शारदाको भेलले सम्पर्क विच्छेद

कान्तिपुर संवाददाता

सल्यान — त्रिवेणी गाउँपालिका–१ काभ्रा र २ नम्बर वडाको कारागिठी जोड्न शारदा खोलामा पुल छैन । सदरमुकाम खलंगा र गाउँपालिकाको कार्यालय रहेको लुहाम आउजाउ गर्नेले खोला नतरी सुख छैन । 

खोलामा पुल नभएकाले वर्षामा स्थानीय आउजाउ गर्न सक्दैनन् । सरकारी सेवा गाउँमा नपुग्ने, केन्द्र आफैं धाएर जान खोलाले बाधा पर्दा दुर्गमका बासिन्दालाई सास्ती छ ।

शारदा खोलामा पुल नहुँदा साबिक कारागिठी गाविसका ४ सय ६३ घरधुरीलाई मर्का परेको हो ।स्थानीय कर्णबहादुर बोहराले कारागिठीसम्म पुग्ने सडक भए पनि खोलामा पुल नभएकाले यतिबेला गाडी पनि नचलेको बताए । ‘राजागिठी र शंखपीपल जोड्ने झोलुंगे पुल तर्न नै कम्तिमा एक घण्टा हिड्नुपर्छ,’ उनले भने, ‘पुल पनि धराप छ । त्यो पुलबाट आउजाउ गर्न नपरे हुन्थ्यो जस्तो लाग्छ ।’

पक्की पुल नहुँदा स्थानीयलाई खाद्यान्न र दैनिक उपभोग्य सामग्री ढुवानी गर्न समस्या छ । सरकारका निकायमा पुल निर्माणका लागि बारम्बार आग्रह गरिए पनि बेवास्ता भइरहेको स्थानीयको गुनासो छ । पुद निर्माणका लागि स्थानीय तहले बजेट हाल्न सक्ने हैसियत नभएको गाउँपालिकाका अध्यक्ष मानबहादुर डाँगीले बताए । ‘शारदा खोलामा पक्की पुल गर्न गाउँपालिकाको बजेटले भ्याउँदैन,’ उनले भने, ‘प्रदेश र संघीय सरकारको ध्यानाकर्षण गराएकाछौं, सुनेनन् ।’

प्रकाशित : भाद्र ८, २०७६ ०९:४२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

पञ्चकोसीको डीपीआर भएन

ज्योति कटुवाल

दैलेख — गत स्थानीय तह निर्वाचनमा ठूला राजनीतिक दलका चुनावी घोषणापत्रमा प्रमुखताका साथ समावेश प्रतिवद्धता थियो– पञ्चकोसी क्षेत्रको विस्तृत परियोजना प्रतिवेदन (डीपीआर) तयार गरी विकास गर्ने । स्थानीय तहमा चुनावबाट जनप्रतिनिधि आएको दुई वर्ष पुगे पनि त्यो काम भने अझै सुरु हुन सकेको छैन ।

नारायण नगरपालिकामा तत्कालीन एमालेबाट नगर प्रमुखको उम्मेदवार बनेका रत्नबहादुरखड्काले कोटिलामा पञ्चकोसी मानवनिर्मित ताल, चक्रपथ, शिक्षा, स्वास्थ्य, खानेपानी, रिङरोड, पूर्वाधारजस्ता विकासका मुख्य एजेन्डा अघि सारेका थिए ।

चुनावबाट नगर प्रमुखको कुर्सीमा बसेका तिनै खड्का अहिले विभिन्न कारणले डीपीआर बनाउन नसकेको बताउँछन् । ‘सत्ता र कुर्सीमा मात्र बसेर नहुने रहेछ, काम गर्नलाई सहयोग गर्ने हातको पनि उत्तिकै खाँचो छ,’ उनले भने, ‘कर्मचारीतन्त्रको असहयोगले काम गर्नै सकिएको छैन ।’

२०५४ सालमै नगर प्रमुख हुँदा पञ्चकोसीको विकासबारे सोचे पनि काम गर्न नसकिएको उनले स्विकारे । नगरपालिकाले अघिल्लो आर्थिक वर्षमा पञ्चकोसी क्षेत्रको विकासका लागि २५ लाख रूपैयाँ विनियोजन गरे पनि काम भने हुन सकेन । चालु आर्थिक वर्षमा डीपीआरका लागि २२ लाख रुपैयाँ छुट्याइएको छ ।

यसैगरी प्रदेश सरकारको उद्योग, पर्यटन, वन तथा वातावरण मन्त्रालयले चालु आर्थिक वर्षमा पञ्चकोसी क्षेत्रका लागि ३ करोड रूपैयाँ छुट्याएको छ । नारायण नगरपालिकाका इन्जिनियर विशेष शर्माले गत आर्थिक वर्षको २५ लाख र चालु आर्थिक वर्षको २२ लाख गरी ४७ लाखमा डीपीआरको काम हुने बताए । उनका अनुसार नगरपालिकाले प्रस्ताव पेश गर्ने कन्सल्टेन्सीको आर्थिक र प्राविधिक मूल्यांकनको काम गरिरहेको छ । विभिन्न चारवटा कम्पनीले कामका लागि प्रस्ताव पेश गरेका छन् ।

पञ्चकोसी क्षेत्रको कोटिलमा बन्ने भनिएको मानवनिर्मित ताल दुल्लु र नारायण नगरपालिकामा पर्छ । यसले गर्दा पनि दुवै नगरपालिकाबीच समन्वय गरी काम हुने दुल्लुका नगर प्रमुख घनश्याम भण्डारीले बताए । उनले पञ्चकोसी क्षेत्रको डीपीआर तयार गरी विकास सुरु भएमा समग्र जिल्लाको पर्यटकीय क्षेत्रमा विकास हुने बताए ।

वर्षौंदेखि पञ्चकोसीको डीपीआर गर्ने भनिए पनि सोअनुसार नहुँदा स्थानीय आक्रोशित छन् । उनीहरूले डीपीआर छिटो तयार गरी खेतबारीको मुआब्जा प्रक्रिया अघि बढाउन माग पनि गरेका छन् । जिल्ला समन्वय समितिका प्रमुख प्रेम थापाले यो वर्ष जसरी पनि काम गर्नुपर्ने बताए । उनले सम्बन्धित स्थानीय तह र प्रदेश सरकारबीच समन्वय गरी काम अघि बढाइनुपर्ने बताए ।

प्रकाशित : भाद्र ८, २०७६ ०९:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT