन्तान प्राप्त हुने जनविश्वास रहेको छ ।

‘मन्दिरमा भारतबाटसमेत धार्मिक पर्यटक आउने गर्दछन्,’ शर्माले भने, ‘त्यसैले खैरबाङ भगवती मन्दिरको महिला देश–विदेशसम्मै रहेको छ ।’ भगवती मन्दिरमा बोका, राँगा, हाँस, भेडा, भाले बलि चढाउने गरिन्छ । चतुर्थी, पञ्चमी, षष्टी र अष्टमीमा मात्रै मन्दिरमा करिब ८ सय बोका बलि दिइने गरेको अध्यक्ष शर्माको भनाइ छ ।


श्रद्धालुका लागि खानेबस्ने व्यवस्था छैन । यसले गर्दा दर्शनार्थीलाई सास्ती हुने गरेको छ । पछिल्लो समय खैराबाङ धार्मिक पर्यटकीयस्थलको रुपमा विकसित हुँदै गएको छ । मन्दिर संरक्षण समिति सचिव दीपक शर्माले दर्शनार्थीले मन्दिरमा चढाएको रकम र बोकाको टाउको बिक्री गरेको पैसा मन्दिरको विकासमा खर्च गर्ने योजना बनाइएको बताए । उनका अनुसार मन्दिरलाई अझ व्यवस्थित बनाउन र बाह्य पर्यटकलाई भित्र्याउन शारदा नगरपालिकाले सोलार बत्ति, खानेपानी र गाडी पार्किङको व्यवस्था गर्न थालेको छ ।

‘मन्दिरमा पूजाआजाका लागि आउने तीर्थयात्रीलाई समस्या नहोस् भनेर सुरक्षाको प्रबन्धसमेत गरेका छौं,’ उनले भने ।
किम्बदन्तीअनुसार मन्दिर आसपासमा एक सुन्दर युवती बाघमा चढेर घुम्ने गर्थिन् । एक दिन ग्वालाहरूले उनलाई देखेपछि पछ्याउँदै जाँदा उनी गुफामा छिरेर हराइन् ।

पछि गाउँलेले त्यही गुफामा मन्दिर बनाएर पूजाआजा गर्न थालेका हुन् । खैराबाङ भगवती मन्दिरलाई खड्गेश्वरी, पाटेश्वरी र भुवनेश्वरीको नामले समेत चिन्ने गरिन्छ । मन्दिरमा एक खड्ग भएकाले खड्गेश्वरी, मूर्ति राखेको ठाँउमा ठूलो प्वाल भएकाले भुवनेश्वरी र भगवती पाटे बाघमा चरेर घुम्ने भएकीले पाटेश्वरी नाम राखिएको मन्दिर संरक्षण समितिका अध्यक्ष शर्माले बताए ।

प्रकाशित : आश्विन १७, २०७६ ११:४९
पूरा पढ्नुहोस्
प्रतिक्रिया
पठाउनुहोस्