चार थान भरुवा बन्दुकसहित दुई जना पक्राउ

विप्लव महर्जन

सल्यान — जिल्ला प्रहरी कार्यालय र सशस्त्र प्रहरी बल सल्यानबाट गस्तीमा खटिएको संयुक्त टोलीले कालीमाटी गाउँपालिका–५ बालुवाको मनिकापुरमा चार थान भरुवा बन्दुकसहित दुई जनालाई पक्राउ गरेको छ । 

पक्राउमा पर्नेमा बालुवाका ७० वर्षीय चन्द्रबहादुर रोका र स्थानीय टेकबहादुर कुमाल रहेको जिल्ला प्रहरी कार्यालयमा सल्यानका प्रहरी नायब उपरीक्षक विरेन्द्रबहादुर शाहीले जानकारी दिए ।

दुवै जनाले घरमा लुकाई राखेको अवस्थामा बरामद गरेको उनले जानकारी गराए । उनका अनुसार दुवैका दुई/दुई थान एकनाले भरुवा बन्दुक रहेका छन् । पक्राउमा परेकालाई हिरासतमा राखेर अनुसन्धान भइरहेको प्रहरी नायब उपरीक्षक शाहीले बताए ।

प्रकाशित : श्रावण २७, २०७६ १२:००
प्रतिक्रिया
पठाउनुहोस्

महिला हत्या आरोपमा दुई पक्राउ

रासस

महोत्तरी — महोत्तरी प्रहरीले मोबाइलको आइएमइ नम्बरको आधारमा एक महिलाको हत्यामा संलग्न दुई जनालाई पक्राउ गरेको छ ।

गत असार ५ गते गौशाला नगरपालिका–१० बस्ने अन्जुकुमारी श्रेष्ठको हत्या भएको घटनालाई अनुसन्धानका क्रममा मृतक श्रेष्ठले बोक्दै आएको मोबाइलको आइएमइका आधारमा स्थानीय दुई जनालाई गौशाला प्रहरीले घरबाटै पक्राउगरेकाे हो।

आइतबार पक्राउ परेका गौशाला नगरपालिका–२ का ४१ वर्षीय दशै ठाकुर र सोही नगरपालिका–८ का ३६ वर्षीय राजकिशोर गिरीलाई इलाका प्रहरी कार्यालय गौशालाले साेमबार बिहान पत्रकार सम्मेलन गर्दै सार्वजनिक गरेको छ। इलाका प्रहरी कार्यालय गौशालाका अनुसार मृतक श्रेष्ठले बोक्दै आएको मोबाइल गिरीको घरमा बरामद भएको र सोहीको अनुसन्धान गर्ने क्रममा उनीहरुलाई पक्राउ गरिएको हो।

गत असार ५ गते मध्यरातको समयमा श्रेष्ठलाई धरिलो हतियार प्रहार गरी हत्या गरिएको थियो। हतियार प्रहार गरी फरार भएको समूहले मृतक श्रेष्ठले बोक्दै आएको मोबाइलसमेत लुटेका थियो। हत्याको घटनाको अनुसन्धानको क्रममा मोबाइलको आइएमइको आधारमा उनीहरुलाई पक्राउ गर्न सफल भएको प्रहरी निरीक्षक किशोर आचार्यले पत्रकारलाई बताए।

प्रहरी निरीक्षक आचार्यका अनुसार आरोपीलाई जिल्ला अदालतबाट एक हप्ताको म्याद थप गरी अनुसन्धान अगाडि बढाएकाले अनुसन्धानबाट थप सत्यतथ्य बाहिर आउने जनाए।

गौशाला बजारमा सञ्चालित निर्धन उत्थान बैंकमा कार्यरत श्रेष्ठलाई मध्यराति निजकै घरमा चक्कु प्रहार गरिएको थियो। गम्भीर घाइते अवस्थामा रहेकी श्रेष्ठको उपचारको लागि जनकपुर लैजाने क्रममा बाटोमा नै मृत्यु भएको थियो।

प्रकाशित : श्रावण २७, २०७६ ११:३३
पूरा पढ्नुहोस्
प्रतिक्रिया
पठाउनुहोस्