विपन्न परिवारलाई सौर्यऊर्जा

कान्तिपुर संवाददाता

सल्यान — त्रिवेणी गाउँपालिकाले ७ वटै वडाका विपन्न तथा दलित गरी ५४ परिवारलाई ५० वाटको सौर्यऊर्जा वितरण गरेको छ । गाउँपालिकालाई उज्यालो बनाउने कार्यक्रमअन्तर्गत विपन्न परिवारलाई निःशुल्क सोलार सेट वितरण गरिएको हो । 

प्रत्येक वडाका ८ घरधुरीलाई करिब १० लाख रुपैयाँको सौर्यऊर्जा वितरण गरिएको गाउँपालिकाले जनाएको छ । विद्युतीकरण नभएका र अति विपन्न परिवारका लागि सोलार सेट वितरण गर्न गाउँपालिकाले बजेट विनियोजन गरेको थियो ।

गाउँपालिका अध्यक्ष मानबहादुर डाँगीले गाउँमा बत्ती पुगे पनि अहिलेसम्म बिजुली जडान गर्न नसकेका परिवारलाई लक्षित गरी सोलार सेट वितरण गरिएको जानकारी दिए । उनका अनुसार ५० वाटको सोलारबाट न्यूनतम ५ बल्ब बाल्न सकिन्छ । टुकीका भरमा वर्षौंदेखि जीविका चलाउँदै आएका स्थानीयलाई क्रमशः विद्युतको पहुँचमा ल्याउन उज्यालो कार्यक्रम सञ्चालन गरिएको उनको भनाइ छ ।

सौर्यऊर्जा जडान भएपछि जनजीवन सहज हुने लक्षितवर्गको भनाइ छ । सल्लाको दियालो बालेर दैनिकी चलाउँदै आएका परिवारलाई सोलार वितरण गरेर स्थानीय सरकारले गुन लगाएको वडा २ की कमली विकले बताइन् ।

‘अहिलेसम्म सल्लाको दियालोले रात गुजार्दै आएका छौं,’ उनले भनिन्, ‘आर्थिक अवस्था कमजोर हुँदा गाउँमै उत्पादन गरिएको लघु जलविद्युतको लाइन जडान गर्न सकेका थिएनौं, सोलारले अब दैनिकी सहज बनाउनेछ ।’ रिखेबगरका नवीन नेपालीले सोलार भएपछि बालबालिकाको पठनपाठनमा समेत सहयोग पुग्ने बताए । उनले विपन्न परिवारका लागि रोजगारीका कार्यक्रम सञ्चालन गर्न आग्रह गरे ।

प्रकाशित : श्रावण २१, २०७६ ०९:४३
प्रतिक्रिया
पठाउनुहोस्

जिप धकेल्दै यात्रु

धेरै रकम खर्चेर बनाइएका सडक मर्मतका योजना छैनन्, बर्खामा अवरुद्ध हुँदा सर्वसाधारणलाई घण्टौं पैदल हिँडेर गन्तव्य पुग्नुपर्ने बाध्यता
मनोज बडू

दार्चुला — बर्खा सुरुभएपछि ग्रामीण सडकहरू अवरुद्ध भएका छन् । जिल्लाका ९ वटै स्थानीय तह ग्रामीण सडक सञ्जालसँग जोडिए पनि अहिले व्यास र अपीहिमाल गाउँपालिका सडक सञ्जालबाट विच्छेदको अवस्थामा छन् ।

दार्चुलाको महाकाली राजमार्ग बेत जंगलनजिक सडक हिलाम्मे भएपछि फसेको गाडी धकेल्दै यात्रु । तस्बिर : मनोज/कान्तिपुर

ग्रामीण सडक पहिरो र बाढीले अवरुद्ध भएका छन् । कतैकतै बाढीले सडक पनि बगाएको छ । नियमित वर्षा नभए केही सडकमा आधा दूरीसम्म यातायात सञ्चालन हुने गरे पनि धेरैजसो अवरुद्ध छन् । ‘बर्खा लागेदेखि खलंगा–दल्लेक–होपरी खण्डको दल्लेकसम्म गाडी सञ्चालन हुन्छ,’ स्थानीय विशनसिंह बुढाथोकीले भने, ‘बढी वर्षा भएको दिन दल्लेकको तल सेलासम्म मात्र जाने गर्छन् । माथि गयो भने गाडी फस्ने डरले बीचैबाट फर्काउँछन् । कहीं–कहीं गाडी फस्यो भने यात्रुले नै धकेल्नुपर्ने अवस्था आउने गरेको छ ।

भर्तोला–जौलजीवी सडक, खलंगा–दल्लेक–खार–धुलीगडा, बिटुले–पारिबगड, दार्चुला–तिंकर सडक अवरुद्ध छन् । खलंगा–हिकिला,
खलंगा–दल्लेक, गोकुलेश्वर–धुलीगडासडकमा भने आंशिक रूपमा यातायातका साधनहरू चल्ने गरेको यातायात व्यवसायीहरूले बताएका छन् ।

आंशिक रूपमा गाडीहरू सञ्चालन भए पनि जोखिम भने धेरै खेप्नुपर्ने जिप व्यवसायी महादेव जोशीले बताए । केही ग्रामीण सडकमा भने जोखिम मोलेर यातायात सञ्चालनभइरहेका छन् ।हिलाम्मे र खाल्डाखुल्डी सडकले सास्ती खेपेर सर्वसाधारण यात्रा गर्न बाध्य छन् । विभिन्न स्थानमा पहिरो खसेर पैदल हिँड्न पनि जोखिम रहेको नौगाड गाउँपालिका २ का रञ्जितसिंह धामीले बताए ।

हरेक वर्ष बर्खामा कच्ची सडक अवरुद्ध भइरहँदा सास्ती पाइने गरेको स्थानीयको पनि गुनासो छ । धेरै रकम खर्च गरेर बनाइएका सडकलाई मर्मतका योजना ल्याइएका छैनन् । वर्षामा अवरुद्ध सडक हुने भएकाले घण्टौं पैदल हिँडेर गन्तव्य पुग्नुपर्ने बाध्यता छ । हिलाम्मे सडकमा गाडीमा यात्रा गर्नु अत्यधिक जोखिम रहेको धामीको भनाइ छ ।

महाकाली राजमार्गबाहेक अन्य जिल्लाका कच्ची र ग्राभेल ग्रामीण सडक पहिरो र हिलोले अवरुद्ध हुन पुगेका यातायात व्यवसायीले बताएका छन् । यस क्षेत्रका बासिन्दा दैनिक उपभोग्य वस्तु लैजान तथा सदरमुकाम आवतजावत गर्न सबैभन्दा बढी सास्ती खेपिरहेको अपीहिमाल गाउँपालिकाका खडकसिंहलोथ्यालले बताए ।

प्रकाशित : श्रावण २१, २०७६ ०९:४२
पूरा पढ्नुहोस्
प्रतिक्रिया
पठाउनुहोस्