भाडा घटाएर क्षमता बढी यात्रु

विष्णुलाल बुढा

डोल्पा — जिल्लाका विभिन्न सडकमा सञ्चालन हुँदै आएका जिपमा क्षमताभन्दा बढी यात्रु राख्न थालेपछि स्थानीयले सास्ती भोग्दै आइरहेका छन् । व्यवसायीले ५ जनाको सिटमा ९ जनासम्म यात्रु राख्न थालेपछि दुर्घटनाको जोखिमसमेत बढेको छ ।

दुनै–जुफाल, दुनै–सुपानी, छलगाड–खदाङलगायत सडकमा सञ्चालन हुने जिपमा क्षमताभन्दा बढी यात्रु राख्न थालिएको हो । गत बुधबार जिल्ला प्रशासन कार्यालयमा बसेको सर्वपक्षीय बैठकमा यातायात व्यवसायी भाडा घटाउन सहमत भएका थिए । तर घाटा हुने भन्दै व्यवसायीले जिपमा क्षमताभन्दा बढी यात्रु राख्ने गरेका हुन् । यसअघि यी रुटमा ५ सय रुपैयाँ भाडा लिने गरिएको थियो । सर्बपक्षीय बैठकले भाडादर ३ सय रुपैयाँ कायम गर्ने निर्णय गरेको थियो ।

स्थानीय प्रशासनका अनुसार थप ४ यात्रुको बिमास्वरुप यातायात व्यवसायीले ५० हजार रुपैयाँ यातायात व्यवस्थापन समितिमा जम्मा गर्ने सहमति गरेपछि क्षमताभन्दा बढी यात्रु बोक्न दिने निर्णय गरिएको हो । प्रमुख जिल्ला अधिकारी मुकेशकुमार केशरीले यातायात व्यवसायी भाडा घटाउन सहमत भएको बताए ।

उनका अनुसार दुनैदेखि रुपगाडसम्म १ सय, रुपगाडदेखि जुफालसम्म र रुपगाडदेखि सुपानिसम्म २ सय ५० रुपैयाँ भाडादर कायम गरिएको छ । उनले छलगाडदेखि खदाङसम्म ३ सय रुपैयाँ भाडा निर्धारण गरिएको जानकारी दिए । ‘थप यात्रुको बिमा व्यवस्थापन गर्ने सहमतिपछि क्षमताभन्दा बढी यात्रु राख्नदिने निर्णय गरिएको छ,’ उनले भने, ‘भाडा कम गरिएपछि व्यवसायीको व्यवहारिकता हेरेका हौ ।’

ढुवानी समस्याले मूल्यवृद्धि
वर्षा सुरु भएसँगै जाजरकोट–डोल्पा खण्डमा यातायातका साधन सञ्चालन हुन समस्या भएपछि दैनिक उपभोग्य सामग्रीको मूल्यवृद्धि गरिएको छ । ढुवानी समस्याका कारण उपभोग्य सामग्रीको मूल्य बढेको व्यवसायीले जनाएका छन् ।
नेपालगन्जदेखि डोल्पासम्म सामान ढुवानी गर्दा विभिन्न खोलामा पल्टी गर्नुपर्ने भएपछि ढुवानीमा समस्या भएको हो । सडकमा पर्ने विभिन्न खोलामा पुल नहुँदा व्यवसायीले मजदुरमार्फत पल्टी गर्दै सामान ढुवानी गर्दै आइरहेका छन् । वर्षा सुरु भएपछि ढुवानीमा थप समस्या भएको उनीहरूको गुनासो छ ।

सडकमा पहिरो खसेका कारण सामान ढुवानी गर्न थप समस्या भएको उद्योग वाणिज्य संघका अध्यक्ष लालिमान बुढाले बताए । ‘वर्षा सुरु नहुँदै पनि खोलामा पुल नहुँदा मजदुर लगाएर सामान वारपार गराउने गरिएको थियो,’ उनले भने, ‘वर्षाका कारण ठाउँठाउँमा बाटो बिग्रदा र पहिरो जाँदा थप स्थानमा पल्टी गरी सामान ढुवानी गर्नुपर्ने समस्या छ ।’ उनले वर्षा सकिएसँगै ढुवानी केही सहज भएपछि बजारभाउ घट्ने जानकारी दिए ।

यसअघि तल्लुबगर, खदाङ, छलगाड र त्रिपुराकोटमा पल्टी गरी सामान ढुवानी गर्ने गरिएको थियो । अहिले राडि, चौका, दामाचौर, करपगाड, तल्लु, खदाङ, छलगाड, त्रिपुराकोट, रुपगाडलगायत ९ स्थानमा पल्टी गर्ने गरिएको अध्यक्ष बुढाले जानकारी दिए । उनका अनुसार उपभोग्य सामग्रीको मूल्य २५ प्रतिशतसम्मले वृद्धिभएको छ ।

प्रकाशित : भाद्र ११, २०७६ ०९:१४
प्रतिक्रिया
पठाउनुहोस्

कक्षा उत्तीर्ण गर्न थप पाठ्यक्रम

हरि गौतम

रुकुम पश्चिम — आठबीसकोट नगरपालिकाका विद्यालयमा कक्षा उत्तीर्ण गर्न थप पाठ्यक्रम पढ्नुपर्ने भएको छ । विद्यार्थीले नियमित पाठ्यक्रमका साथै थप ५० पूर्णांकको पाठ्यक्रम पढ्नुपर्ने भएको हो ।

रुकुम पश्चिमको आठबीसकोट नगरपालिका १, खेतस्थित साईकुमारी आधारभूत विद्यालयका विद्यार्थी प्रार्थनाका क्रममा । तस्बिर : हरि/कान्तिपुर 

व्यवहारिक ज्ञान सिकाउन भन्दै नगरपालिकाले ५० पूर्णांकको पाठ्यक्रम बनाउन लागेको हो । कक्षा उत्तीर्ण गर्न बाल विकासदेखि १० कक्षाका विद्यार्थीले उक्त विषय पास गर्नैपर्ने छ । पाठ्यक्रममा सैद्धान्तिक कम र व्यवहारिक विषयवस्तु बढी हुने नगरपालिकाले जनाएको छ ।

पाठ्यक्रममा खेती किसानदेखि दिगो विकासका लक्ष्य समावेश हुने नगरपालिकाको शिक्षा, युवा तथा खेलकुद शाखाले जनाएको छ । विभिन्न २२ विषयवस्तुमा केन्द्रित भएर स्थानीय पाठ्यक्रम बनाउन लागिएको शाखा संयोजक थलवीर ओलीले बताए । ‘प्राक्टिकल नै बढी गराउने गरी पाठ्यक्रम बन्दै छ,’ उनले भने, ‘नियमित पठनपाठनका अलावा जान्नैपर्ने कुरा सिकाउने उद्देश्यले स्थानीय पाठ्यक्रम बनाएर पढाउन लागेका हौं ।’

दिगो विकासका लक्ष्य, पूर्ण सरसफाइका ७ सूचक, कृषि तथा पशुपालन, वन, वातावरण तथा विपद् व्यवस्थापन, स्थानीय स्रोत साधनमा आधारित व्यवसायलगायत विषयवस्तु पाठ्यक्रममा समावेश हुनेछन् ।

बालबालिकाको सिर्जनशीलता र नयाँ खोज, सदाचार, नैतिकता, नगरपालिकाको समृद्धि, विकास र पहिचानमा योगदान पुग्ने विषयवस्तु पनि समावेश गरिएको नगरपालिकाले जनाएको छ । त्यसैगरी पोषण तथा अग्यानिक खाना, स्वास्थ्य, शारीरिक तथा सरसफाइ, नैतिक शिक्षा, सामाजिक मूल्य मान्यता, असल व्यवहार, सिर्जनात्मक तथा सकारात्मक सोचाइका विषयमा पठनपाठन हुने संयोजक ओलीले बताए । उनका अनुसार यी विषयमा धेरैभन्दा धेरै अभ्यास गराइ विद्यार्थीलाई प्राप्तांक दिइने व्यवस्था गरिएको छ ।

पाठ्क्रम निर्माणको प्रक्रिया सुरु भइसकेको नगरपालिकाले जनाएको छ । नगर कार्यपालिकाको बैठकको निर्णयअनुसार पाठ्यक्रम बनाउने र चालु शैक्षिक सत्रदेखि नै लागू गर्ने तयारी गरिएको हो । पाठ्यक्रम निर्माणका लागि नगर प्रमुख गोर्खबहादुर केसीको नेतृत्वमा समिति बनाइएको छ । पाठ्यक्रम आगामी तिहारपछि विद्यालयमा लागू हुने गरिने नगर प्रमुख केसीले बताए ।

नगरपालिकाभर बाल शिक्षासहित ५९ विद्यालय छन् । ‘५० पूर्णांकको मात्रै भएकाले तिहारपछि लागू गर्दा पनि फरक नपर्ने देखिएको छ,’ उनले भने, ‘सानै उमेरदेखि बालबालिकालाई सबै विषयप्रति गम्भीर बनाउन र उनीहरूको क्षमता विकास गर्न स्थानीय पाठ्यक्रम बनाउने निर्णय भएको हो ।’

बालक आफूप्रति कति जिम्मेवार र सहयोगी छ भन्नेजस्ता व्यहारिक कुरा अध्ययन गरी परीक्षामा नम्बर दिइने उनले जानकारी दिए । उनका अनुसार कृषि, पशुपालन र श्रमप्रतिको लगाव हेरेर पनि विद्यार्थीको मूल्यांकन गरिनेछ । विद्यार्थीको घर, बारी र खेल्ने ठाउँमा पुगेर उनीहरूको मूल्यांकन गरी नम्बर दिइने उनी बताउँछन् ।

प्रकाशित : भाद्र ११, २०७६ ०९:१३
पूरा पढ्नुहोस्
प्रतिक्रिया
पठाउनुहोस्