गमगढी–नाग्मा सडक : गाडी नचल्दा भाउ अकासियो

गाडी चालक भन्छन्, ‘जताततै पहिरोको जोखिम छ, सामान्य वर्षा भए पहिरो खस्न थाल्छ, यस्तोमा कसरी गाडी चलाउनु ?’
राजबहादुर शाही

मुगु — अविरल वर्षाले ठाउँठाउँमा हिलाम्मे बनेपछि गमगढी–नाग्मा सडकको बेहाल भएको छ । पहिरो र हिलोका कारण यातायातका साधन सञ्चालनमा समस्या भएपछि यात्रुले सास्ती भोग्दै आइरहेका छन् ।

गमगढीदेखि घुच्चीलेकसम्मको २३ किमि सडक वर्षाका कारण सबैभन्दा बढी प्रभावित भएको छ । तलितुमदेखि मइतुलेकसम्मको ठाउँठाउँमा पानी जमेपछि यातायातका साधन फस्ने गरेको छ ।

सडकको जीर्ण अवस्थाकै कारण जहाजमार्फत रारा विमानस्थलमा ओर्लिएका यात्रु हिँडेरै गमगढी पुग्न बाध्य छन् । सडकमा सानादेखि ठूला सवारीसाधन चल्न समस्या भएको काञ्जीरोवा यातायात प्रालिका रमेश मल्ल बताउँछन् । उनका अनुसार यातायातका साधन ठाउँठाउँमा फसेर अलपत्र छन् ।

गाडी चल्न नसकेपछि यात्रुलाई बीच बाटोमै झारेर हिँडाउनुपर्ने बाध्यता भएको उनको भनाइ छ । रारा विमानस्थलमुनिको १२ मिटर सडकमा पहिरोको जोखिम बढेको उनले जानकारी दिए । ‘जताततै पहिरोको जोखिम छ, सामान्य वर्षा भए पहिरो खस्न थाल्छ,’ उनले भने, ‘यस्तोमा कसरी गाडी चलाउनु ?’

स्थानीयका अनुसार ताल्चादेखि पिना, झ्यारी, सातमोडलगायत स्थानमा पहिरो खस्ने क्रम बढ्दै गएको छ । सोरु गाउँपालिका ६ का केशर शाहीले सडकमा यातायातका साधन नचल्दा दिनभर हिँड्नुपर्ने बाध्यता भएको सुनाए । उनका अनुसार गमगढीदेखि रारा गिलाह–तारापानीसम्मको २३ किमि सडक पनि वर्षाका कारण अवरुद्ध छ । ‘ठाउँठाउँमा पहिरो छ, पहिरोले सडकमै रुख ढलेका छन्,’ उनले भने, ‘सम्बन्धित निकायले पहिरो नहटाउँदा सर्वसाधारणलाई सास्ती भयो ।’

गमगढी–रारा–गिलाह सडकमा पनि यातायातका साधन नचल्दा समस्या भएको सोरु गाउँपालिका ४, का गंगबहादुर शाही बताउँछन् । उनका अनुसार गमगढीदेखि चैन–बालैसम्मको सडकको अवस्था पनि जीर्ण छ । सवारीसाधन चल्न छोडेपछि स्थानीयलाई गमगढी आउआउ गर्न मुस्किल भएकोउनले सुनाए ।

‘दैनिक उपभोग्य वस्तु र विकास निर्माणका सामग्री ढुवानीमा समस्या भएपछि भाउ अकासिएको छ,’ उनले भने, ‘गाउँमा उत्पादित कृषिजन्य उत्पादन कुहिने अवस्था छ ।’ जुम्लाको गोठिज्युलादेखि कालाकाडा हुँदै गम्थासम्मको ३५ किमि सडकमा यातायातका साधन १ महिनादेखि चल्न सकेका छैनन् ।

ढुवानी समस्याले दैनिक उपभोग्य सामग्रीको मूल्य १५ प्रतिशतसम्म बढाउनुपरेको गम्थाका व्यापारी लोकराजदाहाल बताउँछन् । ‘ढुवानी सहज हुनबित्तिकै सामानको भाउ घट्नेछ,’ उनले भने, ‘सडकको अवस्था हेर्दा अझै १/२ महिना यातायातका साधन सञ्चालनमा समस्या हुने देखिएको छ ।’

नाग्मा–गमगढी सडकको ट्र्याक खुलेको दशक पुगे पनि स्तरोन्नति नहुँदा हिमपात र झरीले यातायातका साधन अवरुद्ध हुने गरेको छ । साउन तेस्रो सातादेखि वर्षा हुन थालेपछि सडकको अवस्था बेहाल हुन थालेको हो । सडक डिभिजन कार्यालय जुम्लाले अवरुद्ध सडक खुलाउन चासो नदेखाएको स्थानीयको गुनासो छ ।

प्रकाशित : भाद्र ६, २०७६ ०९:३७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

‘गुटबन्दीले जनताको विश्वास गुम्यो’

कान्तिपुर संवाददाता

वीरेन्द्रनगर — नेपाली कांग्रेसका तल्लो तहका नेताले पार्टी भित्रको गुटबन्दीका कारण जनताले विश्वास नगरेको बताएका छन् । नेतृत्व तहमा देखिएको गुटबन्दीले कार्यकर्ता तथा मतदाता विभाजित भएको उनीहरूको गुनासो छ ।

केन्द्रीय नीति अनुसन्धान तथा प्रशिक्षण प्रतिष्ठानद्वारा बिहीबार वीरेन्द्रनगरमा आयोजित प्रशिक्षण कार्यक्रममा सहभागी कार्यकर्ताले यस्तो चिन्ता व्यक्त गरेका हुन् ।

कांग्रेसलाई आगामी निर्वाचनमा पहिलो पार्टी बनाउन वृहत एकताको आवश्यकता रहेको कांग्रेसका दैलेख जिल्ला सभापति कृष्णकुमार बीसीले बताए । ‘सबै तहका कार्यकर्ताले पार्टीलाई एक बनाउन लाग्नुपर्छ,’ उनले भने, ‘पार्टीभित्र गुटबन्दी भईराखेमा जनताले दुःख पाईरहनेछन् ।’ कांग्रेस कमजोर भएका कारण लोकतन्त्र कमजोर हुँदै गएको उनले जिकीर गरे । जनताका आधारभुत आवश्यकता पूरा गर्न नेतृत्वबाट एकताको सुरुवात गर्न आवश्यक रहेको कार्यकर्ताको भनाइ छ ।

नेतृत्व तहमा देखिएको अहमताका कारण कार्यकर्ता विभाजित भएको केन्द्रिय नीति अनुसन्धान तथा प्रशिक्षण प्रतिष्ठानका सदस्य मोतिराज बमले टिप्पणी गरे । ‘माथि पुगिसकेपछि कार्यकर्ता बन्न नचाहने नेतृत्वमा घमण्ड छ,’ उनले भने, ‘यस्तो सोच त्यागेर म जनता र कार्यकर्ताको नेता हुँ भन्ने सोचेर नेतृत्वले सबैलाई एकतामा बाँध्न सक्नुपर्छ ।’
कांग्रेस कार्यकर्ता चुके बादीले गुटबन्दी अन्त्य नभएसम्म कांग्रेस सधैँ पछाडि पर्ने बताए । ‘नेतृत्व सधैँ लडिरहे कार्यकर्ता पनि मिल्न सक्दैनन्,’ उनले भने, ‘अहिले पार्टीभित्र मौलाएको गुटबन्दीका कारण नै जनताले विश्वास गर्दैनन् ।’

नेतृत्वबाटै गुटबन्दी सुरु भएको भन्दै उनले आगामी चुनावमा पहिलो पार्टी बनाउन सबै कार्यकर्तालाई एकतामा बाँध्ने कामको सुरुवात गर्नुपर्ने बताए । अहिले पार्टीले सुरु गरेको प्रशिक्षणले पनि एकताको सुरुवात गर्ने विश्वास कर्णालीका कांग्रेस नेता तथा कार्यकर्ताले लिएका छन् ।

कांग्रेस रुकुमका पूर्वसभापति मानबहादुर नेपालीले कांग्रेसलाई बलियो बनाउन नेतृत्वले नै सुरु गरेको गुटबन्दी अन्त्य गर्नुपर्ने बताए । ‘दुईटा नाउमा खुट्टा राखेर सफल भईँदैन,’ उनले भने, ‘यसरी विभाजित भएपछि आगामी निर्वाचनमा झन् नराम्रो हार बेहोर्नुपर्नेछ ।’

बिहीबार सम्पन्न हुने
प्रशिक्षण कार्यक्रमको उद्घाटन सत्रमा वरिष्ठ नेता रामचन्द्र पौडेलले अब जनताको भरोसाको केन्द्र नै कांग्रेस हुने दाबी गरे ।

कम्युनिस्ट सरकारले जनताका सपनामाथि खेलबाड गरेको भन्दै उनले अब कांग्रेसलाई जनताको भरोसाको केन्द्र बनाउन आधारस्तम्भ खडा गनुपर्ने बताए । ‘विगतका कमजोरी औँल्याएर सबै एक हुन आवश्यक छ,’ उनले भने, ‘यो प्रशिक्षणले पार्टीमा नेता(नेताबिच देखिएको मतभेद पनि अन्त्य हुने विश्वास लिएको छु ।’

कांग्रेस उपसभापति विमलेन्द्र निधिले कांग्रेसलाई बलियो बनाउन सक्रिय कार्यकर्तालाई अगाडि ल्याउनुपर्नेमा जोड दिए । उनले गुटभन्दा पनि पार्टीको सिद्धान्तलाई प्राथमिकतामा राखेर अब अगाडि बढ्ने बेला आएको बताए ।

जनतासँग अन्तर्क्रिया तथा भेटघाट गरी उनीहरूका समस्या बुझ्ने कामको सुरुवात गर्न उनले कार्यकर्तालाई निर्देशन पनि दिएका छन् ।

प्रकाशित : भाद्र ६, २०७६ ०९:३५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT