पानीका लागि जाग्राम

ट्यांकी निर्माणका क्रममा जग्गा विवाद भएपछि मर्मतको काम रोकियो, त्यसपछि खानेपानी योजनाको काम पनि ठप्प भयो
विप्लव महर्जन

(सल्यान) — खडेरीले मुहान सुकेपछि बन्गाडकुपिण्डे नगरपालिकाको मुख्य व्यापारिक केन्द्र सल्लीबजारका सर्वसाधारण रातभर जाग्राम बस्न बाध्य छन् । बजारभर एकमात्र धारा हुँदा राति पालो कुरेर सर्वसाधारणलाई खानेपानी भनुपर्ने बाध्यता छ ।

पानीका मुहान सुकेपछि सल्यानको बन्गाडकुपिण्डे नगरपालिकाको सल्लीबजारमा सञ्चालित एकमात्र सार्वजनिक धारामा पानी भर्न गएका महिलाको भीड । तस्बिर : विप्लव/कान्तिपुर

नजिकैका खानेपानी मुहान सुकेपछि सल्लीबजारका २ सय परिवारलाई सास्ती भएको हो । खानेपानी अभावले महिला र बालबालिका बढी समस्यामा छन् । कहिलेकाही रातभर जाग्राम बस्दा पनि नपाइएपछि खोलाको दूषित पानी उपभोग गर्नुपर्ने बाध्यता छ । खानेपानी योजना मर्मतका लागि बजेट विनियोजन भए पनि खर्च हुन सकेको छैन । ट्यांकी निर्माणका क्रममा जग्गा विवाद भएपछि मर्मतको काम रोकिएको हो ।

पानीका लागि वर्षौंदेखि सास्ती पाइरहेको सल्लीबजारकी कमला खडका बताउँछिन् । उनले नयाँ योजना निर्माण नहुँदा र पुरानो योजनाको मुहान खडेरीमा सुक्दा स्थानीयले सास्ती भोगिरहेको बताइन् । ‘बजारभर एउटा मात्र धारो छ, पानी भर्नेको भीड दिनभर हुने भएकाले राति जाग्राम बसेर पानी भर्दै आएका छौं,’ उनले भनिन्, ‘एक गाग्री पानी भर्न २/३ घण्टा कुनुपर्ने बाध्यता छ ।’ केही व्यवसायीले इनार खनेर घरमै पानीको सुविधा पाए पनि विपन्न भने समस्यामा रहेको उनले बताइन् ।

स्थानीय दीपा नेपालीले वर्षौंदेखि हिउँदको समयमा पानीको समस्या हुने गरे पनि सरकारी निकायले बेवास्ता गरिरहेको बताइन् । ‘केही वर्षअघिसम्म बजारमा ६ धारा थिए, मुहान सुक्ने क्रम बढेसँगै धाराको संख्या पनि घटे,’ उनले भनिन्, ‘सरकारी निकायले नयाँ योजना निर्माण नगर्दा सधैं खानेपानीका लागि सास्ती भोग्दै आएका छौं ।’ उनले एक महिनायता राति पालो कुरेर पानी भर्दै आइरहेको बताइन् । उनका अनुसार रातकै समयमा भीड हुने भएकाले जाग्राम बस्नुपर्ने अवस्था आएको हो । उनका अनुसार फागुनदेखि जेठसम्म बजारका बासिन्दाले पानीको समस्या बढी भोग्नुपरेको छ ।

नजिकैको भेरी नदीमा प्रशस्त पानी भए पनि आपूर्ति व्यवस्था नहुँदा समस्या भएको स्थानीयको भनाइ छ । १५ वर्षदेखि स्थानीयले हिउँदमा खानेपानीका लागि सास्ती भोगिरहेको गणेश बुढाले बताए । उनका अनुसार छिन्चु(जाजरकोट(चौरजहारी सडक खुलेपछि दुई दशकदेखि सल्लीमाबजार फस्टाएको हो । साबिक खानेपानी सब(डिभिजन कार्यालयले निर्माण गरेको योजना जीर्ण बनेपछि मुहान सुकेको हो । उनले पिउनबाहेक अन्य कामका लागि भेरी नदीको पानी प्रयोग गर्दै आएको जनाए ।

खानेपानी हाहाकार भइरहेका बेला योजना मर्मतमा विवाद भएको व्यवसायी विजय नेपालीले बताए । उनले जनप्रतिनिधिले समेत विवाद मिलाउन ध्यान नदिएको आरोप लगाए । विवाद समयमै नसुल्झिए आगामी वर्षसम्म योजना मर्मतको काम धकेलिने उनी बताउँछन् । उनका अनुसार खानेपानी अभाव सल्लीबजारलगायत नगरपालिकाका १२ वटै वडामा छ ।

बन्गाड नगरपालिका प्रमुख गोविन्दकुमार पुनले सल्लीबजारमा बृहत् खानेपानी योजनाको आवश्यकता रहेको बताए । उनले ठूलो खानेपानी योजनाको माग भए पनि नगरमा सीमित बजेट हुने भएकाले खानेपानी समस्या समाधान गर्न नसकिएको जनाए । ‘नगरका अधिकांश बस्ती डाँडामा छन्, मुहान खोलाको छेउछाउमा छन्,’ उनले भने, ‘लिफ्।्ट सिस्टमको विकल्प छैन सबै बस्तीमा पानी पुर्‍याउन ।’ उनले लिफ्ट प्रविधिको सामान्य खानेपानी योजना निर्माण गर्न पनि करोड बढी रकम खर्च हुने भएकाले समस्या भएको जनाए । उनले खानेपानी योजना निर्माणका लागि प्रदेश र संघीय सरकारसँग माग गरिएको जानकारी दिए ।

प्रकाशित : जेष्ठ २७, २०७६ १०:४२
प्रतिक्रिया
पठाउनुहोस्

लोकसेवा आयोगको विज्ञापनबारे मन्त्री र सांसदको आ-आफ्नै अडान

ऋषिराम पौड्याल

काठमाडौँ — लोकसेवा आयोगले स्थानीय तहका लागि मागेको कर्मचारी अवश्यकतासम्बन्धी विज्ञापनबारे छलफल गर्न राज्य व्यवस्था तथा सुशासन समितिले पटकपटक बोलाउँदा पनि आलटाल गरेर बसेका संघीय मामिला तथा सामान्य प्रशासनमन्त्री लालबाबु पण्डित सोमबार बिहानै बैठकमा आएका छन् ।  उनले बैठकमा संविधानअनुसार र स्थानीय तहबाट माग भए अनुसार नै लोकसेवा आयोगले स्थानीय तहका लागि कर्मचारी मागेको बताए । 

उनले यो विज्ञापनबाट मन्त्रालय पछि नहट्ने संकेत गरेका छन् । उनले भने, 'हामीले संविधान अुनुसार र धेरै छलफलपछि कर्मचारी माग गर्ने निर्णय गरेका हौं । स्थानीय तहलाई नै कर्मचारी नियुक्त गर्ने जिम्मा दिँदा विकृति देखियो, आफ्नाआफन्त मात्रै भर्ना गर्ने संस्कार देखियो । त्यसैले लोकसेवा आयोगबाट नै कर्मचारी माग गरेका हौं ।'

यसैगरी मन्त्री पण्डितले समितिले पटकपटक बोलाउँदा पनि नआएको भन्ने गुनासोको उत्तर दिँदै भने, 'मैले समिति छल्न खोजेको हैन । अलि बढी व्यस्त भएर मात्रै आउन नसकेको हुँ ।'

तर समितिका सदस्यहरुले भने सरकार यो कदमबाट पछि हट्नै पर्ने बताएका छन् । समिति सदस्यहरु जनार्दन शर्मा, रेखा शर्मा, डिला संग्रौला, देवेन्द्रराज कँडेलले यो प्रक्रिया नै गलत भएको र समावेशी पनि नभएकोले तत्काल फिर्ता लिन मन्त्रीलाई आग्रह गरेका छन् ।सत्तारूढ पार्टीका सांसद तथा पूर्वमन्त्री जनार्दन शर्माले संविधान मिचिएको भन्दै विज्ञापन तत्काल खारेज गर्नुपर्ने बताएका हुन् 

जनार्दन शर्माले मन्त्री पण्डित समक्ष भने, 'संविधान कार्यान्वयन कसले गर्ने हो ? यसरी लोकसेवाबाट नै कर्मचारी माग गर्दै जानु भनेको संविधान मिच्दै जानु हो ।' उनले यो विज्ञापन फिर्ता गर्नै पर्ने माग गरे । उनले शुक्रबार तयार लोकसेवाको विज्ञापनबारे तयार पारिएको ड्राफ्ट पारित हुनुपर्ने बताए ।

शुक्रबार मन्त्री पण्डित बैठकमा नआएपछि राज्य व्यवस्था तथा सुशासन समितिले शुक्रबार तयार गरेको निर्देशनको ड्राफ्ट सार्वजनिक गर्न रोकिएको थियो । मन्त्रीलाई अन्तिम मौका दिने भन्दै समितिले सोमबार बिहान पुनः बैठक बोलाएको थियो ।

सांसदहरूको सुझावका आधारमा तयार ड्राफ्टमा हालको विज्ञापन रद्द गर्नुपर्ने, स्थानीय तहलाई आवश्यक कर्मचारी तत्कालका लागि संघबाट पठाउने वा करारमा राख्नुपर्ने र समावेशी आधारमा मात्र विज्ञापन निकाल्नुपर्नेलगायका निर्देशनको बुँदालाई अन्तिम रूप दिइएको छ ।

प्रकाशित : जेष्ठ २७, २०७६ १०:३६
पूरा पढ्नुहोस्
प्रतिक्रिया
पठाउनुहोस्