गाउँपालिका–शिक्षक सम्झौता

३१ बुँदे कार्यसम्पादन सम्झौताले शैक्षिक गुणस्तर वृद्धिका लागि शिक्षक, समुदाय र जनप्रतिनिधिलाई जिम्मेवार बनाएको छ
तुलाराम पाण्डे

कालिकोट — यहाँको एक गाउँपालिकाले शिक्षाको गुणस्तर सुधार गर्न विद्यालयसँग कार्यसम्पादन सम्झौता गरेको छ । सान्नीत्रिवेणी गाउँपालिकाले शिक्षक र समुदायसँग ३१ बुँदे कार्यसम्पादन सम्झौता गरेको हो ।

विद्यालयमा शिक्षकका अनियमितता रोक्न गत वर्ष डिजिटल हाजिरी सुरु गरेको उक्त गाउँपालिकाले विद्यालयको कार्यसम्पादनका लागि सम्झौता गरेको जनाएको छ । गाउँपलिकाका सबै विद्यालयका प्रधानाध्यापक र विद्यालय व्यवस्थापन समिति अध्यक्षसँग आगामी एक वर्षको कार्यर्योजनासहित कार्यसम्पादनका लागि सम्झौता गरिएको गाउँपालिकाका अध्यक्ष डम्बरबहादुर शाहीले बताए ।

प्रत्येक वर्षको भदौभित्र सरोकारवालाको सहभागितामा सामाजिक परीक्षण गर्ने, जेठ ७ गतेसम्म विद्यालयको शैक्षिक सूचना व्यवस्थापन प्रणाली र विद्यार्थी परिचय तयार गरेर १५ गतेभित्र गाउँपालिकामा पेश गर्ने, विद्यालयमा जानेपाठ्यपुस्तक, दिवाखाजा र छात्रवृत्ति अभिभावकको भेला गरी पारदर्शी रूपमा वितरण गर्ने, गाउँपालिकाले जडान गरेका बायोमेट्रिक हाजिरी पूर्ण रूपमा कार्यान्वयन गर्ने गाउँपालिकाले विद्यालयसँग गरेको संझौतामा उल्लेख छ ।

त्यस्तै प्रत्येक कक्षाकोठामा लकबुक राखेर मासिक रूपमा छलफल गर्ने, विद्यालयमा शिक्षक, विद्यार्थी र अभिभावकले पालना गर्नुपर्ने आचारसंहिता निर्माण गरी टाँस गर्ने, कक्षा १ देखि ५ सम्मका विद्यार्थीका लागि नियमित रूपमा घरबाट खाजा ल्याई ८० प्रतिशत हाजिर हुने विद्यार्थीलाई मात्र दिवाखाजाबापतको नगद रकम दिने, विद्यार्थी पास हुन नसकेमा शिक्षकका ग्रेड रोक्का र तलब कट्टी गर्ने विषय पनि सम्झौतामा समेटिएका स्थानीय शिक्षासेवी हिरामणि सिंखाडाले बताए ।

उनका अनुसार विद्यालयले त्रैमासिक, अर्धवार्षिक र वार्षिक परिक्षाको नतिजा विश्लेषण गरी अभिभावकलाई बालबालिकाको प्रगतिबारे जानकारी दिने, विद्यालयबाहिर रहेका सबै बालबालिकालाई भर्ना गर्ने, विद्यालयका प्रधानाध्यापकले पनि आफू मातहतका शिक्षकसँग कार्यसम्पादन सम्झौता गर्नुपर्नेलगायत विषय समेटिएका छन् ।

गाउँपालिकाले गुणस्तरीय शिक्षाका लागि विद्यालयलाई जवाफदेही बनाउन गरेको सम्झौताले पठनपाठनमा सकारात्मक सन्देश दिने शंकर मावि सेरिज्युलाका प्रधानाध्यापक टेकबहादुर गिरीले बताए ।

साझा प्रतिबद्धता
विद्यालयशिक्षाको गुणस्तर खस्किएको निष्कर्ष निकाल्दै शुभकालिकाका सरोकारवालाले सुधारको लागि साझा प्रतिबद्धता व्यक्त गरेका छन् । गाउँपालिकाका जनप्रतिनिधि, प्रधानाध्यापक, शिक्षक, अभिभावक, विद्यालय व्यवस्थापन समितिका पदाधिकारीसहितको भेलाले ३६ बुँदे प्रतिबद्धता गरेको हो ।

गाउँपालिकाका शैक्षणिक स्रोतव्यक्ति पुष्पराज आचार्यले शिक्षा क्षेत्रमा देखिएका समस्या समाधानका लागि साझा प्रतिबद्धता आवश्यक रहेको महसुस गरी अभियानकै रूपमा प्रतिबद्धता व्यक्त गरिएको बताए । यसले गाउँपालिकालाई पूर्ण साक्षर बनाउन महत्त्वपूर्ण योगदान दिने उनको भनाइ छ ।

समूहगत छलफलका आधारमा तय भएका साझा प्रतिबद्धतामा कक्षा १ देखि ३ सम्म नेपाली विषयको ९० मिनेटको एक पिरियड लिने, विद्यालयमा बालमैत्री कक्षा तथा शैक्षिक सामग्री निर्माण तथा व्यवस्थापन गर्ने, विद्यालयमा पठनपाठनका लागि वार्षिक कार्यतालिका निर्माण गर्ने, प्रत्येक शिक्षकले वार्षिक शैक्षणिक योजना र दैनिक पाठ्ययोजना बनाएर शिक्षण गर्ने, आउने जेठसम्म बालकेन्द्रित विपद् व्यवस्थापन, विद्यालय खानेपानी तथा सरसफाइ, सुरक्षित विद्यालयजस्ता विषयवस्तु समेटेर विद्यालय सुधार योजना निर्माण गरी गाउँपालिकाको शिक्षा शाखामा पेश गर्ने, बालमैत्री बसाइँ व्यवस्थापन, शुक्रबारलाई १ बजेपछि पनि गाउँपालिकाको शैक्षिक पात्रोअनुसार क्रियाकलाप सञ्चालन गर्नेलगायत रहेका छन् ।

गाउँपालिका अध्यक्ष खडानन्द चौलागाईले दरबन्दी मिलान र अनियमित शिक्षकको तलब कट्टीका काम गत वर्षदेखि नै सुरु गरिसकेको बताए । ‘विद्यालयशिक्षा सुधारमा शिक्षकको पहिलो भूमिका रहन्छ,’ उनले भने, ‘अन्य सरोकारवालाले पनि आआफ्नो तर्फबाट राम्ररी काम गरे भने हामीले खोजेको परिणाम पाउन सक्छौं ।’

प्रकाशित : भाद्र ८, २०७६ ०९:४२
प्रतिक्रिया
पठाउनुहोस्

शारदाको भेलले सम्पर्क विच्छेद

कान्तिपुर संवाददाता

सल्यान — त्रिवेणी गाउँपालिका–१ काभ्रा र २ नम्बर वडाको कारागिठी जोड्न शारदा खोलामा पुल छैन । सदरमुकाम खलंगा र गाउँपालिकाको कार्यालय रहेको लुहाम आउजाउ गर्नेले खोला नतरी सुख छैन । 

खोलामा पुल नभएकाले वर्षामा स्थानीय आउजाउ गर्न सक्दैनन् । सरकारी सेवा गाउँमा नपुग्ने, केन्द्र आफैं धाएर जान खोलाले बाधा पर्दा दुर्गमका बासिन्दालाई सास्ती छ ।

शारदा खोलामा पुल नहुँदा साबिक कारागिठी गाविसका ४ सय ६३ घरधुरीलाई मर्का परेको हो ।स्थानीय कर्णबहादुर बोहराले कारागिठीसम्म पुग्ने सडक भए पनि खोलामा पुल नभएकाले यतिबेला गाडी पनि नचलेको बताए । ‘राजागिठी र शंखपीपल जोड्ने झोलुंगे पुल तर्न नै कम्तिमा एक घण्टा हिड्नुपर्छ,’ उनले भने, ‘पुल पनि धराप छ । त्यो पुलबाट आउजाउ गर्न नपरे हुन्थ्यो जस्तो लाग्छ ।’

पक्की पुल नहुँदा स्थानीयलाई खाद्यान्न र दैनिक उपभोग्य सामग्री ढुवानी गर्न समस्या छ । सरकारका निकायमा पुल निर्माणका लागि बारम्बार आग्रह गरिए पनि बेवास्ता भइरहेको स्थानीयको गुनासो छ । पुद निर्माणका लागि स्थानीय तहले बजेट हाल्न सक्ने हैसियत नभएको गाउँपालिकाका अध्यक्ष मानबहादुर डाँगीले बताए । ‘शारदा खोलामा पक्की पुल गर्न गाउँपालिकाको बजेटले भ्याउँदैन,’ उनले भने, ‘प्रदेश र संघीय सरकारको ध्यानाकर्षण गराएकाछौं, सुनेनन् ।’

प्रकाशित : भाद्र ८, २०७६ ०९:४२
पूरा पढ्नुहोस्
प्रतिक्रिया
पठाउनुहोस्