बेवारिस शिशुले पायो अभिभावक

भेरी नगरपालिका उपप्रमुख भावना भण्डारीको अध्यक्षतामा बसेको सरोकारवालाको बैठकले शिशुको पालनपोषण र संरक्षणका लागि भट्टराई दम्पतीलाई जिम्मा दिने निर्णय गरेको थियो । शिशुलाई प्रमुख जिल्ला अधिकारी जनकराज पन्त र उपप्रमुख भण्डारीले मंगलवार हस्तान्तरण गरेका हुन् ।

शिशुलाई गत भदौ २२ गतेदेखि जाजरकोट अस्पतालले संरक्षण गर्दै आएको थियो । प्रहरीले जंगलमा फेला परेको शिशु अस्पतालमा बुझाएको थियो । धर्मपुत्र बनाउन भन्दै भट्टराईले निवेदन पेश गरेपछि बेवारिसे शिशु हस्तान्तरण गरिएको उपप्रमुख भण्डारीले बताइन् । बालबालिकासम्बन्धी ऐन–२०७५ को दफा ६० ले विवाह गरेको १० वर्षको समयसम्म बच्चा नजन्मिएको, विवाह दर्ता गरेको, आर्थिक अबस्था मजबुत भएकोलाई धर्मपुत्र बनाउन सिफारिस गर्नुपर्ने व्यबस्था गरेको छ ।

घटनाबारे आवश्यक अनुसन्धान भइरहेको र संलग्नको खोजी भइरहेको जिल्ला प्रहरी कार्यालयले जनाएको छ । उक्त शिशुलाई धर्मपुत्रका रूपमा प्राप्त गर्न भेरी नगरपालिका ४, का शम्भु बर र कृष्ण भट्टराईले नगरपालिकामा निवेदन दिएका थिए ।