वर्षामा सधैं सास्ती
जाजरकोट — ८० किमि लामो जाजरकोट ब्युलीढंगा–जुम्ला सडकअन्तर्गत पाँचकाटिया खण्डमा ट्र्याक खुलेको १२ वर्ष बित्यो । खलंगा–पाँचकाटीया खण्ड निर्माणका लागि २५ करोड खर्च भइसकेको छ ।
त्यस्तै जाजरकोट डोल्पा सडक (भेरी करीडोर) को सुरुको खण्ड खलंगा–रिम्नाको ट्र्याक खुलेको पनि करिब १४ वर्ष पुग्यो ।
निर्माण सकिएको दशक बित्दासमेत यी दुई सडकको स्तरोन्नति हुन सकेको छैन । स्तरोन्नति नहुँदा यी सडकमा वर्षायाममा यात्रुले सास्ती भोग्दै आएका छन् । वर्षाले सडकमा पहिरो खस्नु, हिलाम्मे हुनु, खाल्डाखुल्डी बढ्नु, खोलामा पुल अभावलगायत कारण यातायातका साधन सञ्चालनमा समस्या भएको हो । खलंगा–पाँचकाटीया र खलंगा–रिम्ना सडकमा नाली, तारजाली पर्खाल, ढल निकास, ग्राभेललगायत स्तरोन्नतिका काम नहुँदा यात्रु कष्टकर यात्रा गर्न बाध्य भएका हुन् ।
स्थानीय प्रेमबहादुर थापाले सडक स्तरोन्नति नहुँदा र खोलामा पुल नबन्दा वर्षौंदेखि सास्ती भोग्न बाध्य भइरहेको बताए । ट्र्याक खोल्न करोडौं खर्चेका सडकमा यातायातका साधन सञ्चालन हुन नसक्नु दुःखद भएको उनी बताउँछन् । उनका अनुसार वर्षाका ४ महिना गाडी नचल्दा घण्टौं पैदल यात्रा गर्नुपर्ने बाध्यता छ ।
जाजरकोट–डोल्पा राष्ट्रिय सडक सञ्जालसँग जोडिए पनि भेरीे ‘जिरो प्वाइट’ पासागाडदेखि नै स्तरोन्नतिको काम अघि बढ्न सकेको छैन । १ सय १८ किमि जाजरकोट–डोल्पा सडकको पहिलो चरणको सडकको ट्र्याक खोल्ने कार्य मात्र पूरा भएको छ । वर्षाले यो सडकको खलंगा–रिम्ना–कालीमाटी–तल्लुसम्म गाडी सञ्चालन हुन सकेका छैनन् ।
हिउँदमा धुलाम्मे तथा वर्षामा हिलाम्मे सडकका कारण स्थानीय आजित छन् । डोल्पा सडकको कालेगाउँ, रावतगाउँ, पिपे, रिम्ना, रुकुमको छेपारे, पिपलचौरलगायत स्थानमा खाल्डाखुल्डी, पहिरो खस्दा र हिलाम्मे हुँदा यातायात सञ्चालनमा समस्या भएको हो । त्यस्तै खलंगा–पाँचकाटीया सडक २ महिनादेखि ठप्प भएको छ । सडक अवरुद्ध हुँदा सर्वसाधारण २/३ दिन पैदल हिँड्न बाध्य छन् ।
वर्षाले दैनिक उपभोग्य सामग्री र कृषि उत्पादनको ढुवानीमा समस्या भएको छ । भेरी करीडोर र जाजरकोट–जुम्ला जोड्ने रणनीतिक मार्ग बजेट अभावमा स्तरोन्नति हुन नसकेका हुन् । ट्र्याक खोल्नमै करोडौं खर्चेका सडकमा यातायातका साधन नगुडदा लगानी खेर गएको प्रमुख जिल्ला अधिकारी ललितकुमार बस्नेतले वताए ।
‘सडकमा ट्र्याक्टर र जीपसमेत राम्ररी गुड्नसक्ने अवस्था छैन,’ उनले भने, ‘जसका कारण जनजीवन प्रभावित बनेको छ ।’ पाँचकाटीया–जुम्ला सडकको चौडाइ कम हुनु, नाली तथा ग्याबीङ पर्खाल नहुनु, अप्ठेरो रेखांकन, छोटा घुम्तीलगायत कारण यातायात सञ्चालन हुन नसकेको उनी बताउँछन् ।
सडक खण्डको गारराङ्सीदेखि नाउलीसम्मको रेखांकन गाडी चढ्नै नसक्ने गरी निर्माण भएको उनको भनाइ छ । उनका अनुसार जाजरकोटमा करोडौं बजेट खर्चेर निर्माण थालिएका ठूला ५ सहित करिव ४ दर्जन सडक अलपत्र छन् ।
प्रकाशित : भाद्र २, २०७६ ०९:३९