सल्ली–जाजरकोट–डोल्पा सडक : १४ वर्षपछि फर्कियो सेना

३ जिल्लामा सडक पुर्‍याउन ०६१ मा सल्यानको सल्लीबजारमा बेस क्याम्प राखी सेनाले सडक निर्माण थालेको थियो । रुकुमको चौरजहारी र जाजरकोट सदरमुकामलाई ०६५ मा सडक सञ्जालसँग जोडेसँगै जाजरकोट–डोल्पा सडक निर्माणको काम सुरु गरिएको नेपाली सेनाले जनाएको छ ।

सेनाका अनुसार जाजरकोट सडकअन्तर्गत १ सय १८ किलोमिटर सडकको ट्र्याक खोलिएको हो । सडक निर्माणको काम सकिएपछि जाजरकोटको मन्मै र तल्लु, रुकुमको मन्काबगर र त्रिवेणी तथा डोल्पाको खदाङ, घाउने र सुलिगाडमा राखिएका सुरक्षा बेस क्याम्प हटाइएको जाजरकोट–डोल्पा सडक निर्माण कार्यदल प्रमुख, प्रमुख सेनानी विश्वबन्धु पहाडीले बताए । उनी नेतृत्वकै टोलीले सल्लीबजार देवस्थल कैनकाँडा हुँदै चौरजहारीसम्मको ४१ किलोमिटर र सुर्खेतको राकम हुँदै जाजरकोट खलंगासम्मको १ सय ७ किलोमिटर सडक निर्माण गरेको थियो ।

०६५ देखि सुरु भएको जाजरकोट–डोल्पा सडकको काम सुरुमा रेखांकन विवादका कारण २ वर्ष रोकिएको थियो । मुडेचुला गाउँपालिका १ का लंकबहादुर रोकायाले सडकको ट्र्याक खुलेसँगै डोल्पाका बासिन्दामा खुसियाली छाएको बताए ।

जिल्ला समन्वय समितिका उपप्रमुख नरबहादुर बुढाले सडकसँगै डोल्पामा समृद्धि भित्रन सुरु भएको बताए । सरकारले भेरी करिडोरमा यो सडकलाई समेटेर भारत र चीनसँग जोड्ने योजना बनाएको छ । चीनको स्वशासित क्षेत्र तिब्बतसँग जोडिएको मारिम्ला नाकाबाट तिन्जे, धो, लसिक्याप हुँदै डोल्पाको सदरमुकाम दुनै जोड्ने र दुनैबाट त्रिपुराकोट, खदाङ, त्रिवेणी, जाजरकोट, छिन्चु र नेपालगन्जबाट रुपैडिहा जोड्ने सरकारी योजना छ ।

सस्तियो भान्सा, बढे बजार

सदरमुकाम दुनैसम्म सडकको ट्र्याक खुलेपछि डोल्पाका ग्रामीण क्षेत्रको भान्सा सस्तिएको छ । सडकको ट्र्याक खुलेसँगै गाउँगाउँमा टुक्रे बजार फस्टाउँदै गइरहेका छन् । सदरमुकामलाई विभिन्न गाउँसँग जोड्न ग्रामीण सडक निर्माण गर्ने क्रम बढिरहेको छ ।

अहिले काइगाउँ, त्रिवेणी, खदाङ, चुंगाड, लिकु, त्रिपुराकोट, जुफाललगायत साना बजार फस्टाउँदै गएको स्थानीय वीरभद्र बुढाले बताए । डोल्पा उद्योग वाणिज्य संघका अध्यक्ष लालिमान बुढाले बजार भाउ सस्तो भएपछि स्थानीयको जनजीवन सहज बन्दै गएको बताए ।