निषेधित क्षेत्रमै अवैध मदिरा

कान्तिपुर संवाददाता

कालीकोट — महिला हिंसा बढेको र शान्ति सुरक्षामा खलल पुगेको भन्दै जिल्ला सभाले गत फागुन १ गते कालीकोटलाई मदिरा निषेधित जिल्ला घोषणा गर्‍यो  । तर निषेधित क्षेत्रमा खुलेआम अवैध मदिरा बिक्री भइरहेको छ  ।

रास्कोट नगर प्रमुख काशीचन्द्र बरालको प्रस्तावमा जिल्लाभरका जनप्रतिनिधिले प्रस्तावको समर्थन गरेपछि मदिरा निषेधित क्षेत्र घोषणा गरिएको थियो ।

घोषणाको कार्यान्वयन नहुँदै उद्योग वाणिज्य संघले सुर्खेत उच्च अदालतको जुम्ला इजलासमा जिल्ला समन्वय समिति प्रमुख अनिपाल शाही, रास्कोट नगर प्रमुख काशीचन्द्र बराल, जिलला प्रहरी प्रमुख विनोद शर्मासहितलाई विपक्षी बनाएर मुद्दा दायर गरेको थियो । जुम्ला इजालासले व्यवसायीको पक्षमा फैसला गरेपछि सिलबन्दी गरिएका मदिरा बिक्री खुला भएको छ ।

तर, अवैध घरेलु मदिराको उत्पादन, बिक्री र सेवन भने निर्वाध चलिरहेको छ । सदरमुकामसहितका केही बजार क्षेत्रमा कहिलेकाहीं प्रहरीले छापा मारे पनि उत्पादन नरोकिएको पेय पदार्थ व्यवसायी संघका अध्यक्ष जीवनकुमार शाहीले बताए । उनले मदिरा ऐन २०३१ अनुसार अन्तःशुल्क तिरेको स्थानीय तहले चाहेर पनि रोक्न नमिल्ने दाबी गरे ।


पलाता गाउँपालिकाले पहिलो गाउँ सभाबाटै मदिरा निषेधित क्षेत्र घोषणा गरी मदिराविरुद्ध अभियान सुरु गरिएको थियो । तर मदिरा चोरी निकासी गर्ने र लुकेर कारोबार हुने क्रम रोकिएन । गाउँपालिका अध्यक्ष लक्ष्मणबहादुर बमले लुकीछिपी मदिरा बिक्री हुँदा पूर्णर् रूपमा बन्द गर्न नसकिएको जनाए ।

मदिरा निषेधित पलातामा मदिरा सेवन गरी साउन ७ गते पलाता ८, का २४ वर्षीय मञ्जन बमको थिर्पु, बाख्रे बजारमा मत्यु भएको थियो भने साउन १८ गते राति मदिरा सेवन गरी स्थानीय जगदीशकुमार पूर्वेले पलाता एफएमका उपकरण तोडफोड गरेका थिए ।

प्रकाशित : श्रावण २९, २०७६ १२:५७
प्रतिक्रिया
पठाउनुहोस्

भवन रित्तै, उपचार जीर्ण भवनबाट

हरि गौतम

रुकुम पश्चिम — त्रिवेणी गाउँपालिका १०, मा रहेको स्वास्थ्यचौकीका लागि ४ कोठे नयाँ भवन बनाइएको छ  । तर गाउँपालिकाको लगानीमा बनाइएको भवन झन्डै डेढ वर्षयता खाली छ  ।

बिरामी भने जीर्ण भवनबाट उपचार गराउन बाध्य भइरहेका छन् । वडा ८ मा सञ्चालन भइरहको स्वास्थ्यचौकी आफ्नै भवनमा सार्न अलमल भएपछि उपचारमा समस्या भएको हो ।

आफ्नै जग्गामा स्वास्थ्यचौकी राख्न बनाइएको भवन प्रयोगमा नआउँदा त्यसको संरक्षण हुन नसकेको स्थानीय बताउँछन् । अहिले सञ्चालन भइरहेको स्वास्थ्यचौकी भवन भत्कन लागेपछि स्वास्थ्यकर्मी चिन्तित छन् । ‘पुरानो घरबाट उपचार र अन्य सेवा दिइरहेका छौं,’ स्वास्थ्यचौकी इन्चार्ज वीरबहादुर डाँगीले भने, ‘घर जीर्ण हुँदा सजिलै सेवा प्रवाह गर्न सकिएको छैन, भत्कने अवस्थाको चुहिने भवनमा उपचार गर्दा हामी नै जोखिममा छौं ।’ घाम लाग्दा बाहिर र पानी पर्दा कोलियामा उपचार गर्ने गरेको डाँगीले बताए । उनका अनुसार न घरको आँगन छ, न शौचालय ।


घर कच्ची हुँदा उपचारमा थप समस्या भइरहेको उनी बताउँछन् । स्वास्थ्यचौकी व्यवस्थापन समितिले निर्णय नगर्दा स्वास्थ्य चौकी नयाँ भवनमा सार्न नसकेको उनले जानकारी दिए । गाउँपालिकाले पटकपटक स्वास्थ्यचौकी सार्नु भनेर चिठी पठाए पनि स्वास्थ्यचौकी व्यवस्थापन समितिले त्यसको वास्ता गरेको छैन ।

वडा ८ का अध्यक्ष कर्णबहादुर खडका स्वास्थ्यचौकी व्यवस्थापन समिति अध्यक्ष छन् । स्वास्थ्यचौकी साबिक पेउघा गाविसको हो । साबिक पेउघा गाविसलाई त्रिवेणी गाउँपालिकाको ८, ९ र १० वडामा विभाजन गरिएको छ । अहिले वडा ८ मा स्वास्थ्यचौकी छ । वडा १० मा स्वास्थ्यचौकीका लागि भवन बनाइएको छ । स्वास्थ्यचौकी रहेको ठाउँबाट नयाँ भवन पुग्न १० मिनेटको पैदल छ । तर, वडा फरक भएपछि व्यवस्थापन समितिले स्वास्थ्यचौकी नयाँ भवनमा सार्न मानेको छैन ।


व्यवस्थापन समिति अध्यक्ष खडकाले स्वास्थ्यचौकी रहेको हालको घर जीर्ण रहे पनि वडा १० मा नभई वडा ८ कै अर्को सुरक्षित ठाउँमा स्वास्थ्य चौकी सारिने बताए । ‘कानुनी रूपमै वडा ८ मा स्वास्थ्यचौकी उल्लेख छ, वडा १० मा छैन,’ अध्यक्ष खडकाले भने, ‘वडा १० मा स्वास्थ्यचौकी भएको र ८ मा नभएको बनाउने हो भने मात्रै वडा १० मा सार्न सकिन्छ ।’ वडा १० मा प्रसूति गृहका लागि भवन बनेको उनको भनाइ छ । प्रसूति गृहका लागि बनेको भवनमा स्वास्थ्य चौकी सार्न सक्ने अवस्था नरहेको उनको दाबी छ ।

प्रकाशित : श्रावण २९, २०७६ १२:५७
पूरा पढ्नुहोस्
प्रतिक्रिया
पठाउनुहोस्