नीति तथा कार्यक्रम घोषणामै सीमित

राजबहादुर शाही

मुगु — छायाँनाथरारा नगरपालिकाले गत आर्थिक वर्षमा नीति तथा कार्यक्रममा समाबेश गरेका अधिकांश कार्यक्रम घोषणामै सीमित भएका छन् । बढी महत्वाकांक्षी कार्यक्रम समावेश गर्दा कार्यान्वयनमा समस्या देखिएको हो । 

छायाँनाथरारामा वडाध्यक्षको विरोधका कारण नगरसभा ढिलोगरी भएको हो । वडाध्यक्षले सबै वडामा समान रुपले बजेट विनियोजन गरिनुपर्ने भन्दै यसअघि नगरसभा वहिष्कार गरेका थिए ।

सोमबार नगरपालिकाले सार्वजनिक गरेको आर्थिक वर्ष २०७६/७७ को बजेटमा पनि गत वर्षजस्तै केही महत्वाकांक्षी योजना अघि सारिएको छ । गत वर्ष पुरा नभएका कार्यक्रमलाई फेरि कार्यान्वयन गर्नेगरी नीति तथा कार्यक्रममा समाबेश गरेपछि बजेट कार्यान्वयनमा थप चुनौती देखिएको छ । गत वर्ष घोषणा गरिएको ‘नमस्ते रारा’, ‘रारा जाऔं अभियान’ ‘एक छोरी एक खाता’, ‘नगर प्रमुख रोजगार’, ‘गरिबसँग नगर प्रमुख कार्यक्रम’, ‘दुई सन्तान’ लगायत कार्यक्रम कार्यान्वयन हुन सकेनन् । यस वर्ष पनि ती कार्यक्रम समाबेश गरिएको छ ।

चालु आर्थिक वर्षका लागि नगर प्रमुख रोजगार कार्यक्रममा १ करोड, गरिबसँग नगर प्रमुख कार्यक्रममा ५० लाख, कवर्ड हल तथा खेल मैदान निर्माणमा ७० लाख, एक छोरी एक खाताअन्तर्गत ५ लाख रुपैयाँ विनियोजन गरिएको छ । यी सबै कार्यक्रम गत वर्ष पनि घोषणा गरिएको थियो । त्यस्तै भ्यू टावर तथा पार्क निर्माणमा ५१ लाख बजेट विनियोजन गरिएको छ ।

यस वर्ष करिव ७५ प्रतिशत योजना टुक्रे बनाइएको छ । गत वर्षकै अधिकांश कार्यक्रम अलपत्र परेपछि नगरले विभिन्न योजनामा ३० हजारदेखि १ करोड रुपैयाँ विनियोजन गरेको छ । यस वर्षको नीति तथा कार्यक्रममा ‘एक गाउँ एक सडक’, ‘हिलोमुक्त गाउँ’, ‘उच्च शिक्षा अभियान’ लगायतका महत्वाकांक्षी कार्यक्रम समावेश गरेको छ । नगर सभामा नीति तथा कार्यक्रम पेश गर्दै प्रमुख हरिजंग शाहीले यो वर्ष ‘महिलासँग उप प्रमुख’ कार्यक्रम पनि थप गरिएको जानकारी दिए । कार्यक्रममा महिला शसक्तिकरण, हिंसा न्यूनीकरण, क्षमता अभिबृद्धिलगायत योजना समाबेश गरिएको छ ।

नगरले लोकप्रिय हुने नाममा केही कार्यक्रम तयारी बिना ल्याएकाले कार्यान्वयनमा चुनौती देखिएको वडा नं ७ का वडाध्यक्ष हरिचन्द्र शाहीले बताए । ‘स्थानीयको आवश्कतालाई वेबास्ता गरी कार्यक्रम ल्याइदा गत वर्ष पनि केही कार्यक्रम कार्यान्वयन हुन सकेनन्,’ उनले भने, ‘हामीले यसबारे ध्यानाकर्षण पनि गराएका हौं तर वास्ता नगरी नीति तथा कार्यक्रममा महत्वाकांक्षी कार्यक्रम ल्याइयो ।’

विगत वर्षका टुक्रे कार्यक्रमलाई यस वर्ष प्राथमिता नदिएको नगर प्रमुख शाहीले दावी गरे । यस वर्ष नगर सभामार्फत केही नगर गौरवका योजनासहित ३१ करोड ८५ लाख रुपैयाँको बजेट विनियोजन गरिएको उनले जानकारी दिए । उनका अनुसार १४ वडामा ४५ लाख रुपैयाँका दरले भागबन्डा गरिएको छ ।

प्रकाशित : श्रावण २, २०७६ ०९:३५
ADVERTISEMENT
प्रतिक्रिया
पठाउनुहोस्

खलंगा–छापरी रोपवे प्रयोगविहीन

कान्तिपुर संवाददाता

दार्चुला — महाकाली नगरपालिका १ मा चारबर्ष अघि निर्माण भएको छापरी–खलंगा रोपवे अहिले प्रयोग विहिन हुन पुगेको छ । साविकको छापरी गाविसमा उत्पादन हुने तरकारी लगायतका स्थानीय उत्पादनलाई सदरमुकाम पुर्‍याउने उद्देश्यले रोपवे निर्माण गरिएको थियो । अहिले ढुवानीका लागि सामान नपाउँदा बन्द हुन पुगेको स्थानीय हरेराम पार्कीले बताए । 

‘गाउँमा उत्पादन हुने स्थानीय बस्तुलाई ढुवानी गर्न सहज होस भनेर रोपवे निर्माण गरिएको हो’ स्थानीय रामसिँह कुवरले भने, ‘अहिले उत्पादन घटेपछि ढुवानीका लागि सामान नै नपाईने अवस्था छ ।’ तत्कालिन अवस्थामा गैरसरकारी संस्थाहरूको सहयोगमा स्थानीयले तरकारी लगायतको उत्पादन बढाएपनि अहिले उत्पादनमा कमी आएको स्थानीय बताउँछन् ।

‘स्थानीय उत्पादनलाई बजारसम्म पुर्‍याउन र बजारबाट खरिद गरिएको बस्तुलाई गाउँसम्म ढुवानी गर्न रोपवेबाट सजिलो थियो’ महाकाली नगरपालिका १ का वडाध्यक्ष कल्यानसिँह कुँवरले भने, ‘अहिले गाउँमा तरकारी लगायत अन्य बस्तु उत्पादन गर्ने सिजन सकिएको र मानिसहरू पनि यार्सागुम्बा संकलनका लागि लेकतिर गएकोले एक महिनादेखि रोपवे सञ्चालनमा आउन नसकेको हो ।’

तत्कालिन समयमा छापरीका दुई सय घरपरिवार व्यवसायिक तरकारी खेती गर्न थालेका थिए । गैरसरकारी संस्थाहरूको प्राविधिक सहयोग पाएपछि व्यवसायीक उत्पादनमा सहजता आएको थियो । अहिले ति संस्थाहरूको आफ्नो कार्यक्रम सकिएपछि स्थानीय किसानमा तरकारी लगायत अन्य नगदे बस्तु उत्पादन गर्ने बानी घटै गएको सदरमुकाम खलंगास्थित कृषि उपज संकलन केन्द्रका दिलेन्द्रप्रसाद भट्टले बताए ।

यो क्षेत्रमा प्राय महिलाहरू नै घरमा उत्पादन हुने बस्तु पिठ्युमा बोकेर सदरमुकाम खलंगा लगायत नजिकका बजारसम्म पुर्‍याएर विक्री गर्दै आएका थिए । त्यही समस्यालाई मध्यनजर गर्दै तत्कालिन स्थानीय निकाय, सरकारी तथा गैरसरकारी संस्थाहरूको सहयोगमा १ हजार २६८ मिटर लम्वाइको उक्त ग्रेभिटी रोपवे करिव ४६ लाखको लागतमा निर्माण भएको हो ।

ग्रेभेटी रोपवेमा माथि (छापरी) बाट ९० किलोग्राम तथा तल (खलंगा) बाट ३० किलोग्राम ओसारपसार गर्न सकिने कृषि विकास कार्यालयका प्रमुख खगेन्द्रप्रसाद शर्माले जानकारी दिए । रोपवेले सामग्री ओसारपसार गर्दा १ मिनेट ४० सेकेण्ड समय लाग्ने उनले बताए ।

प्रकाशित : श्रावण २, २०७६ ०९:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×