टिपर दुर्घटनामा एक महिलाको मृत्यु , तीन घाइते
सल्यान — शारदा नगरपालिका-२ विद्युत प्राधिकरणको कार्यालय नजिकै टिपर दुर्घटना हुँदा एक महिलाको मृत्यु भएको छ भने तीन जना घाइते भएका छन् ।
ओटासिल पिच गर्न बालुवा ओसारपसारको लागि ल्याइएको बा३क २३६५ नम्बरको टिपर दुर्घटना हुँदा शारदा नगरपालिका-८ मार्केकी ४५ वर्षीया रामकली बिकको घटनास्थलमै मृत्यु भएको हो । टिपरले च्यापिएर उनको मृत्यु भएको प्रहरीले जनाएको छ ।
घाइते हुनेमा सन्तोषी निर्माण सेवा कम्पनीमा काम गर्ने ३५ वर्षका मोहीसन मुसिया, हरिशंकर भन्तु र शेषनाथ कुमाल रहेको जिल्ला प्रहरी कार्यालय सल्यानले जनाएको छ । घाइते भएका तीनै जनाको जिल्ला अस्पतालमा उपचार भइरहेको प्रनाउ ढकेन्द्र खतिवडाले जानकारी गराए ।
दिउँसो १ बजेतिर टिपर रोकेर कामदारले बालुवा झार्दै गर्दा चालक टिपरबाट झरेका र त्यही बेला रामकलीले पानी पिउन ढोका खोलेर भित्र बोत्तल खोज्दा एक्कासी टिप्पर ब्याक भएर माथिल्नो सडकबाट तल्लो सडकमा पल्टेको प्रनाउ खतिवडाले जानकारी गराएका छन् ।