डिजेल प्लान्टबाट बिजुली

कान्तिपुर संवाददाता

जुम्ला — जुगाड खोला साना जलविद्युत् उपभोक्ता समितिले सदरमुकाम खलंगामा डिजेल प्लान्टबाट बिजुली बाल्ने तयारी गरेको छ । आयोजनाको मेसिन मर्मत गर्न ३ महिना बढी समय लाग्ने भएपछि डिजेल प्लान्टबाट बिजुली वितरणको तयारी गरिएको हो ।

घुघुतीस्थित पावर हाउसमा जडान गरिएका दुवै मेसिन बिग्रिएपछि सदरमुकाम खलंगा झन्डै महिनादिनदेखि अँध्यारोमा छ । मेसिन मर्मतका लागि दुवै जेनेरेटर जिल्लाबाहिर पठाइएको समितिले जनाएको छ । समितिका अनुसार विद्युतको वैकल्पिक व्यवस्थाका लागि डिजेल प्लान्ट मेसिन खलंगामा भित्र्याइसकिएको छ । २ सय किलोवाटको डिजेल प्लान्टबाट ३ महिनासम्म विद्युत् वितरण गरिने साना जलविद्युत उपभोक्ता समिति अध्यक्ष विष्णुबहादुर बुढथापाले बताए ।

चाडपर्वको समयमा स्थानीयको जनजीवन सहज बनाउन डिजेल प्लान्टको व्यवस्था गरिएको प्रतिनिधिसभा सदस्य गजेन्द्रबहादुर महतले बताए । समितिका अनुसार विद्युत् नहुँदा २२ हजार उपभोक्ता मर्कामा परेका छन् । निर्माणको जिम्मा लिएका ठेकेदारले काममा ढिलाइ गरेकाले कारबाही प्रक्रिया अगाडि बढाइने प्रमुख जिल्ला अधिकारी दुर्गा बन्जाडेले बताइन् ।

डिजल प्लान्टका लागि ५० लाख ऋण
घुघुतीमा रहेको विद्युत् गृहको मेसिन बिग्रिएपछि प्रतिनिधिसभा सदस्य महतले डिजल प्लान्ट जडानका लागि आवश्यक प्रक्रिया मिलाएका छन् । सांसद विकास कोषको ५० लाख रुपैयाँ समितिलाई दिनेगरी डिजल प्लान्ट सुरु गर्न लागिएको हो ।

तत्काल सांसद विकास कोषको रकम आइनसकेकाले चन्दननाथ बहुउद्देश्यीय सहकारी संस्थाबाट ऋण लिएर प्लान्ट जडान गरिएको हो । रकम आएपछि सहकारीको ऋण तिरिने उनको भनाइ छ । चन्दननाथ बहुउद्देश्यीय सहकारी संस्थाले विद्युत् आयोजनालाई नभई व्यक्तिलाई ऋण दिएको जनाएको छ ।

‘विद्युत्मा लगानी गरेका छैनौं,’ सहकारीका व्यवस्थापक ऋषिराम पाण्डेले भने, ‘व्यक्ति संस्थाको सेयर सदस्य भएकाले गजेन्द्र महतलगायत ३ जनालाई ऋण दिएका छौं । व्यवसाय सञ्चालनका लागि सहकारीले ऋण दिएको हो, उहाँहरूले जहाँ पनि लगाउन सक्नुहुन्छ ।’

प्रकाशित : श्रावण २०, २०७६ ०९:०३
प्रतिक्रिया
पठाउनुहोस्

थपिँदै विशेषज्ञ

कान्तिपुर संवाददाता

वीरेन्द्रनगर — स्थापनाकालदेखि नै विशेषज्ञ डाक्टरको अभाव झेल्दै आएको प्रदेश अस्पताल सुर्खेतमा विशेषज्ञ चिकित्सक थपिँदै छन् । योसँगै बिरामीको चाप पनि पहिलेभन्दा बढ्न थालेको छ ।

प्रदेश अस्पतालमा बिहीबार एकैपटक ५ विशेषज्ञ डाक्टर थपिएका छन् । छाला तथा यौनरोग विशेषज्ञ डा. प्रभावसिंह राजपुत, नाक, कान तथा घाँटीरोग विशेषज्ञ डा. सन्तोष बस्नेत, बालरोग विशेषज्ञ डा. प्रदीप पौडेल आएका हुन् ।

यस्तै, फिजिसियन डा. सन्जीव भण्डारी र हाडजोर्नी तथा नसा रोग विशेषज्ञ डा. सुभद्र श्रेष्ठले पनि अब प्रदेश अस्पतालबाटै विशेषज्ञ सेवा दिने भएका छन् । ५ डाक्टर थपिएसँगै अस्पतालमा दरबन्दी विकास समिति र छात्रवृत्तितर्फका गरी विशेषज्ञ डाक्टरको संख्या २० पुगेको छ ।

अस्पतालका अनुसार कर्णाली, सूदुरपश्चिम तथा ५ नम्बर प्रदेशबाट समेत गरी दैनिक ७ सयदेखि १ हजार बिरामी उपचारका लागि आउने गरेका छन् । सबैभन्दा बढी बिरामी आइतबार आउने गरेको अस्पतालले जनाएको छ । बिरामीको चाप बढदै जाँदा २० विशेषज्ञ डाक्टरले मात्रै प्रभावकारी सेवा दिन समस्या भइरहेको अस्पतालका मेडिकल रेकर्डर विनोद बस्नेतले जनाए । विश्व स्वास्थ्य संगठन (डब्लुएचओ) का अनुसार १ डाक्टरले २० बिरामी हेर्नुपर्ने हुन्छ । तर प्रदेश अस्पतालमा भने १ जना डाक्टरले ७० भन्दा बढी बिरामीको उपचार गर्नुपर्ने बाध्यता रहेको बस्नेतको भनाइ छ ।

अस्पतालमा ३० विशेषज्ञ डाक्टरको दरबन्दी रहे पनि २० जना मात्रै भएकाले प्रभावकारी उपचार सेवा दिन थप १० जना आवश्यक पर्ने मेडिकल सुपरिटेन्डेन्ट डा. डम्बर खडकाले बताए । विशेषज्ञसहित २८ डाक्टर अस्पतालमा कार्यरत रहेको उनले बताए । विभिन्न १४ विभागमै अहिले विशेषज्ञ डाक्टर कार्यरत छन् । अब अस्पतालमा एनेस्थेसियोलोजिस्ट आवश्यक रहेको उनले जनाए ।

‘अस्पतालको नयाँ भवनको काम अन्तिम चरणमा छ,’ उनले भने, ‘आवश्यक उपकरण आएपछि चाँडै नयाँ भवनबाट स्तरीय सेवा दिनेछौँ ।’ उनका अनुसार अबको ३ महिनाभित्र अस्पतालले सुविधा सम्पन्न भवनबाट बिरामीलाई उपचार सेवा दिने योजना बनाएको छ । प्रदेश अस्पतालले अहिले आईसीयू, एनआईसीयू, डायलोसिसलगायत सेवा दिँदै आएको छ ।

प्रकाशित : श्रावण २०, २०७६ ०९:०३
पूरा पढ्नुहोस्
प्रतिक्रिया
पठाउनुहोस्