जोखिममा त्रिवेणी बजार 

कान्तिपुर संवाददाता

रुकुम पश्चिम — ठूलीभेरी नदीका कारण त्रिवेणी बजारमा जोखिम बढ्दै गएको छ । यस वर्ष दुईपटक ठूलीभेरीमा आएको बाढीका कारण आठबीसकोट नगरपालिका ६, स्थित त्रिवेणी जोखिममा परेको हो । 

रुकुम पश्चिम आठबीसकोट नगरपालिका ६, को त्रिवेणी बजार र ठूलीभेरी नदी । तस्बिर : कान्तिपुर

ठूलीभेरीमा गत साउन अन्तिम साता आएको बाढीले सोही वडाको मन्काबगरका १२ घर बगाइदिएको थियो । निरन्तरको वर्षाका कारण पछिल्ला केही दिनदेखि त्रिवेणी बजारको डिलसम्मै ठूलीभेरीको बहाब पुगेको छ ।

ठूलीभेरीको बहाब बढ्दै जाँदा सर्वसाधारण आत्तिएका छन् । त्रिवेणी बजार रुकुम पश्चिमको आठबीसकोटको साथै डोल्पाको दुनै जाने मुख्य नाका हो । सडक मार्ग भएर डोल्पाको दुनै जाने मुख्य सडकको मुख्य बजार जोखिममा परेपछि स्थानीय चिन्तामा छन् ।

‘साउन अन्तिम साता र केही दिनअघि यो वर्षामा दुई पटक बजारसम्म ठूलीभेरीको बहाब आइसक्यो,’ स्थानीय विष्णु बोहराले भने, ‘पछिल्लो केही दिनदेखि त झन ठूलीभेरीले बजारको डिल छाडेको छैन ।’ हरेक रातभर पर्ने पानीले रातभर जाग्राम बस्नुपर्ने बाध्यता रहेको बोहराले बताए । गत असारमा लगाइएको तारजालीको कारणले मात्रै ठूलीभेरी अझै अघि बढ्न नसकेको उनले बताए ।
संघीय सरकार र कर्णाली प्रदेश सरकारको सहयोगमा आठबीसकोट नगरपालिकाले गत असार महिनामा ठूलीभेरीका विभिन्न ठाउँमा १ करोड रुपैयाँको लगानीमा तारजाली लगाएको थियो । ‘यस अघिका वर्षहरूमा यसरी बजारको डिलसम्मै ठूलीभेरी आएको थिएन,’ बोहराले भने, ‘तर यो वर्ष दुई/दुई पटक बहाब बढेर आइसक्यो ।’

त्रिवेणी डोल्पाको दुनैको आधार बजारको रुपमा रहेको छ । नेपालगन्जबाट आउने निर्माण तथा खाद्य सामग्री त्रिवेणीमै पुर्‍याइन्छ । ठूलीभेरी नदीमाथि बनेको झोलुंगे पुल तरेपछि डोल्पाको सडक भेटिन्छ । यसका साथै डोल्पाकै नर्कु, कालिका, इल, ओकटलगायत ठाउँको मुख्य बजार नै त्रिवेणी हो । त्रिवेणीबाट डोल्पाको कालिका जानेहरू झोलुंगे पुल तरेरै पैदल गन्तव्यमा जाने गरेका छन् ।

स्थानीय व्यापारी लीला बोहराले ठूलीभेरीको बहाब बढ्दै गएपछि बजारबासीको साथै बजारमा कारोबार गर्नेहरू समेत समस्यामा परेको बताइन् । ‘हामी बजारबासी त चिन्तामा पर्ने भयो नै,’ उनले भनिन्, ‘यही बजारलाई आधार बनाएर तलमाथि गर्नेसमेत चिन्तित हुने गरेका छन् ।’

उनका अनुसार बजारमा ३३ घरपरिवारले व्यापार व्यवसाय गरिरहेका छन् । गत असारमा राखेको तारजाली कम भएका कारण जोखिम बढिरहेको स्थानीयको भनाइ छ । तारजालीले बजारभित्रै पुग्ने ठूलीभेरीको बहाबलाई रोके पनि जोखिम टार्न नसकेको स्थानीय रामबहादुर धरालाले बताए ।

आठबीसकोट नगरपालिका प्रमुख गोर्खबहादुर केसीले गत असारमा लगाइएको तारजालीले केही राहत गरे पनि थप तारजाली लगाउनुपर्ने आवश्यक्ता देखिएको बताए । अर्को वर्ष थप जाली लगाउने गरी योजना बनाएको नगर प्रमुख केसीले जनाए । त्रिवेणीबजारदेखि रिम्नासम्मका विभिन्न ठाउँमा आवश्यकताअनुसारको तारजाली लगाउनेगरी पहल भइरहेको उनको भनाइ छ ।

प्रकाशित : भाद्र ३०, २०७६ १०:०१
प्रतिक्रिया
पठाउनुहोस्

मदिरा र महिला हिंसाविरुद्ध प्रहरी अभियान

कान्तिपुर संवाददाता

कालीकोट — रास्कोटमा समुदाय–प्रहरी साझेदारी कार्यक्रम सुरु गरिएको छ । जिल्लालाई मदिरा र महिला हिंसामुक्त बनाउने अभियानसहित पहिलो चरणमा रास्कोटमा कार्यक्रम सुरु गरिएको हो । 

रास्कोट नगरपालिकाको सहकार्यमा कार्यक्रम सुरु गरिएको प्रहरीले जनाएको छ । सामाजिक विकृतिविरुद्ध जनचेतना फैलाउन, अपराध रोकथाम गर्न तथा सुरक्षा व्यवस्थापनमा जनसहयोग अभिवृद्धि गर्न कार्यक्रम सुरु गरिएको जिल्ला प्रहरीले जनाएको छ । कार्यक्रममार्फत सामुदायिक सुरक्षा अभिवृद्धि हुने प्रहरीको अपेक्षा छ ।

कार्यक्रममा सहभागी सरोकारवालाले आपराधिक घटना रोक्न नागरिक सचेतना जरुरी रहेको जनाए । जिल्ला प्रहरी प्रमुख (डीएसपी) श्यामबाबु ओलियाले अपराधमुक्त जिल्ला बनाउन समुदायको सक्रियता र सहयोग अपरिहार्य रहेको जनाए । उनले कालिकोटमा ह्नुे अधिकांश अपराधसँग मदिरा जोडिएले प्रहरीले मदिरा नियन्त्रण अभियान सुरु गरिसकेको जनाए । ‘अपराध र अपराधी कसैका आफन्त होइनन्,’ उनले भने, ‘अपराधलाई सबै मिलेर निरुत्साहित गर्न जरुरी छ ।’

जिल्लामा शान्ति सुरक्षा कायम गर्न सरकारले प्रहरीलाई जिम्मेवारी दिए पनि सबै नागरिकको सहयोग बिना सम्भव नरहेको प्रमुख जिल्ला अधिकारी कृष्णचन्द्र पौडेलले बताए । उनले समुदाय प्रहरी साझेदारी अभियानले समाजमा सबैलाई मिलेर बस्न प्रेरित गर्ने र अपराध घटाउन सहयोग हुने जनाए ।

प्रहरीले जिल्लालाई जातीय छुवाछुतमुक्त, बाल विवाह न्यूनीकरण, महिला हिंसा नभएको र अवैध मदिरारहित जिल्ला बनाउन अभियान थालिएको जनाएको छ । रास्कोट नगरपालिकाको सहकार्यमा एक साताअधि प्रहरी र श्रम रोजगार बैकका सदस्यले ५ हजार लिटर अवैध मदिरा जफत गरेर नष्ट गरेका थिए । कालिकोटमा हालै गरिएको अध्ययनअनुसार ५७ प्रतिशत महिला हिंसा हुने गरेको छ भने वार्षिक १५ जनाले आत्महत्या गर्ने गरेका छन् ।

म्यादी प्रहरी विवेक ऐडीको मृत्युपछि प्रहरी र कालिकोटका नागरिकबीच चिसिएको सम्बन्ध सुधार गर्न यसअघिका डीएसपी विनोद शर्माले गरेका प्रयासमा आफूले पनि निरन्तरता दिने उनले प्रतिबद्धता जनाए ।

प्रकाशित : भाद्र ३०, २०७६ १०:००
पूरा पढ्नुहोस्
प्रतिक्रिया
पठाउनुहोस्